10
Jesus Kadarpijoang Nah Sohnpadahk Ijihjek Roahmen
1 Mwerin mehpwiai Koaunno pilda sohnpadahk ijihjek roahmen kadarpijoang irai, wad roahmen, pwa irai en inlahng nehn kahnihmw kan apel wija kan ma pein Ih pirin inlahng.
2 Ih pwehng irai, “Roakke inenin koalik, a sohndoadoahk kan ma pirin rikda jipid; kamwai en kapkap poaki Koaun in roakke pwa Ih en kadardohng sohndoadoahk dir nehn Ah roakke.
3 Doari, kamwai alwe, kamwai en kidal pwa Ngoahi kadarwe kamwai doahroar jihpw pwulopwul pwi nehn pwungen wolf.
4 Kamwai joah wa dohn mwani, ke pehk in jeiloak ke ju. Kamwai joah uhdi nehn al kan pwa kamwai en rahnmwahuwi armaj.
5 Nehn amwai pirin kin lel nehn oau umw kamwai pirin pwa, ‘Popohl oang umw oauwe.’
6 A ma armaj in popohl men mine nehn ummwo, amwai popohl pirin minehla ipoa, a ma joh, a popohllo pirin pwurdohng kamwai.
7 Kamwai en minminehr nehn ummwo, pwili kang apel nim me ohroj ma irai pirin koaunopda kioang kamwai, pwa sohndoadoahk ohroj kin koanoahng oaloa dupkoan ahr doadoahk. Kamwai joah kin kajkajaujili injang oau umw inlahng nehn oau.
8 Ma kamwai pirin dildahng nehn oau koaujoan a irai kajamwo kamwai, kamwai kang mwinge kan ma irai pirin kioang kamwai.
9 Kamwai kemwehuwihla johmwehu kan nehn koaujoanno, apel padahkihoang irai pwa ‘Wein Koahs ne indoa koaroandohng kamwai.’
10 A ma kamwai dildahng nehn oau koaujoan a irai joah nimen kajamwo kamwai, kamwai inlahng nehn al kan apel pwehng sowoa kan,
11 ‘Pwirej par in amwai koaujoan ma ne soangoang in pwoalkoamai kai, kamai jipedwehng kamwai. A kamwai en kidal pwa Wein Koahs ne koaroandohng kamwai!’
12 Mehlel Ngoahi pwehng kamwai pwa nehn Rehnin Kadeikko Koahs pirin kajalehda Ah kadek oang Sodom koalik jang koaujoanno!
Koaujoan Joahpwojon pwi
13 “Ia woahr nauna oang koawoa Chorazin! Pel ia woahr nauna oang koawoa Bethsaida! Pwa ma manmannok ma ne wiawihoang kamwa, wiawi ipen Tyre apel Sidon, sohn kahnihmw pwiai nen minmine nehn likkoaun injinjuwed, apel kamwroahdi poahj pohrai, kajalehda ahr koaluhla apel wiliakapwla.
14 Nehn Rehnin Kadeikko Koahs pirin kajalehda Ah kadek oang Tyre apel Sidon koalik jang kamwa.
15 A oang koawoa, Capernaum, koawoa nimen pwoakdahlahng koawoa nehnloannge? Koawoa pirin jinoakekdihlahng nehn ehl!”
16 Jesus pel pwehng sohnpadahkkok, “Emen ma kin rong kamwai kin rong Ngoahi; a emen ma mwamwahlki kamwai kin mwamwahlki Ngoahi; a emen ma mwamwahlki Ngoahi kin mwamwahlki Ih ma kadardo Ngoahi.”
Japahldohn Irai Ijihjek Roahmenno
17 Sohnpadahk ijihjek roahmen pwurdo perperen koalik. Irai pwehng Jesus, “Maing, amai Koaun, ngen jaus kan kin pel peikkoang kamai nehn amai kin ruwoje irai ki Oadoammwen!”
18 A Jesus japoang irai, “Ngoahi kapang Jehsen kipla doahroar joarom jang nehnloannge.
19 Rong! Ngoahi ne kioang kamwai manman, pwa kamwai en alu pohn sinek apel scorpion kan apel powehdi manman in imwinsihsi ohroj, johpwa mehkij pirin koauwehla kamwai.
20 Doari, kamwai en joah perenki en ngen jaus kan arai peik oang kamwai, a kamwai en malaukihda oadoamwai kan ne insingdi nehnloannge.”
Jesus Malauda
21 Nehnnoar anjoauwo Jesus dirkihla peren koalik jang Ngen Joarwi, Ih pwa, “Joamoai, Koaun in nehnloannge apel jampah! Ngoahi kalahnganki oang koawoa oamw kajalehioang irai ma joaloalkoang kan dahkij ma Koawoa oakihjang irai ma loalkoang apel koahiok in jampah kan. Maing Joamoai, ioar me ma Koawoa kupwurki en wiawi.
22 “Joamoai ne kioang Ngoahi me ohroj. Johpwa emen kidal inje Nihn Koahsso pwa Jahm oar doari. Pel joh emen ma kidal inje Jahm, pwa Nihn Koahsso oar doari, apel irai kan ma Nihn Koahsso pilda en kajalehioang.”
23 Jesus wud jipwoallahng sohnpadahkkok, pwehnglahng irai in rir, “Meid pai kamwai kapkapang mehkan ma kamwai kapang apkas!
24 Ngoahi en pwehng kamwai pwa joukohp dir apel nahmwarki dir nimen kapang dahkij kamwai kapang, a irai johkak, apel rong mehkan ma kamwai rong, a irai johkak.”
Karajraj in Woalin Samaria Kadek men
25 Jounpadahk in Kojonned men indoa ipen Jesus apel jong in lidipi, idoakkoang Ih, “Jounpadahk, da ma ngoahi uhdahn wia pwa ngoahi en kak oaloahdi mour joahsuk?”
26 A Jesus japoang, “Dahkij Pukin Kojonneddo pwa? Imdoahr oamw kawoahwoa?”
27 Woallo japoangla, “ ‘Ipwilki Koaunno oamw Koahs ki oamw mohngiong unjek, ki ngenimwen unjek, ki oamw sihkei ohroj unjek apel ki oamw lamlam unjek,’ apel ‘Ipwilki mihn ipoamw doahroar oamw kin ipwilki pein koawoa.’ ”
28 Jesus pwa, “Koawoa pwung. Wia me, a koawoa pirin mour.”
29 A jounpadahk in Kojonneddo nimen kamehlele oang pein ih, ih idoak oang Jesus, “Inje mihn ipoai?”
30 Jesus japoang, “Armaj men indihlahjang Jerusalem oang Jericho; lollap nauna pwi pallanda ih kihjang ah likkoauwok poki ih oaroh pirin oar ken mehdi, irai ken inlahjang ih.
31 Jamwrou men allaluhdihla nehn allohr; a nehn ah kapangda woallo, ih dauluhl wud oaloap allo.
32 Pel doahroar Levi men alu wijahu kapang woallo, ih pel dauluhlla jang alu oaloap allo.
33 A woalin Samaria men ma wia ah jeiloak wudla wijahu, nehn ah kapang armajjo nehn kapehdin poakehla.
34 Ih ken sohla ipoa, widekihdi le apel wain pohn wijahk ma ohla, ih kidimpene. Ih ken kihdahng pohn warahu wahlahng nehn umwen keiru oau apwali ih wijahu.
35 Rehnwa mwerin ih oaloa mwani silper riau kioang koaun in umwen keiruwo pwehng ih, ‘Apwali ih mwehu, a nehn oai pirin pwurdo ngoahi nen dupuk oang koawoa dahkij ma koawoa apwali ki ih.’ ”
36 Jesus kadoarihla pwehng ih, “Inje ma koawoa leme nehn pwungen irai jilmenne ma wia mihn ipen woallo ma lohdihoang lollap naunahk?”
37 A ih japoang, “Woallo ma kadek oang ih.”
Jesus pwehng ih, “Alwe, koawoa wiahda doahroar.”
Jesus Pas ipen Martha apel Mary
38 Nehn en Jesus apel Nah sohnpadahkkok allaluhla irai lel nehn koaujoan kij ma lihmen, oadoa Martha, kajamwo Ih oang nehn umwahu.
39 Rien Martha lihmen oadoa Mary ma mwindi ipen ehn Koaunno rongrongrong Ah padahk kan.
40 A Martha pwunodkihda doadoahkkok ohroj ma ih pirin wia ih indoa pwa, “Koaun, koawoa en kapang doahroar en rioai jerpeinne kihdoa doadoahk ohroj ngoahi en wia? Pwehng ih en indoa jeuweje ngoahi!”
41 A Koaunno japoang, “Martha, Martha, koawoa pwunodkihda apel joahpijekkihla joang dihrdir,
42 a joang oau oar ma anahn. Mary ne pilda me pwungwa, doari jehpirin liklikjang ih.”