8
1 इस्तिपनिन हव्कतोर अस्के सोलु वने पूरा संग आतोग़.
सोलु विस्वसिरा मुडुन तिपल कीस्तोग़
इस्तिपनिन हव्कतापया अदे दिया, येरुसलेम सहरतगा येसुना विस्वसिरा मुडुन पकाय तिपल कीया बोटटोर. अदिह्क बळयिरिन विळ्सिसि, सबे विस्वसिर येरुसलेम सहरताहि वितिसि पूरा यहुदा पटटे, सामरिया पटटे, बिरोबटो आतोर.
2 देवुळतुन पकाय माळवालोर बोर मतोर, ओरु इस्तिपनिना सेत्तातुन गुमयातगा ओस गति कीतोर, अस्के ओर पकाय जोरते अळतोर.
3 अद तूकने सोलु बाताल कींदोग़ इतेके, विस्वसिरा मुडुन बूळे कीयलाहि लोह्क-लोह्क ओळियिसि विस्वस केवालोर आस्क-कोय्तोरिन पोसि जेलतगा वाट वेहन्दोग़.
बेसतल कबुर सामरिया पटटे पोकुर कीस्तोर
4 पया बिरोबटो आतोर मन्कलोर येसुना कबुरतुन वेल्लाय पोकुर कीसोर तिरियतोर.
5 अद्रमे मुने आचतोर एळवुर सेवकिरग्डाहि पिलिप इनवाल मतोग़, वेग़ वने सामरिया पटटा उंद सहरतगा अनजि, येसुये देवुळ लोहतोग़ किर्स्तु आंदोग़ इनजि ओना कबुरतुन पोकुर कीतोग़.
6-8 पोकुर कीसोरे देवुळताङ बामनाह लेह्काडाङ सीनाङ तोहन्दोग़. देयह्क पोस मतोर वेल्लाटोर लोकुरिन देवुळि पिलिपिना कयदे बेस कीता. अव देयह्क पकाय जोरते केयसोर ओरग्डाह पेसताङ, अद्रमे कय्क-काल्क वावोर, ताक पग़वोर वेल्लाटोर मन्कलोर वने बेस आतोर. अविस्किन ऊळिसि अद सहरतोर लोकुर पकाय गिर्दा आसि पिलिप वेहतनाङ पोल्लोङ बेस केंजिदुर.
9 इंजेके अदे सहरतगा पूजर गूनिङ केवाल सिमोन पेदिरतोग़ मन्कल मतोग़. ओग़ तनाङ गूनिने सामरिया पटटोरिन पकाय बामिह कीसि, ननाय बेरोग़ गूनयानन इनजोर वेहचोर तिरियिंदोग़.
10 वेल्लाटोरे उड्लोर-बेरोर ओग़ वेहतनव पोल्लोन बेस केंजिंदुर, ओसो “देवुळता बेरा लावतोग़ इतेक वेग़े,” इनजोर सबेटोर ओन इंदुर.
11 ओग़ वेल्लाङे वर्साङ आनाहि तनाङ गूनिने, मन्कलोर बामनाह लेह्काडाङ कबस्क कींदोग़, अदिनेनाह्क कतमतोर लोकुर ओना पोल्लो बेस केंजिंदुर.
12 मति पिलिप अगा अनजि देवुळि मन्कना जीवातगा राजेम कीयनद बेसता कबुरतुन, ओसो येसुये देवुळ लोहतोग़ पिसिह केवाल किर्स्तु आंदोग़ इनजोर वेहता बोटटोग़. अद पोल्लोतुन केंजिस विस्वस कीतोरु, आस्क-कोय्तोर येसुना पेदिरते एग़ मीया बोटटोर.
13 पया सिमोन वने विस्वस कीसि येसुना पेदिरते एग़ मीतोग़. पिलिप देवुळता लावते बेराङ-बेराङ डीसाताङ कबस्क कींदोग़, अव कबस्किन ऊळिसि सिमोन बामिंदोग़, अदिनेनाह्क ओग़ पिलिपिनाय संगे मंदोग़.
सामरिया पटटोर विस्वसिरगा पवित्र जीवा रेगिह्ता
14 सामरिया पटटोर मन्कलोर देवुळता पोल्लोतुन विस्वस कीतोर इनजोर येरुसलेमते मतोर बळयिर केंतोर. केंजिसि पत्रु, योहन, वेर इर्वुर बळयिरिन सामरिया पटटे लोहतोर.
15-16 अग्डोर विस्वसिर येसुसामिना पेदिरते एग़ मीस मतोर, मति देवुळता पवित्र जीवा ओरा पोग़ोन उदवाय मता. अदिह्क पत्रु, योहन, ओरगा अनजि सबे विस्वसिरा पोग़ोन पवित्र जीवा उदि इनजोर ओरेनाह्क देवुळतुन अर्जि कीतोर.
17 पया ओर विस्वसिरा पोग़ोन तमाङ कय्क तासिंदुर, अस्के पवित्र जीवा विस्वसिरा पोग़ोन उदिंदु.
18 वेर बळयिर विस्वसिरा पोग़ोन तमाङ कय्किन तासतस्के पवित्र जीवा ओरा पोग़ोन उदनदिन सिमोन ऊळतोग़. ऊळिसि ओरगा कोताङ तचि,
19 “नना वने बोनाय पोग़ोन नावा कय तासतेके, ओना पोग़ोन पवित्र जीवा उदना इनजोर इद नाक अदिकर ईम्ह्टु,” इतोग़.
20 अस्के पत्रु ओन इतोग़, “नीवाङ कोताङ नीवाय संगे बूळेम आयिङ! देवुळि पुनेम ईयनदिनु, कोताने असकन इनजोर विचर कीतिन अय?
21 नीवा बुदि बेस इले इनजोर देवुळि ऊळता. अदिनेनाह्क ताना सेवाते निमा मावा तोळ आया पग़विन, मयगा कलिय पग़विन.
22-23 नीवा जीवा कर्वनदिन, ओसो निमा पापमतगा एग़्किस मनदनदिन ऊळिह्नन, अदिह्क देवुळतुह्क विचर वावद अग़दाहि मलसि तान पार्तना कीम, अस्के इद्रमता नीवा पापि विचरतुन देवुळि मापि कीतेके कीयग़ा,” इनजोर इतोग़.
24 इतस्के, “मीट इतद गोसा नावा पोग़ोन वामाकि इनजोर नयेनाह्क देवुळतुन मीटे पार्तना कीम्ह्टु,” इनजोर वेग़ पत्रुनु, योहनिन इतोग़.
25 अद्रमे पत्रु, योहन अगा किर्स्तुना पोल्लोतुन पोकुर कीसि, ओग़ बाताल-बाताल कीतोग़, अद कबळता साक्सि ईतोर. साक्सि ईसि, येरुसलेम सहरते मल्स दायलाह आतोर. अनेके सामरियातोराङ वेल्लाङे नाह्कनगा येसुना कबुरतुन पोकुर कीसोर-कीसोर अतोर.
पिलिप कूस देसेमतोग़ मन्त्रिह्क देवुळता पोल्लो वेहतह्तोग़
26 पया बेद्रम आता इतेके, देवुळता देवतुलि पिलिपिनगा वासि इद्रम इता, “निमा दक्सिन बाजेतेके पेसिसि, येरुसलेम सहरताहि गाजा इनदनद सहरतेक दायनद अग़ पोस अन,” इता. (अद अग़ि पेळ्ह्कल बूमतुह्क दास्ता.)
27 इतस्के पिलिप दायह्पा, ऊळाट कूस इनदनद देसेमतोग़ ओर्वोग़ मन्कल वने अदे अग़दुह्क अनजोर मतोग़. ओग़ मन्कल बाय्लाल मनजि, कूस देसेमता कन्दाके पेदिरतद रानिना मंत्रि आंदोग़, ताना राजेमताङ कोतान ऊळेवळे केवाल आंदोग़. ओग़ देवुळतुन मोळ्कलाहि येरुसलेम अनजि,
28 तमा देसेम मल्स अनजोर मतोग़. ओग़ तना कोडागाडातगा उदिसि देवुळता कबुरतोग़ यसयाल इनवाल रासतद पुस्तकतुन अर्वसोर अनजोर मतोग़.
29 अस्के देवुळता जीवा पिलिपिन, “निमा अगा अनजि अद कोडागाडाता संगे अन,” इता.
30 अस्के ओग़ अद कोडागाडातगा एवनह विततोग़, वितिसि कूस देसेमतोग़ मन्कल देवुळता कबुरतोग़ यसयाना पुस्तकतुन अर्वनदिन केंतोग़. केंजिसि, “निमा अर्विह्निन अद तेळिह्ताया तेळियोया?” इनजोर ताल्ह्कतोग़.
31 अस्के मंत्रि, “बोग़ाय तेळियिह कीस वेहवालेवा नाक बेद्रम तेळियग़ा? वाय निमा वने नावा संगे कोडागाडातगा उदा,” इनजोर पिलिपिन इतोग़.
32 ओग़ मंत्रि देवुळता सास्त्रमतगा इद वचन अर्विन्दोग़ इतेके,
“अस्कलाह ओयनद गोरेता लेह्का,
अहे केल्क कोग़ियवाल कोग़ियिह्पा, केमेन निच मनदनद गोरेपियोता लेह्का,
देवुळता सेवक केमेन मतोग़, बाताले इनोग़.
33 ओना कदर रेहनेके बोग़े ओनेनाह्क नेयम कीस एवोग़.
ओर ओना जीवा तिताह्कु,
ओना जालपिलता पोल्लोय इले,”
इनजोर रासिस मता.
34 पया ओग़ मंत्रि इद पोल्लोतुन अर्विसि पिलिपिन ताल्ह्कतोग़, “देवुळता कबुरतोग़ बोना पोल्लोतुन इगा रासतोग़? तनाय पोल्लोतुना? बार बोग़ दुस्रोना पोल्लोतुना? अले नाक वेहा,” इतोग़.
35 अस्के पिलिपि, मंत्रि अर्वसोर मतद पोल्लोतेनाह सुरु कीसि येसुना बेसतल कबुरतुन तेळियिह कीस वेहतोग़.
36 पया वेहचोर वेहचोर उंद वेच्चातगा एवतोर, एवतस्के मंत्रि इतोग़, “इद ऊळा, एग़ मन्ह्ता, इगा नाक येसुना पेदिरते एग़ मीयलाह बेस आयो आयग़ाया?” इनजोर इतोग़.
37 (इतस्के पिलिपि, “निमा पूरा जीवाताहि येसु किर्स्तुन विस्वस कीतेके नना नीक एग़ मीहतकन,” इतोग़. पया मंत्रि, “इंगो, येसु किर्स्तु देवुळता मग़ि इनजोर विस्वस कीय्ह्नन,” इतोग़.)
38 पया कोडागाडातुन अगान निल्पिह कीया वेहतोग़. निल्पिह कीसि पिलिप, ओग़ मंत्रि, इर्वुर आसि एतगा नेङतोर. अस्के पिलिप ओन येसुना पेदिरते एग़ मीहतोग़.
39 पया ओर एतग्डाहि पेसतस्के, देवुळता जीवा पिलिपिन मायपिह कीस अग्डाहि ओता. पया मन्त्रिह्क ओग़ दिसोग़, अस्के देवुळि नाक पिसिह कीता इनजोर बेस गिर्दा आसि ओग़ मंत्रि अतोग़.
40 पया देवुळता जीवा पिलिपिन असदोद इनदनद सहरतगा एवसिह कीसीता. ओग़ अग्डाहि केसरिया इनदनद सहरतके दायह्पा अग़ कचुल मंदनव सबे नाह्कने येसुना बेसता कबुरतुन पोकुर कीसोर अतोग़.