10
Karajraj in Jilepen Jihpw
1 “Ngoahi pwehng kamwai in mehlel: ma emen ma joah dilda nehn wanihmwin kelin jihpw, a doau oang nehn oau joangoan al sohrohr, ioar ih jounpirap men, apel mwoarjuwed men.
2 A ih ma kin dilda nehn wanihmmwo, ioar ih ma jilepen jihpw.
3 Jilepen wanihmmwo kin risingdahng jilepen jihppwo; nah jihpw kan kin rong ngiloa, nehn ah kin panginki irai oadoarai, a ih kin kahlwahla irai likin.
4 Nehn ah kadilihla irai, Ih kin wudla mwohn irai, apel jihpw kan kin kauj ih, pwa irai ahnla ngiloa.
5 Irai jehpirin kauj emen sohrohr; irai nen kau jang joangoan armaj meno, pwa irai jahn ngiloa.”
6 Jesus pwehng irai karajraj pase, a irai johpwa kidal ia woahwoahn.
Jesus Ioar ma Jilepen Jihpw Mwehu
7 Jesus pel pwuroahng pwehng irai, “Ngoahi pwehng kamwai in mehlel: Ngoahi ma wanihmwin kelin jihpw.
8 Irai ohroj ma ne indoa mwohioa, jounpirap apel mwoarjuwed pwi, a jihppwok joah rong irai.
9 Ngoahi ma wanihmmwo. Ma emen dilda nehn wanihmw oauwe pirin mourla. Ih pirin dilda apel dilla, apel kapangda kanah mwinge.
10 Jounpirap kin indoa pwa en pirapoa, kojukdi, apel koauwehla. A Ngoahi, indoa pwa irai en anki mour — mour unjek.
11 “Ngoahi ma jilepen jihpw mwehu. Jilepen jihpw mwehu men mihndahkihla Ah mour ki Nah jihpw kan.
12 Sohndoadoahk men, ma jaudi jilepen jihpw, apel jaudi uhdahn nah jihpw kan, nehn ah kin kapangda wolf ah allaluhdo Ih kin kerpwihla irai ih kaula. Wolf kin koldi jihpw kan apel kaujpijoang irai.
13 Sohndoadoahk men kin kaula pwa ih doadoahkkoar pwa en oaloa dupkoa, a joh kin injinohki jihpw kan.
14 Ngoahi ma jilepen jihpw mwehuwa. Ngoahi kidal Noai jihpw kan, irai pel kidal Ngoahi.
15 Doahroar Jahm ah kidal Ngoahi, apel Ngoahi kidal Jahmmo. A Ngoahi pirin mihndahkihla Oai mour pwa irai.
16 Pel mine epwi Noai jihpw ma joah mine nehn kel oauwe. Ngoahi uhdahn pirin wahdo irai, apel irai pirin rong ngiloaihoa. Doari, irai pirin wiahla pwihnin jihpw oauwoar, apel jiloapoarai pirin emennoar.
17 “Joamoai kin ipwilki ngoahi, pwa Oai kin mihndahkihla Oai mour, pwa Ngoahi en kak pwuroahng oaloa.
18 Joh emen pirin kihjang Oai mour, a pein Ngoahi ma mihndahkihla. Mine Oai manman en mihndahkihla, apel pel mine Oai manman in pwuroahng oaloa. Ioar doahroar ma Joamoaiho inoaukihoang Ngoahi pwa Ngoahi en wia.”
19 Doari, mihn Jew‑ok pel pwuroahng liaksohrohr ki lal pwiai.
20 Armaj dir nehn pwungarai pwa, “Ngen jaus mine ipoa, apel pweipwei men Ih! Dahkij kahrehda kamwai rong Ih?”
21 A pel epwi pwa, “Armaj ma ngen jaus mine ipoa joh kak sikoa mehpwiai. Mindoahr ngen jaus ah kak kapoahdpijoang pwoaroan mijen armaj majkun men?”
Mihn Jew kan Japwungki Jesus
22 Doari, anjoau in pokon in kajarawihn Umw Joarwiho nehn Jerusalem nehn johnpwong in kopou.
23 Jesus allaluhjili nehn Umw Joarwiho nehn Palang in Solomon.
24 Mihn Jew‑ok ken pidekihpene, idoakkoang Ih, “Ia woaroaihn amai pirin joujowihki koawoa? Ma ioar koawoa Messiah, kadehdehng kamai in janjal!”
25 Jesus japoang, “Ngoahi ne pwehng kamwai, a kamwai joah nimen kamehlele Ngoahi. Doadoahkkok ma Ngoahi ne wiahda in manman in Joamoaiho, ioar ma ne kadehdehda.
26 A kamwai jehpirin kamehlele, pwa jaudi kijehn Noai jihpw kamwai.
27 Noai jihpw kan kin rong ngiloaihoa; a Ngoahi kidal irai, a irai kin pwilpwili ngoahi.
28 Ngoahi kioang irai mour joahsuk, a irai jehpirin mehdi. Joh emen kak doapwoahjang irai Ipoai.
29 Da Joamoaiho kioang Ngoahi koalikjang mehkan ohroj. A joh emen ma kak doapwoahjang nehn poahn Joamoaiho.
30 Joamoaiho apel Ngoahi emennoar.”
31 Mihn Jew‑ok ken pwuroahng rik sakai pwa irai en kasoahki Ih.
32 Jesus pwehng irai, “Ngoahi ne wiahda doadoahk mwehu dihrdir mwohn kamwai ma Jahmmo kioang Ngoahi pwa Ngoahi en wia. A doari, doadoahk dahioau nehn pwungen doadoahk pwiai kamwai nimen kasoahki Ngoahi?”
33 Mihn Jew‑ok japoang, “Jaudi doadoahk mwehu ma kamai nimen kasoahkihdi Koawoa, a pwa Oamw kin lahlahwe Koahs! Pwa Koawoa, armaj men, Koawoa kin wiahki pwa Koawoa Koahs!”
34 Jesus japoang, “Ne insingdi nehn amwai kojonneddo ma Koahs pwa, ‘Kamwai kohs pwi.’
35 Doari, kisai kidal pwa dahkij Puk Joarwi sikoa pwen mehlel anjoau ohroj; a Koahs panginki irai koahs pwi, irai armaj kan ma Ah mahjan ne aluhwoang.
36 A Ngoahi, Jahm ne pilda kadardo nehn jampah. A doari, da kamwai kak sikoahki pwa Ngoahi lahlahwe Koahs pwa Oai pwa Ngoahi Nihn Koahs?
37 Ma Ngoahi johkin kapwaihahda doadoahk kan en Joamoaiho, doari, kamwai ken joah kamehlele Ngoahi.
38 A ma Ngoahi kin wiahda, mihnda ma kamwai johpwa kamehlele Ngoahi, a kamwai en kamehlele Oai doadoahk kan, pwa kamwai en kidalkihda apel woahwoahkihda pwa Jahm kin minmine nehn Ngoahi, apel Ngoahi, kin minmine nehn Jahm.”
39 Irai pel pwuroahng rapahki pwa irai en jipoardi Ih, a Ih joaloang jang nehn pwungarai.
40 Jesus japahlla oaloap Pillap Jordan wijahu ma John kin wia poapdaij mehjwa; Ih ken minmine wijahu.
41 Armaj dihrdir pokondohng ipoa. Irai ken pwa, “Joh manman John wiahda, a joang ohroj ma ih pwahki doahroar Woal mene inenin mehlel.”
42 Doari, armaj dir wijahu ken pwojonla Jesus.