11
Mehdihn Lazarus
1 Mine woal men ma johmwehuda ma adanki Lazarus, kin koaukoaujoan Bethany, nehn kahnihmw ma Mary apel riah Martha kin koaukoaujoan.
2 (Ioar Mary mene ma salipki ehn Koaunno le karahdin a limwihki pisen moange, ioar ih ma pel rianki Lazarus ma johmwehudahu.)
3 Riariho koarongehki Jesus, “Maing ama Koaun, Oamw pirienno ne johmwehuda.”
4 Nehn Jesus ah rongda, Ih ken pwa, “Johmwehu oauwe jehpirin kahrehda Lazarus en mehdi; me en wiawi pwa en kalingihda Koahs, a johmwehu oauwe pirin wia oau al ma Koahs pirin kalingihkihda Nahu.”
5 Jesus kin ipwilki Martha, riah liho, apel Lazarus.
6 Jesus ne kidal pwa Lazarus johmwehuda, a Ih minminehr wijahu ma Ih mine oaroain rehn riau.
7 Doari, Ih pwehng Nah sohnpadahkkok, “Kisai pirin japahlla Judea.”
8 Sohnpadahkkok japoang, “Maing Jounpadahk, rehn pwiok mihn Jew‑ok nimen kasoa koawoa wijahu. A imdoahr, koawoa pel lemleme pwurlahng wijahu?”
9 Jesus japoang, “Jaudi awa eijek riau mine nehn rehn oau? Doari, ma emen ma kin allalu in rehn, Ih jehpirin dipkelkel, pwa ih kapkapang maram in jampahioauwe.
10 A ma ih kin allalu inpwong, ih pirin dipkelkel, pwa marammo joah mine ipoa.”
11 Jesus pwahla mehpwiai, apel pwuroahng pwa, “Asai pirien Lazarus moairla. A Ngoahi pirin inlahng panginda ih.”
12 Sohnpadahkkok japoang, “Maing, ma ih moairla, a ih nen mwehula.”
13 Sikesik in Jesus pase uhdahn woahwoahki pwa Lazarus ne mehdi, a irai pwen kihkihoang pwa Jesus lemleme pwa ih pwen moair.
14 Jesus pwehng irai in janjal, “Lazarus ne mehdi.
15 A pwa kamwai, Ngoahi perenkihda Oai joah mine ipoa, pwa kamwai en pwojon. Doari, kisai inla ipoa.”
16 Thomas (ma pel adanki Umpwoar) pwehng kijeh sohnpadahkkok, “Kisai pwili asai Jounpadahkke inla wijahu, pwa kisai en pwili Ih mehdi.”
Jesus ioar ma Iejda apel Mour
17 Nehn Jesus ah mine wijahu, Ih kidalda pwa Lazarus ne joajjoardi a ne rehn pahu doaula puwoa.
18 Johpwa lel mwail riau ma Bethany dohki jang Jerusalem.
19 Mihn Jew dihrdir ma indoahng suhwoang Martha apel Mary pwa irai en kamwais ira ki mehdihn riara woallo.
20 Nehn Martha ah rongda pwa Jesus allalu indoa, Ih aluhla pwa ih en suhwoang; a Mary minminehr nehn ummwo.
21 Martha pwehng Jesus, “Maing Oai Koaun, ma koawoa pwen minminehr me, rioai woallo jehpirin mehdi.
22 Doahr joah, Ngoahi kidal pwa Koahs pirin kioang Koawoa dahkij Koawoa pirin poaki Ipoa.”
23 Jesus pwehng ih, “Rioamw woallo pirin pwuroahng mourda.”
24 Martha japoang Ih, “Ngoahi kidal pwa Ih pirin pwuroahng mourda in rehnin kadeikko.”
25 Jesus pwehng ih, “Ngoahi ma mour japahl apel Jounkoamoaur. Ma emen ma pwojon Ngoahi, mihndahr ma Ih mehdi, a Ih pirin mour.
26 A ma emen ma mour a pwojon Ngoahi, jehpirin mehdi allaluhla. A doari, koawoa kamehlele me?”
27 Liho japoang, “Eh, Maing oai Koaun, ngoahi kamehlele pwa Koawoa Messiah‑wa, Nihn Koahsso, ma pirin indihdohng jampah.”
Jesus Joang
28 Mwerin Martha ah pwahla mehpwiai, ih japahlla ngudkihoang riah Mary, “Jounpadahkko ne indoa, a Ih idoak koawoa.”
29 Nehn Mary ah rongda, ih pispis uhda inla pwa ih en suhwoang Jesus.
30 (Jesus kahjikkoar lellahng nehn koaujoanno, pwa Ih minminehr wijahu ma Martha suhwoang Ih.)
31 Mihn Jew‑ok ma pwili Mary mine nehn ummwo, ma kamwkamwais ih, irai pwilpwili ih anjoauwo ma irai kapang ih uhda a pispis dilla. Irai lemlemehkihoang pwa ih pirin inla in joaujoauwo pwa ih en joang.
32 A nehn Mary ah lellahng wijahu ma Jesus minmine, ih ken rukdi in pwoalkoa pwehng Ih, “Maing oai Koaun, ma koawoa minminehr me, rioai woallo nen johpwa mehdi!”
33 Jesus kapangda ah joangjoangjoang, apel mihn Jew‑ok ma pwili ih pel joang, Ih ken injinjuwedla apel pahsoaula.
34 Ih idoak iparai, “Ia wija kamwai jaripdi ih?”
Irai japoang, “Maing amai Koaun, indoa kapang.”
35 Jesus joang.
36 Mihn Jew‑ok ken pwa, “Ia woahr Ah ipwilki woallo!”
37 A epwi nehn pwungarai pwa, “Jaudi Ih ma kapoahdpijoang mijen woal majkunno? Imdoahr, Ih johkak en wia mehkij pwa en doaroajang Lazarus mehdi?”
Lazarus Pwuroahng Mourda
38 Jesus pel pwuroahng injinjuwedla, inlahng in joaujoauwo, nehn pwoaroan paip oau ma sakai oau kin poaroahla.
39 Jesus pwa, “Kamwai pwoakjang sakaien!”
Martha, rien woal mehdiho, pwehng ih, “Maing, Ih ne pwohn naunahla, pwa ne rehn pahu daulihla — ah joajjoardi!”
40 Jesus pwehng liho, “Ngoahi joah ne pwehng koawoa pwa koawoa pirin kapang lingin Koahs ma koawoa pirin pwojon?”
41 Irai ken pwoakjang sakaiho, Jesus jarda pwa, “Joamoai, kalahngan en koawoa pwa oamw kin rong Ngoahi.
42 Ngoahi kidal pwa Koawoa kin rong Ngoahi anjoau ohroj, a Ngoahi pwa mehpwiai pwa armaj pwiai ma mine wija kije, irai en kamehlele pwa Koawoa ma kadardo Ngoahi.”
43 Mwerin ah pwahla mehpwiai, Ih kakoalikihla ngiloa, pwa, “Lazarus, dildihdo!”
44 Woal mehdiho dildihdo, poah apel ehn kan kidkidkihpene likkoaun nehn joaujoau, apel likkoau oau pidpene mijoa. Jesus pwehnglahng irai, “Kamwai lapwadda woallen kadarla ih.”
Pwihnno ma Pallanda Jesus
45 Mihn Jew dir nehn pwungarai ma indoa ipen Mary, irai kapang da ma Jesus ne wiahda irai ken pwojonla.
46 A epwi irai pwurlahng ipen Pharisee‑ok padahkihoang irai doahroar mehkan ma Jesus ne wiahda.
47 Doari, jamwrou laplappok apel Pharisee‑ok ken kapokonihpene Sohn Mwoalen Koapwunngo pwehng irai, “Dahkij kisai pirin wia? Pwa joangoan kilel kan ma woal mene kin wihwia!
48 Ma kisai mweidoahng ih en wihwia joang pwiai, armaj ohroj pirin pwojonla, a laplap kan in Rome nen indoa koauwehla asai Umw Joarwiho apel asai weihe pwon.”
49 Emen irai ma adanki Caiaphas ma wia Jamwrou Laplap nehn pahrro pwehng irai, “Kamwai johpwa kidal mehkij!
50 Kamwai johpwa dehdehki pwa en mwehu oang kamwai ma emen pirin mehkihdi armaj kan pwa sohn weihe pwon en joah mwomwla?”
51 Caiaphas in mehlel, joah wia sikesik pase pwa Ih ioar ma wia Jamwrou Laplap in pahrro, ih pwen kohpda pwa Jesus pirin mehkihdi mihn Jew‑ok.
52 Jaudi irai ioar doari a pwa en kapsahpene jerihn Koahs kan ohroj ma ne mwoarpijoang.
53 Doari, jang in rehnno inla koaun in mihn Jew‑ok wia lamlamki doahroar irai pirin kojukdi Jesus.
54 A ioar kahrehda Jesus johla allaluhjili janjal nehn Judea. Ih ken injang wijahu inlahng wija kij ma koaroannoang japwsoahn, in kahnihmmwo ma adanki Ephraim; ioar wijahwa ma Ih minmine pwilihkihla Nah sohnpadahkko.
55 Doari, en mihn Jew kan Joarwihn Passover ne koaroando, armaj dihrdir injang nehn japw kan indahlahng Jerusalem pwa irai kapwaihahda arai siahk in kamwkel mwohn joarwiho pirin sapda.
56 Irai raprapahki Jesus, a nehn irai pokonpene nehn Umw Joarwiho, irai kin peidekpene nehn pwungarai, “Da kamwai lemleme? Woallo pirin pwili joarwihe ke joah?”
57 Jamwrou Laplappok apel Pharisee‑ok ne koajoanehdihoang armaj kan, ma emen kidal ia Jesus minmine, a en pakairkihdo pwa irai en kak joalihdi.