किर्स्तुना बळयि योहन रासतदु दुस्रा मल्काता सीटि
इद सीटटुन बोग़ रासतोग़, इद पोल्लो सीटटे रासतद इले. मति “नना मुनेतोग़ पेदामन्कनन” इद्रम रासतद मन्ह्ता. इद पोल्लोतुन ऊळिसि, मुनेतोग़ पेदामन्कल योहनिये इद सीटटुन रासतोग़ इन्जि, मुनेतोर पेदल्क इंदुर. इद सीटि “देवुळ आचतद बायिनेनाह्कु ओसो तानाङ पिलाङ-पेकोरेनाह्कु” इन्जि रासतद मन्ह्ता. “बायि ओसो तानाङ पिलाङ-पेकोर” इतेके, बेदो उंदि विस्वसिरा मुडुह्क रासतद मन्ह्ता इनजोर, बोर बोर इन्ह्तोर. ओसो बोर-बोरु, उंद बेदो विस्वसि आंचाह्कु, ओसो तानाङ पिलाङ-पेकोरिह्क रासतद मन्ह्ता, इनजोर इन्ह्तोर.
इद सीटटुन योहन बाराह्क रासतोग़ इतेके, वेर विस्वसिर बेस येसु काग़्हतप सेतेमते ताकिंदुर, मति वेरा एरियाते वेल्लाटोर जोल काग़्हवालोर नाग़-नाग़ वेलियसोर, लोकुरिन लेसिह कीसोर मतोर. अदिनेनाह्कु इद्रमतोर जोल काग़्हचि, देवुळतग्डाह जेक ओयवालोरग्डाह मीट उसरते मन्ह्टु, ओरिन जेक तासिसि मीवाङ लोह्कने वायलाह एमाटु. अहे सबेटोर विस्वसिरिर विस्वसते बेस मेग़्किस मन्ह्टु, आपुना मनमुळतुन बेस तासाटु, ओर्विह्क-ओर्वोग़ जीवा कीस देवुळता पोल्लोतुन केंजिसि पिसाटु इन्जि, योहन इद सीटटगा रासलाह आतोग़.
1
ओर्विह्क-ओर्वोग़ जीवा कीयनद पोल्लो
1-2 नना नीवा पेदामन्कनन इद सीटटुन रासिह्नन. देवुळ आचतद बायिनेनाह्कु, ओसो तानाङ पिलाङ-पेकोरेनाह्कु, रासलाह आतन. देवुळता सेतेम पोल्लो मावा जीवातगा मन्ह्ता, ओसो मावा संगे अमेसा मनदग़ा वने. अद सेतेम पोल्लो वेहतपु, नना मीक जीवा कीतन. (नना वग़ोनने आयो, देवुळ तोहतद सेतेमतुन पुतोर सबेटोर वने, मीक जीवा कीस्तोर.) इद सेतेमतुन पुन्जि, माट विस्वस कीतल.
3 माट सेतेमतुन पुताह्कु, ओर्विह्क-ओर्वोग़ जीवा कीयलाह आतल. अदिनेनाह्क मावा देवुळबाबाल ओसो ओना मग़ि येसु किर्स्तु, माक देय्वा ईयनुर, जीवा लोपनुर, सुकमते तासनुर.
4 बायि, नना नीवाङ उच्वुर पिलाङ-पेकोरा पोल्लोतुन केंजतन. देवुळबाबाल माक बेद उकुम ईतोग़, अदिना लेह्का ओर सेतेमते ताकलाह आतोर इनजोर केंजिसि, नना पका गिर्दा आतन.
5 केंजा! नना नीक पूना उकुम रासोन; मति माट मुने केंजतल, अदे उकुमतुन रासलाह आतन. इतेके माट ओर्विह्क-ओर्वोग़ जीवा कीयना, इदे अद उकुम आंदु.
6 मीट विस्वस कीतस्केडाहि केंजिह्निर अद्रमलेह्काने, (ओर्विह्क-ओर्वोग़ जीवा कीम्ह्टु इनजोर,) देवुळि उकुम ईता. ताना उकुम केंजिस ताकनदे, निटम जीवा कीयनद आंदु.
जोल काग़्हवालोरग्डाह उसरते मनदना
7 लोकुरिन नाळेह कीस लेसिह केवालोर वेल्लाटोर, दुनियाते पेसतोर. येसु किर्स्तु मन्कल मारियिस इद बूमते वावोग़ इनजोर, ओर वेहतलाह आतोर. इद्रम वेहवालोरे लेसिह केवालोरु, ओसो किर्स्तुना विरुदतोर आंदुर.
8 उसरते मन्ह्टु! माट इचानाह बेदिनेनाह्क कह्टेम कीतोम, अदिन मीट मायिह केमाटु. (देवुळि इनम ईकन इनजोर पोल्लो विळ्सता,) अद पूरा इनम मीक दोर्कना, अद्रमलेह्का पिसाटु.
9 किर्स्तु काग़्हतव पोल्लोनु, बोग़ विस्वस केवा जेक दास्तोग़, ओग़ देवुळता संगे जोळेम आयोग़. मति किर्स्तु काग़्हतव पोल्लोन, बोग़ विस्वस कीसोर मन्ह्तोग़, ओग़ देवुळबाबाना ओसो ओना मग़ना संगे वने, जोळेम आस मन्ह्तोग़.
10 अदिनेनाह्क वेहतलाह आतन, किर्स्तु काग़्हतव पोल्लोन काग़्हवोग़ मन्कल, मियगा काग़्हतलाह वातेके, ओन मीवा लोते केयमाटु, ओसो जोहर वने केमाटु.
11 अद्रमतोन्क तोळ आयवाल मन्कल, ओनाङ लाग्वाङ कबस्कने कलियिह्तोग़.
12 इंजेके मीक वेहतलाहि, नयगा वेल्लाङे पोल्लोङ मन्ह्ताङ; मति अविस्किन नना सीटटे रासोन. बह इतेके ननाने मियगा वायकन अस्के, माट ओर्विह्क-ओर्वोग़ मोकम मुनेह वळ्ह्ककल इन्जि, आसा कीयलाह आतन. अस्के माट बेस-नेह्ना गिर्दा आयकल.
13 देवुळ आचतद नीवा एलानाङ पिलाङ-पेकोर, मीक जय येसु इनदलाह आतोर.