24
19
1 Wal sananŋan na, motom berber pizin pepe,
tikam lelem pepe, mi gabgaaba zin pepe.
2 Pa wal ta kembei lelen be tikamam zaaba pizin tomtom.
Gorgori tiluplup zin mi timburmbuuru pizin tomtom.
20
3 Sombe ŋgar kiti ipet mi takam ŋgar ambaiŋana ma iwe lende, nako tuurpe mbulu kiti mi mboti kiti.
Naso itiŋan wal kiti tombot ambai. Ko kembei topo lende ruumu ambaiŋana be tombot lela.
4 Pa ŋgar ta iwe zaala piti be ruumu kiti bok pa koroŋ ambaimbaiŋan mi ndabokbokŋan matakiŋa ta kan kadon bibip i.
21
5 Tomtom ta le ŋgar ambaiŋana na, ni ilip pizin wal ta len mburan biibi na.
Gorgori wal ŋgarŋan mburan izze.
6 Iti sombe lelende be takam malmal, na turu zin wal ŋgarŋan be tikam peeze piti mi tiso iti pa malmal ka zaala.
Pa bela wal boozo tiuulu iti pa ŋgar kizin, tona tilip pa kanda koi bizin.
22
7 Wal kankaanaŋan ta tizorzooro na, tikam kinkiini pa ŋgar ambaiŋana. Mi tirao som.
Tana sombe tomtom tilup zin pa sua, na wal kankaanaŋan len sua sa som. Timaane men.
23
8 Tomtom ta so gorgori irru zaala be ikam mbulu sananŋana, nako tipaati be pakaamŋana katuunu.
9 Wal kankaanaŋan ta tizorzooro na, sombe tirru zaala pa koroŋ sa, na ŋgar kizin ilala pa zaala sananŋan men.
Mi zin wal ta tipakurkur zitun mi tirepilpiili ŋgar ambaiŋana na, tomtom lelen pizin ri sa som kat.
24
10 Sombe nu mbotmbot la pataŋana sa leleene mi mburom imap, na nu tomtom ŋonoono som.
Pa zin wal ta tomtom ŋonoono na, timendernder mbolŋana mi tirao be tibaada pataŋana.
25
11 Zin wal ta len uunu sa som, mi kan koi bizin tikam zin sorok ma tila be tipun zin ma timeete na, re be tatke zin la kan koi bizin naman.
Mi zin wal ta titoto zaala ki meeteŋana mi sursur ma tila na, karau men la mi kamke zin.
12 Kokena pakaam ma so: “Wai, mi mbulu ta iwedet pizin na, niam ti amute som.”
Pa Anutu, ni irre iti tomtom lelende ma imap. Tana mbulu ta kam na, ni iute kek.
Pa Ni ta imborro u na, ikankaana pu som.
Mi ni kola iur kadoono piti tomtom tataŋa ikot mbulu kiti kiti.
26
13 O lutuŋ, win bigil suruunu. Pa ina koroŋ ambaiŋana.
Sombe win, na inamut kat.
14 Mi ŋgar ambaiŋana ta kembena. Nio leleŋ be nu ute kat ta kembei: Sombe kam ma iwe lem, nako yamaana ambai.
Pa sombe ndeeŋe ŋgar ambaiŋana, na kaimer ko mbot ambai.
Swom ko irao imap karau na som. Tana koroŋ ambaiŋana ta urur motom pa i, nako mbotmbot mi re kat ka ŋonoono.
27
15 Nu tomtom sananŋom, zaŋzaaŋa zin wal ndeeŋeŋan su ruumu kizin pepe.
Mi petepaala ruumu kizin mi kem koroŋ kizin pepe.
16 Pa sombe tomtom ndeeŋeŋana sa itop, nako imaŋga mini. Ni irao itop pa lamata mi ru. Mi toŋgo. Ni kola imaŋga mini.
Mi zin wal sananŋan na som. Sombe pataŋana sa ikam zin ma tisu, na tisu timbot pataaŋa.
28
17 Kom koi sa, sombe pataŋana ikami, na menmeenu pepe.
Mi sombe itop, na nim se pepe.
18 Kokena Yooba ire mbulu ku tana,
to kete malmalŋana kini ikam kat kom koi tana som.
29
19 Zin wal sananŋan na, tipas ketem pepe, mi motom berber pizin pepe.
Kokena tikam ma ŋgar ku isaana.
20 Pa kaimer zin ko irao timbot ambai na som.
Anutu ko iyembut swon ma timeete karau men, kembei lam ta tupunmeete na.
30
21 O lutuŋ, mototo Yooba ziru king, mi leŋleŋ la kalŋan.
Mi zin wal ta so tizorzooro la Yooba ziru king kalŋan, na mbotmbot molo pizin.
22 Pa molo som to, wal ru tana tipamorsop zin wal zorzooroŋan pa pataŋana sa.
Mi zaala tabe tipasaana zin pa i, ina tuute som.
Sua pakan kizin wal ŋgarŋan
23 Iŋgi sua pakan kizin wal ta len ŋgar ambaiŋana na.
Sombe iti lende uraata be tuurpe pataŋana kizin tomtom, na titiiri kat sua kizin. Kokena talae sorok kizin wal pakan. Pa ina mbulu ambai som.
24 Biibi ta so itirtiiri kat sua som, mi iso pizin wal ta tikamam ŋoobo mbulu na ta kembei: “Nio aŋre kembei leyom uunu sa isaana som.”
Na biibi ta kembei, iwal biibi ko keten malmal pini, mi tigiibi sua sananŋana pini.
25 Mi zin bibip ta tiurur kat kadoono pizin wal sananŋan ma ikot mbulu kizin,
inako timbot ambai, mi kampeŋana ki Anutu imbotmbot se kizin.
26 Sombe tomtom sa iso kat sua pu,
ina iswe i kembei ni torom ŋonoono mi iurur kat leleene pu.
27 Paaza lem koroŋ, kam uraata pa mokleene ma imap, mi po lem ruumu, mana woolo.
Naso niomŋan wal ku kombot ambai.
28 Sombe tipamender tomtom sa, na ŋgal sorok sua pini pepe,
mi kwom pakaam pepe.
29 Re: Kokena nu so ta kembei: “A buri! Mbulu ta ni ikam pio, ta iŋgi be kadoono aŋpokot.
Nio ko aŋkam mbulu raraate men pini, kembei ta ni ikam pio.” Na mbulu ta kembei, kam pepe.
Mbulu kizin wal maolŋan
30 Aigule ta na, nio aŋwwa ma aŋla mi aŋre la pa tomtom ta mokleene mi baen lene kini.
Tomtom tana, ni maolŋana mi ŋgar somŋana.
31 Worwooro matanmatanŋan mi mbutmbuutu sananŋan ise pa mokleene kini mi ilol ma imap.
Mi siiri ta iliu lele kini tana na, borok su lene lup.
32 To aŋkam ŋgar pa mbulu ta aŋre na,
mi ŋgar tio ipet.
33 Iti sombe namanda mburanda pa uraata som,
mi tuurur matanda ri, tekenene lende ri, tombomboorende ri,
34 na molo som, to tusu ma tombot ŋoobo kat.
Koroŋ kiti ko imap kat, kembei tomtom kuumbuŋana sa iyo lup ma ila ne.