21
Jesus Pwokkoang Sohnpadahk Ijimen
1 Mwerin mehpwiai, Jesus pel pwuroahng pwokkoang sohnpadahkkok ipen Lehn Tiberias. Me ioar doahroar da wiawi.
2 Simon Peter, apel Thomas (ma pel adanki Umpwoar), apel Nathanael, mihn Cana nehn Galilee, apel nihn Zebedee woallok, apel woal roahmen jang nehn pwungen Nah sohnpadahkkok, irai pokpokon.
3 Simon Peter pwehng irai, “Ngoahi pirin inla loakjid.”
Irai pwehng ih, “Kamai pirin pwili koawoa.” Irai ken inla doauda pohn pohs oau. A inpwonngo irai johpwa koldi mehkij.
4 A nehn ah rehnpijoang Jesus minmine in oaroahrro a sohnpadahkkok pwen jehjoa pwa Ih ioar Jesus.
5 Jesus pwehnglahng irai, “Woal kan! Mine koanoahmwai?”
Irai japoang, “Johpwa mehkij.”
6 Ih pwehng irai, “Kamwai kadardi ukken loap moaun in pohssen; a kamwai pirin koldi epwi.” Irai ken kadardi ukko, irai ken johla kak oapihda pwa ne dirkihla mwumw.
7 Sohnpadahkko ma Jesus kin ipwilki ken pwehnglahng Peter, “Ioar Koaunwa o!” Nehn Simon Peter ah rong pwa ioar Koaunwa o, ih ken kasoangehdi ah likkoaun likinno (pwa ih ne kakihrjang ah likkoaun likinno) lujdihoang nehn pillo.
8 A sohnpadahkkok jeikihdo pohsso warwarahkihdo ukko ma dirkihla mwumw pwa irai pwen johpwa dohjang japw, dapwa iahs epwiki.
9 Anjoauwo ma irai kerdihjang pohn pohsso, irai kapangda oai oau ma ne mwolujdi, a mwumw pwi mine puwoa apel pilahwa pwi.
10 Jesus pwehnglahng irai, “Kamwai wahdo epwi mwumw kan ma kamwai koldi.”
11 Simon Peter ken doauda pohn pohsso, oapihdahdohng japw ukko ma dirkihla mwumw koalik epwiki limeijek jilmen (153). Joangoan dirin mwumw, a ukko pwen johpwa ohla.
12 Jesus pwehng irai, “Kamwai indoa mwinge.” Joh emen irai sohnpadahkkok idoak, “Inje Koawoa?” Pwa irai ne pwen kidal pwa Ih ioar Koaunwa.
13 Jesus inla oaloa pilahwahu, ken nehk oang irai, apel nehk oang irai mwummwok.
14 Ioar me kajilpakin en Jesus ah ne kajalehioang sohnpadahkkok pein Ih mwerin Ah ne iejda jang mehdi.
Jesus apel Peter
15 Mwerin irai mwingehpene, Jesus ken idoak oang Simon Peter, “Simon, nihn John, koawoa ipwilki Ngoahi koalikjang mehpwiai?”
Peter japoang, “Eh, Maing oai Koaun, Koawoa kidal pwa Ngoahi ipwilki Koawoa.”
Jesus pwehng ih, “Kamwinge Noai jimpwul kan.”
16 Ih pel pwuroahng idoak, “Simon, nihn John, koawoa ipwilki Ngoahi?”
Peter japoang, “Eh, Maing oai Koaun, Koawoa kidal pwa Ngoahi ipwilki Koawoa.”
Jesus pwehnglahng, “Apwali Noai jihpw kan.”
17 Ih pel idoak kajilpak, “Simon, nihn John, koawoa ipwilki Ngoahi?”
Peter inenin injinjuwedkihla en Jesus Ah kalelpoak kajilpak, “Koawoa ipwilki Ngoahi?” Ih ken japoang Ih, “Maing oai Koaun, Koawoa kidal meohroj, Koawoa kidal pwa ngoahi ipwilki Koawoa.”
Jesus pwehnglahng ih, “Kamwinge Noai jihpw kan.
18 Ngoahi pwehng koawoa in mehlel: nehn oamw mwahnkapw, koawoa kin pein kasoangehpene oamw kangir, inla wija ma koawoa mwehuki. A nehn oamw pirin mahla, koawoa pirin kailwe poahmmwen kan, a emen pirin piroahpene, a ukkoawoalahng wija ma koawoa joah nimen inla.”
19 (Ih pwa mehpwiai pwa en kajalehda joangoan mehdiho ma Peter pirin kalingihkihla Koahs.) Mwerin me, Jesus pwehnglahng ih, “Papah Ngoahi!”
Jesus apel Sohnpadahk Meno
20 Peter ken jipwoalla kapang sohnpadahkko ma pwilpwilihdo irai, ma Jesus kin ipwilki — ih ma englahng ipen Jesus nehn irai mwingmwinge, ih idoak, “Maing, inje ih ma pirin pangla Koawoa?”
21 Nehn Peter ah kapang woallo, ih ken idoak ipen Jesus, “Maing, imdoahr woal mene?”
22 Jesus japoang, pwehng ih, “Ma Ngoahi nimen woal mene en minminehroh Ngoahi pwurdo, mihndahng koawoa? A koawoa papah Ngoahi!”
23 Sikesik pase ken lohkjili nehn pwungen joauloanngok, ma pwa sohnpadahkko jehpirin mehdi. A Jesus johpwa pwa woallo jehpirin mehdi, Ih pwen pwa, “Ma Ngoahi nimen woal mene en minminehroh Ngoahi pwurdo, mihndahng koawoa?”
24 Ioar sohnpadahkwa me ma ne kadehdehda doahroar mehpwiai, ma ne insingehdi sikesik pwiai; a kamai kidal pwa ah kadehde pwen mehlel.
Koarjoahklahn Puk oauwe
25 A pel mine joang dir ma Jesus pel wiahda. A ma kamai pirin insingehdi doahroar mehkan ohroj, Ngoahi lemleme pwa jampah oauwe nen johkak audohdkihda puk kan ma pirin insingda.