3
किर्स्तुन विस्वस कीतेकेने मन्कलोर सेतेमतोर आस्तोर
1 ए गलातितोर बुदलेवोरिर! येसु किर्स्तुह्कु बेद्रम हव्कनागुटाता सिक्सा दोर्कता, अवटे माक बह अमेसाता पिसमुळ दोर्किह्ता, इदिन मीकु नना पिंगम-पंगम वेहच मतन. इतेके बोरो मति मीक अडोने ताकलाह काग़्हचि मूसेङ कीतोरे, इद बेस आयो!
2 इद उंदिय पोल्लो नाक मीट वेहाटु! देवुळि तना पवित्र जीवातुन मीक बह ईता, अडोन माळताह्कु ईताया, बारा किर्स्तुना पोग़ोन विस्वस कीताह्कु ईता?
3 मीवा लोप्पा देवुळता जीवा बेद कबळ सुरु कीता, अद कबळतुन इंजेक बह मीट मीवाय लावते मारिह कीय्ह्निरा? अचोन मीट बुदलेवोरिरा?
4 अडोन नोमिसि सेतेमतोरिर आयलाह ऊळिह्निर इतेके, मीट किर्स्तुनगा आसा कीताह्कु अचोन तिपल एतिर, अद पूरा उगस अताया?
5 इतेके देवुळि तना पवित्र जीवा मीक ईस्ता, मियेनाह्कु बामिह कीयनाङ कबस्क कीस्ता बहु? मीट अडोन माळताह्कु कीस्ताया, बार किर्स्तुनाङ केंजिसि विस्वस तासताह्कु कीस्ताया?
6 अब्रहम मुय्तोग़ बाताल कीतोग़, ऊळविर? अब्रहम देवुळता पोल्लोतुन नमतोग़. ओग़ नमनदिन ऊळिसि देवुळि ओन सेतेमतोग़ इता, इनजि सास्त्रमते रासतद मन्ह्ता.
7 इतेके देवुळता पोल्लोतुन नमवालोरु, विस्वस केवालोरु, वेर अब्रहमिना कूळतोरे आंदुर, इदिन सीताते तासाटु.
8 इंजेके विस्वसतुह्के सबे जातिनोर सेतेमतोर आयना इनजि मुनेताहि देवुळता विचर मता, मताह्कु अद अब्रहम मुय्तोनु मुनेने इद बेसता कबुर वेहता, सबे जातिनोरिह्कु नीवा मेटे बर्कत दोर्कग़ा, इद्रम सास्त्रमते रासतद मन्ह्ता.
9 इतेके अडोन नोमवालोरिह्क आयो मति अब्रहम मुय्तोना लेह्का विस्वसते ताकवालोरिह्के देवुळता बर्कत दोर्किह्ता.
10 बोर अडोन नोमिसि सेतेमतोर आयलाह ऊळिह्तोर, ओर कतमतोरिह्क सरपे दल्गिह्ता. बाराह्क इतेके बोरु अडोना पुस्तकते रासतव कतम अडोनु नोमसोर मनोर, ओरिह्क सरप दल्गिह्ता, इनजि सास्त्रमते रासतद मन्ह्ता. इद्रमलेह्का विस्वसते ताकवालोरिह्क बर्कत दोर्किह्ता, अडोन नोमवालोरिह्क बार सरप दल्गिह्ता.
11 इंजेके बोर देवुळतुन नमिसि सेतेमतोर आयलाह ऊळिह्तोर, ओरे पिसनुर, इनजि सास्त्रम वेहतह्ता. अदिनेनाह्कु अडोन नोमवालोरगा ओर्विन वने देवुळि सेतेमतोग़ इनो, इद्रम सबेटोरिह्क दिसिह्ता.
12 अडोन नोमवालोर इतेके देवुळतगा विस्वस केवाये नोमिह्तोर; बोर अडोन नोमिह्तोर, अविस्कनेन ताकनुर, इद्रम सास्त्रम वेहतह्ता.
13-14 मति दुस्राङ जातिनोरिह्क इंका, किर्स्तु येसुनगा विस्वस कीताह्कु, अब्रहमिह्क ईतद बर्कत दोर्कग़ा; ओसो देवुळ मुने वेहच मतपे, ताना पवित्र जीवा माक विस्वसिरिह्क दोर्कग़ा, इद्रमता विचरते किर्स्तुये माकु अडोना संगे वातद सरपताहि पिसिह कीतोग़. माक सरपताहि पिसिह कीयलाहि ओग़ तनाय पोग़ोन सरप एतोग़, बह इतेके बोग़ाय मरातगा वेळ्हतोग़ु सरपतोग़ आस्तोग़, इनजि सास्त्रमते रासतद मन्ह्ता.
मोसानाङ अडोङ ओसो देवुळता करल
15 मावोरिर, पुन्पिह कीयनद उंद पोल्लो नना मीक वेहतकन. मन्कलोर कीतद करलतुन वने ताको इनदा वावो, अगा पूनाङ पोल्लोङ एक्वा वाटिसि ताकग़ा इनदा वन वावो.
16 इंजेके अब्रहम मुय्तोह्कु देवुळि किरिया कीस वेहन्दु, “नीकु ओसो नीवा कूळतोन्कु बर्कत ईकन,” इनजि. इतेके “नीवाङ कूळतोरिह्कु ईकन,” इनजि देवुळ वेल्लाटोरा लोप्पा वेहो, मति “नीवा कूळतोन्कु,” इनजि ओर्विनाये लोप्पा वेहचि. ओग़ कूळतोग़ बोग़ इतेके, येसु किर्स्तुये आंदोग़.
17 बेस केंजाटु! अब्रहम मुय्तोह्कु देवुळ कीतद इद करलतुन इतेके, नालुङ नुह्कु डेडावीसा (430) वर्साना पया ईतव मोसानाङ अडोङ बह मायपिह कीस्ताङा? मायपिह केवाह्कु, देवुळ कीतद किरिया इंजेक वने ताकिह्ता.
18 अडोन माळताह्कु देवुळता बर्कत दोर्कता इतेके, अद बर्कत देवुळ कीतद किरियातुह्क दोर्को आवालि. अब्रहमिह्कु इतेके देवुळि ओन किरिया कीताह्के ताना बर्कत दोर्कता, बेद उंद अडोतुन माळताह्कु आयो.
19 मोसानाङ अडोङ पया देवुळि बाराह्कु ईता इतेके, अब्रहम मुय्तोना कूळतोन्क, इतेके किर्स्तुह्कु, देवुळि किरिया ईस मता, अयो? ओग़ वानाह्जोम, माट पापमतोरल आय्ह्नल इदिन पुनदलाहिये देवुळि माक अडोङ वने ईता. इव अडोनु देवुळ तनाङ देवतुल्कना मेटे ईता, मोसा मुय्तोग़ अस्के काल्ह्पवाल मतोग़.
20 काल्ह्पवाना गर्ज इंजेके ईवुराये नडुम अरयह्ता. देवुळ बारा वग़ये मनजि बोग़े काल्ह्पवाल लेवा तनाय कुसिते अब्रहम मुय्तोह्कु किरिया ईता.
मोसानाङ अडोङ मन्कलोरिन ऊळेवळे केवानलेह्काडाङ आंदुङ
21 अह इतेके मोसानाङ अडोङ देवुळताङ किरियाना विरुद मन्ह्ताङा? अद्रम मुर्तिय आयो! माक पिसिह कीया पग़यह्ता इद्रमता बेदाय अडो मतेके, निटमे अडोन नोमिसिये माट सेतेमतोरल आवेरल.
22 मति सास्त्रम वेहतपु पूरा दुनिया पापमते दोहतद मन्ह्ता. किरिया कीतद बर्कत येसु किर्स्तुनगा विस्वस तासतेकेने माक विस्वसिरिह्क दोर्कना इनजि इद्रम आता.
23 मति विस्वसता कालम वायनामुने, माकु यहुदिराङ अडोङ राका कीतप आंदुङ. इतेके विस्वसता अग़ि पुनाह्जोमु माट दोहतप लेह्का मंदल.
24 इतेके किर्स्तुन नमिसिये माट सेतेमतोरल आयना इनजि, ओग़ वानाह्जोम अडोङ इतेके माक उंदि ऊळेवळे केवानलेह्काने आंदुङ.
25 पया विस्वसता कालम वातस्के, इंजेके ऊळेवळे केवाना इळ्न माट इलवल.
26 मीट कतमतोरिर इतेके किर्स्तु येसुन नमताह्कु देवुळताङ मग़्कनिर आय्ह्निर.
27 इतेके किर्स्तुना पेदिरते एतगा मुळ्न्दिस तेदतोर, ओर कतमतोर किर्स्तुना संगे जोळेम आसि, ओन केग़तप लेह्का आस्तोर.
28 यहुदि जाततोग़ आयेग़, दुस्रा जाततोग़ आयेग़, ओर्युलतोग़ आयेग़, माल्काल आयेग़, आंचाळ आयि, कोय्तोग़ आयेग़, इद्रम उड्लोग़-बेरोग़ बातय इले; मीट सबेटोर विस्वसिरिर इतेके किर्स्तु येसुना राजेमते उंदिय मह्निर, इदिन सीता कीम्ह्टु.
29 मीट किर्स्तुना संगे जोळेम आतोरिर इतेके अब्रहम मुय्तोनाङ मीट कूळतोरिर आंदिर, अहे देवुळ अब्रहमिन किरिया कीतपु, तानाङ मग़्क-मयास्किह्क तासतद बर्कत दोर्कतोरिर.