Wihwia kan
En Wahnpoaroannok
Oarlap in Puk oauwe
Pukin Wihwia kan in Woaroakkok, ioar wijehla Rongmwehu in Luke. Ioar kahrpoa keiou kajampwal in puk oauwe, pwa en kajalehda doahroar Ngen Joarwi ah kaweidki irai ok ma sapin pwilihla Jesus nehn mwomwohdjo nehn arai kalohkihjili doahroar Rongmwehu in Jesus “nehn Jerusalem, nehn Judea pwon apel Samaria lelwehng uhdikoan jampah” (1.8). A, ioar sikesik in mwoakin in joauloang doahroar ah sapda ipen mihn Jew-ok, ih ken wiahla pwojon in jampah pokon. Jouninsing in puk oauwe pel injinohki kawoahwoahng armaj in anjoauwo pwa mwoakid in joauloang oauwe jaudi joangoan lamlam keper ma uhwoang Rome, a mwoakid in pwojon in joauloang oauwe ma injang apel kaunjekihla loapin lamlam in mihn Jew‑ok.
Wihwia kan pwalpijoang wiahda loap jiluh in doahroar sikesik in mwomwohdjo nehn wija kan ma Rongmwehu in Jesus parpijoang apel lolohkjili: (1) sapin mwoakid in joauloang nehn Jerusalem mwerin Jesus ah indahla nehnloannge; (2) doahroar parpijoang in mwoakid oauwe wija kan nehn Palestine; (3) apel doahroar ah parpijoang nehn wei kan ipen Jed Mediterranean, lellahng nehn Rome.
Mine mehkij ma inenin janjal mwehu nehn pukin Wihwia kan; doari, ioar doadoahk in Ngen Joarwi ma manman indihoang pohn irai kan ma pwojon nehn Jerusalem in rehn in Pentecost, apel uhjehlahr kaweid apel kasihkei sohn mwomwohdjo apel arai jounkaweid kan nehn wihwia kan ohroj ma ne audohda puk oauwe. En sapin joauloanngok ahr lal kan oang sohn jampah ne mine in oarlap nehn kapahrak pwi, apel wihwia kan ma janjal pukin Wihwia kan kadehde doahroar sihkei in lal pwiai nehn mour in ihr ma pwojonnok apel nehn minmin in sohn mwomwohdjo.
Audoapoa in Oarlap
Koaunopdahn wia jounkadehde 1.1-26
Kadoariheklahn kojonned in Jesus apel ah inoau kan 1.1-14
Wiliepen Judas 1.15-26
Doadoahk in jounkadehde kan nehn Jerusalem 2.1—8.3
Doadoahk in jounkadehde kan nehn Judea apel Samaria 8.4—12.25
En Paul ah doadoahk 13.1—28.31
Jeiloak keiou in kalohkihjili Rongmwehu 13.1—14.28
Wia lamlam nehn Jerusalem 15.1-35
Jeiloak kariau in kalohkihjili Rongmwehu 15.35—18.22
Jeiloak kajiluh in kalohkihjili Rongmwehu 18.23—21.16
Paul nehn kalpwuhj in Jerusalem, Caesarea, apel Rome 21.17—28.31
1
1 Maing Theophilus.
Nehn noai puk keiou ngoahi ne insingehdi mwoakid kan ohroj ma Jesus ne wiahda apel padahki nehn anjoauwo ma Ih sapkihda Ah doadoahk
2 oaroh lel rehnno ma Ih pohkdahla nehnloannge. A mwohn Ah pohkdahla nehnloannge, Ih wiahng irai koahkoahlik pwi jang in manman in Ngen Joarwi, oang woallok ma Ih ne pilda pwa irai en wia Nah wahnpoaroan.
3 Nehn irair in rehn pahijek mwerin en Jesus Ah mehdi, pehn dir Ih kin pwokkoang irai pein ih pwa ih pwen mour jang in kadehde janjal pwi. Irai ne pel kapang, ih pel siksikoahng irai doahroar Wein Koahs.
4 Nehn anjoau ma irai ne pokonpene, Jesus pwehng irai, “Kamwai joah injang Jerusalem, a kamwai jouwihoar kijakijjo ma Joamoai ne inoaukihdi, ma Ngoahi ne padahkihoang kamwai.
5 John poapdaijki pil, a nehn mwerin rehn pwi kamwai pirin poapdaijkihla Ngen Joarwi.”
Jesus Pohkdahla Nehnloannge
6 A anjoauwo ma wahnpoaroannok ne pokon pene ipen Jesus, irai idoak, “Maing Koaun, ioar apkas Koawoa nen onehda japahl wein Israel?”
7 Jesus japoang irai, “Johpwa mweimwei oang kamwai en kidal anjoau apel iren anjoau kan. Anjoau kan apel irair in anjoau kan ne koajoandi ipen Joamoaiho jang pein ah manman.
8 A kamwai pirin audohdkihda manman nehn anjoau ma Ngen Joarwi pirin indihoang pohmwai, a kamwai pirin kadehde Ngoahi nehn Jerusalem, nehn Judea pwon apel Samaria lelwehng uhdikoan jampah.”
9 Mwerin Ah sikoahla mehpwiai, Ih ken pohkdahla nehnloannge nehn irai kapkapang, a koasoau oau ken kajoaloange jang Ih.
10 Nehn irai jipwoaldahla nehnloannge kapkapang en Jesus ne inla, irai kapangda woal roahmen likkoauki korohro uhda iparai.
11 Ira pwehng irai, “Kamwai mihn Galilee, amwda kamwai uhda men jipwjipwoalkihdahla nehnloannge? Ioar Jesus mene ma pohkdahla nehnloannge jang kamwai pirin pel japahldohng kamwai in mwommwoauwehr nehn amwai kapang Ah pohkdahla nehnloannge.”
Wiliepen Judas
12 Woaroakkok ken japahllahng Jerusalem jang in Dolin Olip, ma enkennoar oaloap in mwail jang kahnihmmwo.
13 Irai ne dilda nehn Jerusalem, irai doaudahlahng nehn perehu puwoa wija ma irai kin koaukoaujoan: Peter, John, James, Andrew, Philip, Thomas, Bartholomew, Matthew, James nihn Alphaeus, Simon ma pwili pwihn in Zealot apel Judas nihn James.
14 Irai pwiai kin kalap pokonpene wiahki oau kapkap, pwilihki lihok, Mary inen Jesus, apel riah woallok.
15 Nehn rehn pwi ma irai ok ma ne pwojonla kin pokonpene, irai ohroj nimen oar armaj epwiki rieijek (120). Peter uhda padahk,
16 “Rioai kan, iren Puk Joarwi uhdahn pirin pwoaida, ma Ngen Joarwi kalallali David, ne kohpda doahroar Judas, ma ioar kahlwa irai ok ma joalihdi Jesus.
17 Judas wia emen in kisai, nehn ah pilpilda pwa en pwili pwukoahki asai doadoahk.”
18 (Jang in mwanihn ah wihwia naunahu, Judas dupukda japw oau, ma ioar wijahwa ih mehdi; ih kipdi, pwalpijoang, ohroj koanngen kapehdinno widekjang.
19 Doari, armaj ohroj ma koaukoaujoan Jerusalem ne rong doahroar me, in pein arai lal irai kioang oadoan japw oauwe Akeldama, ma woahwoahki “Japwen Insa.”)
20 “Pwa ne insingdi nehn pukin Psalm,
‘Umwahu en johla koannge;
joah mweidoahng emen en koaujoan loaloa.’
A ne pel insingdi,
‘emen sohrohr en wiliandi oaloa doadoahk oauwe.’
21 “A emen woal uhdahn pirin pilpilda en pwilihla kisai, pwa en pwili kadehde iejdahn Jesus Christ. A woal mene en jang oar nehn pwungen irai ma ne pwen wia kijehn pwihn oauwe nehn irair in anjoauwo ma Koaun Jesus kin pwilpwili kisai.
22 Sapda jang in anjoauwo ma John poappoapdaij oaroh lel rehnno ma Jesus pohkdahla jang kisai oang nehnloannge.”
23 Irai kihda ad riau, Joseph ma pel adanki Barsabbas (ih pel adanki Justus) apel Matthias.
24 Irai kapkap poaki, “Maing, koawoa ma kin kidal mohngiong in armaj ohroj. Doari koawoa en kajalehioang kamai pwa inje in ara ma koawoa ne pilda,
25 ma en oaloa ah pwaij doadoahk in wahnpoaroan ma Judas ne johla anki pwa ih ne inlahng uhdahn ah wija.”
26 Mwerin mehpwiai, irai wijwijki ad riauwe pwa irai en pilda jang nehn pwungen ira roahmenne. Addo ma pilpilda ioar Matthias, ih en kapaspassoang wahnpoaroan eijek emenno.