गलाति पटटोर विस्वसिरेनाह्कु, किर्स्तुना बळयि पोलु लोहतद सीटि
इद सीटटुन रासवाल येसुना बळयि पोलु आंदोग़. पोलु इद सीटटुन, गलाति पटटोर विस्वसिरिह्क रासतोग़. ओरगा वेल्लाटोर यहुदि आयवोर मतोर. इद सीटि बाराह्क रासतोग़ इतेके, अद तूकने जोल काग़्हवालोर यहुदिर, गलाति पटटोर विस्वसिरगा वातोर. वासि, तमाङ अडोङ (मोसा मुय्तोग़ वेहच मतपु, तमाङ मेंदुस्कने डायना रिवज कीयनदु, तिंडटाङ अडोङ, पोल्वा-पंडुमताङ अडोङ) माळलाह पोकुर कींदुर. माळवालेवा मीटु देवुळता मुनेह सेतेमतोरिर आया पग़विर इनजोर ओर इंदुर. अदिनेनाह्क पोलु यहुदि काग़्हवालोरा पोग़ोन ओङ आतोग़. ओसो गलातितोर विस्वसिर ओराङ केंजिस नमिस मतोर, इदिन केंजिसि पोलुह्क पका दुकम आता. अदिनेनाह्क पोलु गलातितोरिन तेळियिह कीयलाह, इद सीटि रासतोग़.
पोलु सीटटगा इह इन्ह्तोग़ इतेके, नना पोकुर कीयनद कबुरिये, बेसता कबुर आंदु; इद कबुर नाकु मन्कना मेटे दोर्को मति, किर्स्तुये नाक तेन पुन्पिह कीतोग़. ओसो येसु किर्स्तुन विस्वस केवालोरु, मोसानाङ अडोना कय इळ्न इलेर; अव अडोङ सिरप मन्कना पापमतुने तोहतह्ताङ. मति मन्कलोर येसु किर्स्तुन विस्वस कीतेकेन, सेतेमतोर आस्तोर. येसुना मेटेने ओर विस्वसिर विस्वसते निच मन्ह्तोर इनजोर, पोलु इद सीटटगा वेहतह्तोग़. ओसो देवुळता जीवा माक ताकिह कीतपु, माट ताना पेग़्के ताकना गावले, ओर्विह्क-ओर्वोग़ जीवा कीसि सेवा-साकुर कीयना गावले.
1
1 नना पोलुनन, येसु किर्स्तुना बळयिनन, ननाये इद सीटि रासवानन. नना मन्कना कयदे बळयिनन आयोन, ओसो मन्कना मेटे वने बळयिनन आयोन; मति येसु किर्स्तु, ओसो वेन हामुरताहि तेग़्किह कीतोग़ देवुळबाबाल, वेरे इर्वुर नाकु बळयि आयनोग़ इन्जि तासतोर.
2 मीट गलाति पटटे मनवालोर किर्स्तुना मुडोरिर, मीके इद सीटि रासिह्नन, इगा मनवालोर विस्वसिरा संगे ऐंगेन कलियिस, इद सीटि रासिस लोहतह्नन.
3 मावा देवुळबाबाल, ओसो मावा सामि येसु किर्स्तु, वेर इर्वुर मीकु देय्वा ईयिर, सुकम ईयिर.
4 येसु किर्स्तु मावा पापमता सिक्सा एचि, हव्कनागुटातगा तना जीवा ईतोग़ इन्जि, मीट पुतिर. माट इद दुनियाताङ लाग्वाङ विचर्कनाहि, लाग्वाङ कबस्कनाहि पिह्ट अरयना इन्जि, मावा देवुळबाबाना विचर मता. अदिनेनाह्क येसुसामि तना जीवा ईतोग़.
5 ओन्क सबेटोर अमेसा-अमेसातुह्क मान ईयिर.आमेन!
उंदिय बेसता कबुर आंदु
6 पया अचोन चट्पिट मीटु देवुळतुन पेग़्के कीतिर इतेके! बेद देवुळ मीकु किर्स्तुना दयाते मनदलाह केयता, ताना बेसता कबुरतुन पोहचि, बेदो दुस्राय अलगता कबुरतुन नमतिर अले!
7 अद कबुर इतेके बेसतल आयो मति, मीक लेसिह केवालोर बोर मन्ह्तोर, ओर तान बेसता कबुर इन्जि, किर्स्तुना सेतेमता कबुरतुन मिळ्हतलाह ऊळिह्तोर.
8 मति माट मीक काग़्हतद पोल्लोतुन विळ्सिसि, दुस्रा अलगता पोल्लो बोग़ाय मीक काग़्हतेके, देवुळ ओन बूळे कीयि! माट काग़्हतेक वने, पोग़ोटा देवतुल काग़्हतेक वने, अद्रमतोन देवुळि बूळे कीयि!
9 माट मुने मीक वेहच मतोम, इंजेक ओसो नना सीता कीसीय्ह्नन, बेस केंजाटु. मीट मुने नमतद बेसता कबुरतुन विळ्सिसि, अलगता कबुर मीक बोर वेहतह्तोर, ओरिन देवुळि बूळे कीयि.
10 बह इंजेके लोकुराहि मान दोर्कना इन्जि, नना ऊळिह्नना? बारा देवुळता देय्वा दोर्कना? बह मन्कलोरिन नना गिर्दा केवानन आय्ह्नना? मन्कलोरिन नना गिर्दा केवानन आस मतेके, किर्स्तुना कय इळ्न नना मनोन आवेनन.
पोलु वेहतद कबुर देवुळता आंदु
11 मावोरिर, बेस केंजाटु! बेद बेसता कबुरतुन नना मीक वेहच मतन, अद मन्कना बुदता आयो.
12 मन्कनग्डाहि नना इद कबुरतुन केंजोन, मन्कनग्डाहि नना कग़योन वने. मति नाकु येसु किर्स्तुये अदिन पुन्पिह कीतोग़.
13-14 (नाकु मन्कनग्डाहि इद बेसता कबुर दोर्को, मति किर्स्तुनग्डाहे दोर्कता इतेके,) यहुदि जाततोरगा नावा मुनेटा मनमुळता लोप्पा मीट केंजिस मतिर. नना अस्के देवुळता मुडुन पकाय कुळ्सा अंदन. ओरिन बूळे कीयलाह ओरा पेग़्के दल्गिस मंदन. मावा यहुदि रीतरिवजतुन माळलाहि, नावा ऐंगेटोरिह्काय वीळिस बेचोनो मुनेह मंदन. इतेके नावाङ मुनेतोर तादोर-बाबोर काग़्हतनाङ उतुर्क कग़यलाहि, नावा पकाय जिदि मंदु, इदिन मीट पुतिर.
15-16 पया बेद देवुळि तना देय्वाते नना पुटनामुनेन नाक आचता, आचिसि दुस्राङ-दुस्राङ देसेह्कनोरगा, ताना मग़ि येसु किर्स्तुना बेसता कबुर वेहतना इन्जि नाकु केयता, इदे देवुळि नाकु तना मग़िन पुन्पिह कीयलाह, विचर कीता इन्जि, मीट पुतिर. अस्के नना बोनगाने बुदिङ ताल्ह्कलाह अनोन;
17 अहे नाकाय मुने बळयिर आतोरिन कलियलाह, येरुसलेम सहरतके अनोन. मति दमिस्क सहरताहि अरब देसेमते अन्जि, अगा गळ्के बह मन्जि, दमिस्क सहरतके ओसो मल्स वातन.
18 ताना पया मूंड वर्साङ आनेके, पत्रुन कलियलाह नना येरुसलेमतके अन्जि, ओनगा पंद्रा दियाङ मतन.
19 दुस्रोर येसुनाङ बळयिरिन इतेके, नना ऊळोन मति, सिरप येसुना तमोग़ याकुबिये कलियतोग़.
20 देवुळता मुनेह किरिया कीस वेहतह्नन, नना बेव मीक रासतन, अवु जोल आयोङ, निटमताङे!
21 ताना पया नना सुरिया, किलिकिया, अव पटिनके अतन.
22 इंजेके नाकु यहुदा पटटे मनवालोर किर्स्तुना मुल बेस्केन कलियोर आसि, ओसो ओर नाक पुनोर वन आसि.
23 नाक पुनोर तेला मति, “बोग़ मुने माक विस्वसिरिन पका तिपल कींदोग़, येसुना कबुरतुन माय्पिह कीयलाह ऊळिंदोग़, अदे कबुरता पोकुर इंजेक ओग़ कीसोर मन्ह्तोग़!” इनजोर, नावा लोप्पा यहुदा पटटोर विस्वसिर केंजिंदुरे.
24 केंजिसि, नावा साक्सितुह्क देवुळतुन जोहर कींदुर.