2
मुनेतोर बळयिर पोलुन बळयि इनजोर मानेम आस्तोर
1 ताना पया चोव्दा वर्साङ आनेके, नावा ऐंगेटोग़ बार्नबसना संगे, नना ओसो येरुसलेमतके अतन, अस्के तीतुसिन वने माट पोस अतोम.
2 अगा देवुळिये नाक ओसीताह्कु नना अतन, अनजि अग्डोर विस्वसिरगा बोर मोदुल मन्कलोर मन्ह्तोर ओरगा अतन, दुस्राङ जातिनोरगा नना काग़्हतद बेसता कबुरतुन ओरिन ओर्के एग़िह कीस वेहतन. “निमा काग़्हतद कबुर देवुळतग्डाहे वाता,” इनजोर नाक इनदनुर बहे, अस्के नावा पूरा कह्टेम उगसे अनो आयग़ा इनजि नावा आसा मता.
3 मति नावा ऐंगेटोग़ तीतुस यहुदि आयवोग़ मतोग़ तेला मति, वेन इंका यहुदिरा डायना रिवज नोमलाह जबर्दस्ति केवोर.
4 इद पोल्लो बह पुटटा इतेके, अगा सोङ केवालोर जोल विस्वसिर वास मतोर. किर्स्तु येसु बेद्रम माकु यहुदिराङ अडोनग्डाहि विळ्सिह कीतोग़, ताना आय्डा गुंजलाहि ओर कुस्क्ने नेङिस मतोर. माटु ओरा पोल्लोतुन केंजिसि अव अडोने ओसो ताकना, इद्रमताये विचरते वातोर.
5 मति ओरा पोल्लोतुन माट मुर्तिय केंजोम! मीट येसुसामिना सेतेम कबुरतुन विळ्सनदायो इनजि ओरा पोल्लोतुन माट मुर्तिय केंजोम!
6 पया ओर मोदुल मन्कलोर इतेके — ओर मुनेताहि पेदल्क आंदुर, तान नना मुर्तिय सीता केवोन; अहे मोकम ऊळिसि देवुळि मन्कह्क कदर एवो. नना काग़्हतद बेसता कबुरतगा ओर बेदे पोल्लो मिळ्हतलाह वेहोर.
7 मति याकुब, पत्रु, योहन, वेर मुवुरिन येरुसलेमते येसुसामिना मुडगा मुक्यालोर इन्ह्तोर, वेर बाताल कीतोर? बेद्रम पत्रुनु देवुळि यहुदिरिह्क बेसता कबुर वेहतलाह अदिकर ईता, अद्रम नाकु यहुदि आयवोर दुस्राङ जातिनोरिह्क वेहतलाह अदिकर ईता इनजि वेर मुवुर ऊळतोर.
8 इतेके बेद देवुळि डायना रिवज माळवालोर यहुदिरगा तना बळयि आयलाह पत्रुह्क लाव ईता, अदे देवुळि दुस्राङ जातिनोरगा दायलाह नाक वने लाव ईता.
9 ओसो बेद्रमता देय्वा नाकु देवुळ ईता इनजि वेर मुवुर मुक्यालोर पुतोर. देवुळ नाकु इद्रमता अदिकर ईता, देय्वा ईता इनजि, वेर नाकु ओसो बार्नबसिनु गोत तोग़्ङिसि, मावा संगे करल कीतोर. इतेके माट इर्वोम दुस्राङ जातिनोरगा सेवा कीयना, ओर बार यहुदिरगा सेवा कीयना इनजोरे.
10 “मीट यहुदि आयवोरके अन्ह्टु, मति मावोर गरिब यहुदिरिन मात्रम सीता कीम्ह्टु,” इनजि ओर इतोर. अद्रमे कीयलाह नाक वने गिर्दा मंदु. इद्रम ओर मुवुर मुक्यालोर नाक करल कीतोर.
पोलु पत्रुन तेर्हतह्तोग़
11 मनेक मनेक पया पत्रु अंताकिया सहरते वातोग़. ओग़ अगा बेचोको दियाङ मनेके बेरा उंद तप कीतोग़, ओग़ तपिस मताह्कु, ओना मोकम मुनेह नना ओना अडम वळ्ह्कतन.
12 इद बेद्रम आता इतेके, अस्के येरुसलेम सहरताहि याकुब लोहतोर उय्तुर मन्कलोर वास मतोर. ओर वायनामुने पत्रु यहुदि आयवोर विस्वसिरा बतते उदिस गाटो तिंदोग़. मति ओर येरुसलेमतोर वातापया ओग़ यहुदि आयवोरिन जेक तासलाह बोटटोग़, ओरा संगे उदोग़ आंदोग़. डायना रिवजता आबुर केवालोरा तुंगातोरिह्क रेयिस ओग़ इद्रम कींदोग़.
13 ओसो ओन ऊळिसि मावा यहुदि जाततोर दुस्रोर विस्वसिर वने अद्रमे सोङ कीतोर. अदिह्कु बार्नबस इंका सोङ केवालोरा संगे कलियलाह बोटटोग़.
14 कलियिस तेला मति, वेर देवुळता सेतेम कबुर वेहतपु ताकोर आंदुर, तेन ऊळिसि नना कतमतोरा मुनेह पत्रुन तेर्हतन. “निमा इतेक यहुदिनिन आस तेला, किर्स्तुनगा वाताह्कु यहुदिराङ अडोन विळ्सिसि, यहुदि आयवोरा लेह्काने ताकिंदिन; मति इंजेके दुस्रा जाततोरिन निमा बेद्रम मावा यहुदिराङ अडोङ नोमलाह जबर्दस्त कीय्ह्निन?
15 “माट यहुदिरल दुस्रा जाततोरल आयवल (ओरिन पाप्यहलोर इन्ह्तोर, ऊळविन!), माटु यहुदि जातते पुटटल, अयो?
16 इंजेके मोसानाङ अडोन माळतेक आयो, मति किर्स्तुना पोग़ोन विस्वस तासतेकेने देवुळि माकु सेतेमतोर इन्ह्ता. बह इतेके अडोन माळताह्कु बोग़ाय देवुळता मुनेह सेतेमतोग़ आयोग़, इनजि सास्त्रम वेहतह्ता. अडोन माळतेक आयो, मति येसु किर्स्तुना पोग़ोन विस्वस तासतेकेने देवुळि मन्कनु सेतेमतोग़ इन्ह्ता इनजि पुताह्कु, माट यहुदि विस्वसिरल इंका किर्स्तु येसुना पोग़ोन विस्वस कीतल.
17 पया किर्स्तुन विस्वस कीसि माट सेतेमतोर आयलाह ऊळिह्नल, अह आसि माट किर्स्तुन विस्वस केवालोरल दुस्राङ जातिनोरा संगे उदना-तेदना कीय्ह्नल. इद्रम कीसोर मनाह्कु लोकुर माकु पाप्यहलोर इन्ह्तोर इतेके, बह किर्स्तु पापमतुन बोल्गिह कीयलाह वातोग़ इनजोर इह्निना? अद्रम मुर्तिय आयो!
18 बेदिन नना मुने लेहच पोहतन, अदिन ओसो नना निल्पिह कीतन इतेके नना कसुरतोनने इनजि तोहतह्नन.
19 बह इतेके मुने यहुदिराङ अडोन माळसोर-माळसोरे नना पिसलाह ऊळिंदन. मति इंजेके देवुळतेनाह्के पिसना इनजि नना अव अडोन लेहच पोहतन. इतेके नना अडोह्कु डोलतप लेह्काने आतन.
20 किर्स्तुना संगे हव्कनागुटातगा वेळ्हतप लेह्काने आतन. हव्कनागुटातगा वेळ्हतप आतन इतेके नना जीवात बह मनदकन? आयो, नावा पाळ्ना जीवा हाता, इंजेके किर्स्तुना जीवाये नावा लोप्पा जागा कीता. पया इद मेंदुदगा नना जीवात मह्नन इतेके, देवुळता मग़ि किर्स्तुना पोग़ोन विस्वस कीसिये पिसिह्नन. ओग़े नाकु जीवा केवाल, नयेनाह्कु तना जीवा एवाल आंदोग़.
21 यहुदिराङ अडोन नोमताह्कु देवुळ माकु सेतेमतोर इता इतेके, किर्स्तु मयेनाह्कु हास पया बाताल पाय्दा? मति ओग़ हाताह्के देवुळता देय्वा माकु दोर्कता इनजि अद देय्वातुनु पेग़्के तासिसि नना मल्स अडोनके अनोन.” इद्रमि येसुसामि नाकु पुन्पिह कीतव इव पोल्लोङ नना पत्रुन वेहतन.