9
Jesus Kadarpijoang Sohnpadahk Eijek Roahmenno
1 Jesus panginpene sohnpadahk eijek roahmenno kioang arai manman apel sihkei in kajroahjang ngen jaus ohroj apel manman in kasihkeida johmwehu kan.
2 Ih kadar pijoang irai pwa en kapahrakki doahroar Wein Koahs apel kemwehuwihla johmwehu kan.
3 Ih pel pwehng irai, “Kamwai en johpwa wa mehkij nehn jeiloak oauwe: joh jokon, joh pehk mihn kioang mwinge loaloa, joh pilahwa, joh mwani pel joh ngalngal.
4 Wijahkij ma irai pirin kajamwo kamwai, kamwai minminehr iparai ma kajamwo kamwai nehn umwaraihok, oaroh kamwai injang wijahu.
5 A wijahkij ma armaj kan joah nimen kajamwo kamwai, kamwai diljang wijahu jiped jang pwirejpar in pwoalkoamwai, kapoahm oau me oang irai.”
6 Sohnpadahkkok aluhpijoang, aluhjili nehn koaujoan kan ohroj, kapkapahrakki doahroar Rongmwehu apel kemwkemwehuwihla johmwehu kan wija ohroj.
Nahmwarki Herod Pwonpwonda
7 Herod, koaun in Galilee rongda mehkan ohroj ma ne wiawi; ih ken pwonpwon kihda, pwa epwi pwa John jounpoapdaij ne mourda;
8 A epwi pwa Elijah ma pwokda, a epwi pwa emen joukohp in mehjjok ma ne pwuroahng mourda.
9 Herod pwa, “Ngoahi ne poaloahjang moangoan John, a inje woal mene ma ngoahi rongrongrong doahroar Ih?” Ih jongjong in pwa en kapang Jesus.
Jesus Kamwinge Woal Limekid
10 Woaroakkok japahldo pwehng Jesus me ohroj ma irai ne wiahda. Jesus ukla irai pwa en kalahpwukla wijahkij nehn kahnihmw Bethsaida.
11 Nehn en pokonno rongda me, ihr kaujla Ih. Jesus kajamwo ihr pwehng ihr doahroar Wein Koahs, apel kemwehuwihla ihrrok ma anahne jauwaj.
12 Anjoau ma joauwo en ken dilla, sohnpadahk eijek roahmenno indoa ipen Jesus pwehng, “Maing, koawoa en ken kadarpijoang pokonne pwa irai en inlahng rapahki kanahr mwinge apel wijahn ahr moair nehn koaujoan kan. Pwa japwsoahn oau me.”
13 A Jesus pwehnglahng irai, “Kamwai kapwa pein kamwinge irai.”
Irai pwa, “Lopwonin pilahwa limoau apel mwumw roahmen ma mine ipamai. Koawoa mwehuki kamai en inla dupukda mwinge oang pokon koalik oauwe?”
14 (Dapwa woal limekid ma pwili mine wijahu.)
Jesus pwehng sohnpadahkkok, “Kamwai wiahda pwihn pwi wad limeijek, pwehng ihr en mwindi.”
15 Sohnpadahkkok ken wiahda da ma Ih pwehng irai en wia.
16 Jesus pwoakda lopwonin pilahwa limoauwo apel mwumw roahmenno, jardahla nehnloannge kapingkalahngannoang Koahs, sipwangpijoang, kioang Nah sohnpadahkkok pwa irai en nehk oang pokonno.
17 Armaj ohroj mwingeroh moad, sohnpadahkkok dowihda luhwen mwingehk wiahda kiam eijek riau.
En Peter Kajalehda doahroar Christ
18 Oau rehn Jesus kalahpwukla kapkap, sohnpadahkkok indoa ipoa. Ih idoak oang irai, “Inje ma pokonne kin pwahki Ngoahi?”
19 A irai japoang, “Epwi kin pwa John jounpoapdaij, epwi pwa Elijah, epwi pwa koawoa emen joukohp in mehjjok ma ne iejda.”
20 A Ih pwa, “A kamwai, inje ma kamwai pwahki Ngoahi?”
Peter japoangla, “Koawoa ioar nihn Koahs Messiah.”
Jesus kohpda doahroar Ah pirin Koaloklok apel Mehdi
21 Jesus kainoapwihdi irai en johpwa pwehng emen mehkije.
22 Ih pel pwehng irai, “Nihn‑Armaj uhdahn pirin loklok koalik, jekenkenla pehn koaunnok, jamwrou laplappok apel jounpadahk in Kojonneddok. Ih pirin kojkojdi, a mwerin rehn jiluh Ih pirin iejda.”
23 A Ih pel pwehng irai ohroj, “Ma emen nimen indoa pwilihla Ngoahi, ih uhdahn moalkoahla pein ih, wahda ah lohpwu rehn ohroj, kauj Ngoahi.
24 Pwa emen ma nimen doaroahla ah mour ih pirin luhj jang; a emen ma mihndahkihla ah mour ki Ngoahi, ih pirin mourla.
25 Nehn mine kaspoan oamw en wihnkihda jampah pwon, a mwuhr koawoa joaloangla ke lohdi? Joh douluhl!
26 Ma emen pirin mehkki Ngoahi apel Oai padahk, ioar Nihn‑Armaj pirin pel mehkki ih nehn Ah pirin indoahki lingin Ih apel Jamahu pwilihki Nah sohnloang joarwi kan.
27 Ngoahi en kamehlelehng kamwai pwa epwi kamwai ma minmine me jehpirin mehdi oaroh irai pwili kapang Wein Koahs.”
Jesus Lingla
28 Wihk oau mwerin en Jesus pwahla mehpwiai, ih ukda Peter, John apel James, indahla pohn dol pwa en kapkap.
29 Nehn Ah kapkap, mwomwen mijoa wikla, Ah likkoauwok korohro rapwrapwoalla.
30 Anjoauwohr, woal roahmen pwokda ipoa siksikesik oang Ih; ioar ira Moses apel Elijah.
31 Ira pwokdo nehn ling joarwi, pwehpwehpwehng Jesus doahroar Ah pirin kapwaihahda kahrpoan en Koahs kadardo en mehdi nehn Jerusalem.
32 Nehn en mehpwiai wihwiawi, Peter apel pwilihoa kan moair koalikla; a nehn arai pwohrda irai kapangda doahroar lingin Jesus apel woal roahmenno ma minmine ipoa.
33 Nehn en woal roahmenno injang Jesus, Peter pwehng Ih, “Maing oai Koaun inenin mwehu asai minmine wijahkije. Kamai pirin wiahda umpwal jiluh, oau oang koawoa, oau oang Moses apel oau oang Elijah.” (Ih johpwa uhdahn kidal pwa dahkij ih pwahpwahpwa.)
34 Nehn ah siksikoa mehpwiai koasoau oau pwokda pwaindi irai, sohnpadahkkok ken majpwehkda nehn arai minehla pehn rir in koasoauwo.
35 Ngil oau indoa jang nehn koasoauwo pwa, “Ioar noai jermwein kajampwalwa ma Ngoahi pilda; kamwai rong Ih!”
36 Nehn en ngillo johla, Jesus kalahpwuk oar mine wijahu. Sohnpadahkkok johpwa pwehng emen armaj doahroar mehu ma irai kapang.
Jesus Kemwehuwihla Jermwein men ma Ngen Jaus Dilingla
37 Rehnwahr mwerin, irai indihdo jang pohn dollo, pokon koalik oau suhwoang Jesus.
38 Woal men rahula jang nehn pokonno, “Maing Jounpadahk, ngoahi poaki koawoa en indoa kapang noai jermweinne — noai jermwein wahr doari!
39 Koawoa en kapang, nehn en ngen jausso ah kin dilingla ih, ih kin pwururdahr rahrahu, kipdihoang nehn pwirej sasjili, pwuroar kin koarjang nehn oawoa, ngenno kin koauwehla kilin apel johpwa nimen diljang ipoa!
40 Ngoahi ne poaki ipen nihmw sohnpadahkkok en kauj jang ngen jausso ipoa, a irai johkak.”
41 Jesus japoang, “Ia woahr amwai joah kamehlele apel japwung! Ia woaroai in Oai pirin minmine ipamwai? Ia woaroai in Oai pirin kanangmahng kamwai?” Ih pwehng woallo, “Ukdo nihmw jermweinnen me!”
42 Nehn en jermweinno allaluhdo ipen Jesus ngen jausso peiddi ih oang nehn pwirej, ih ken roarroarroar. Jesus kajroahla ngen jausso, ih ken kemwehuwihla jermweinno, ih kioang ipen jamahu.
43 Armaj kan ohroj ken pwuriamweikihla rojon apel manman koalik in Koahs oauwe.
Jesus Pwuroahng Sikoahda doahroar Ah pirin Mehdi
Armajjok kahjikkoar uhdihjang ahr pwurpwuriamweiki da Jesus wihwia, a Ih pwehng Nah sohnpadahkkok,
44 “Kamwai joah moalkoahla da ma Ngoahi pirin pwehng kamwai: Nihn‑Armaj pirin likliklahng pehn manman in armaj.”
45 A sohnpadahkkok johpwa kidal woahwoahn Ah lal kan. Ih kajoaloange jang irai pwa irai en joah woahwoahki, a irai mijikin idoak woahwoahn mehkije.
Inje ma Keiou Laplap?
46 Sohnpadahkkok akmaikihda pwa inje ma keiou laplap nehn pwungarai.
47 Jesus kidalda arai lamlam, ioar mehwa Ih oaloa jeri men, kauhda ipoa,
48 pwehng sohnpadahkkok, “Inje ma kajamwo jeri mene in Oadoaioa, kin kajamwo Ngoahi apel kajamwo Ih ma kadardo Ngoahi. Pwa ih ma keiou jekenken ipamwai ohroj, ioar ih ma keiou laplap.”
Emen Ma Johkin Uhwoang Kamwai, Ih kin uhpali Kamwai
49 John pwa, “Maing, kamai kapang emen ma pwili kaujjang ngen jaus kan in oadoammwen, kamai ken inoapwihdi pwa ih johkin pwili amai pwihnno.”
50 Jesus japoang, pwehng ih apel ohroj sohnpadahkkok, “Kamwai en joah kainoapwihdi, pwa emen ma johkin uhwoang kamwai, ioar kin uhpali kamwai.”
Koujapw oau nehn Samaria kia Kajamwo Jesus
51 Nehn anjoauwo ma Jesus pirin injang jampah indahla nehnloannge ne koaroando, Ih lemehda Ih en indahla Jerusalem.
52 Ih kadarla epwi jounwijik pakair mwohn Ih pwa irai en inla onopda me ohroj nehn koujappwo nehn Samaria.
53 A, sohn koujappwo joah nimen kajamwo, pwa janjal Ih allaluhdahlahng Jerusalem.
54 Sohnpadahk James apel John nehn ara kidalda me, ira pwehng Jesus, “Koaun, koawoa mwehuki kama en pwa oai en mwoardi jang nehnloannge koauwehla irai?”
55 Jesus pwurlahng ira woarwoarihda.
56 Jesus apel Nah sohnpadahkkok ken dauluhllahng nehn oau koujapw sohrohr.
Ihr Ma kin Mwomwehda Pwili Jesus
57 Nehn irai allaluhla nehn allo, woal men pwehng Jesus, “Ngoahi pirin pwili koawoa wija ohroj ma koawoa pirin inla.”
58 A Jesus pwehnglahng ih, “Fox kan mine arai pwoar apel mahnsang mine arai paj, a Nihn‑Armaj joh wija Ih en ilwe koammoal.”
59 Ih pwehng emen woal, “Pwili Ngoahi.”
A woallo pwa, “Maing, a mwowoa mweidoahng ngoahi en japahlla jaripdi joamoaiho.”
60 Jesus japoangla, “Mweidoahng irai kan ma ne mehdi en pein jaripdi arai mehdi kan. A koawoa alwe pwili kalohkihjili Wein Koahs.”
61 Emen pel pwa, “Maing, ngoahi pirin pwilihla koawoa, a koawoa en mweidoahng ngoahi mwowoa en inla koamwurmwur oang oai peneineihok.”
62 Jesus japoang, pwehng ih, “Emen ma sapkihda doadoahk kajampwal oau, a pwurla mwerin, ih johpwa warroang Wein Koahs.”