किर्स्तुना बळयि योहन रासतदु मुचाकेपाता सीटि
इद सीटटुन रासवाल येसु किर्स्तुना बळयि योहन आंदोग़, तना गोततोग़ गयुस पेदिरतोन्क रासतोग़. गयुस किर्स्तुना पोल्लोतुन बेस केंजिसि ताकिंदोग़. विस्वसिर ओनगा अतेके, ओरिह्क बेदाय कबळ कीसीयह्पा, नाळेह केवालेवा कीसींदोग़. पुनवोर सेवकिर मतेक तेला, बेस जागा-पग़्सा कींदोग़, अहे सबेटोर विस्वसिरिन पका जीवा कींदोग़. गयुसना इद कबुरतुन केंजिसि, योहन पका गिर्दा आसि, इद सीटि रासिह्तोग़.
ओसो दियुत्रिपे इनवाल, विस्वसिरा मुडा सेवक मतोग़, मति येसुना सेतेमता कबुरतुन पोकुर केवालोर, देवुळताङ सेवकिरिन बोनगान वायलाह एवोग़ आंदोग़. दुस्रोरिन वने ओर सेवकिरेनाह्क जागा-पग़्सा कीयलाह एवोग़ आंदोग़. अदिह्क नना अगा वासि, ओन सुद्रे कीकन इनजोर, योहन इद सीटटगा रासिह्तोग़.
1
योहन गयुसिह्क सीटि रासिह्तोग़
1 नना मुनेतोग़ पेदामन्कनन आंदन. नावा गोतयानिन गयुस, इद सीटि नीक रासलाह आतन. नना नावा जीवाताहि नीक जीवा कीय्ह्नन.
2 नावा गोतयानिन! नीवा जीवा देवुळता संगे जोळेम आसि सुकमते मन्ह्ता, अद्रमलेह्का सबे पोल्लोने निमा सुकमते मनदना. बेदे रोगमि, दुकि आयवा बेस मनदना इनजोर, नना पार्तना कीयलाह आतन.
3 उय्तुर विस्वसिर वासि, गयुसि निटमे सेतेमते ताकसोर पिसलाह आतोग़ इनजोर, कबुर ततोर. अदिनेनाह्क नना पका गिर्दा आतन.
4 नावाङ पेकोर सेतेमते ताकसोर पिसलाह आतोर इनजोर केंजिसि, नावा जीवातुह्क बेस गिर्दा आता. बेदे दुस्रा पोल्लो तान्काय वीळिस नाक गिर्दा एवो.
विस्वसिरा सेवा-साकुर कीयना
5 नावा गोतयानिन! मावोर विस्वसिर नियगा वातेके, निमा ओरिह्क बेदाय कबळ कीसीयह्पा, नाळेह केवालेवा कीसीय्ह्निन. पुनवोर विस्वसिर मतेक तेला, ओरिन बेस ऊळिह्निन.
6 निमा ओरिन पका जीवा कीतिन इन्जि, ओर नीवा बेसतल साक्सि इग्डोर विस्वसिरा मुडुह्क वेहतोर. देवुळतुह्क विचर वानाह, निमा ओर सेवाकिरा सेवा-साकुर कीसि लोहतेके बेसु!
7 ओर किर्स्तुना सेवातुह्क पेसतोर, साय्तातेनाह्क ओरु विस्वस केवोरगा अनोर.
8 ओरु सेतेम पोल्लोन वेहतनद कबळ केवालोर आंदुर. अदिनेनाह्क माट अद्रमतोरिह्क साय्ता कीयना गावले. अद्रम कीतेके, माट वने ओरा संगे सेतेमतेनाह्क कबळ केवालोरा लेह्का आयकल.
9 नना विस्वसिरा मुडुह्क, उंद सीटि वने रासिस लोहच मतन. मति दियुत्रिपे इनवाल, विस्वसिरा मुडगा तना अदिकर ताकिह कीयलाह बोटटोग़. अदिह्क ओग़ नना वेहतनदिन केंजोग़.
10 अदिनेनाह्क नना अगा वासि, ओग़ बाताल बाताल कीयलाह आतोग़, अदिन सबेटोर विस्वसि मुडोरिन वेहतकन. ओग़ नावा पोग़ोन, करबताङ पोल्लोने जोल कसुर वाटिह्तोग़; अचोने आयो, उननाटोर विस्वसिर ओनगा अतेके, ओरिन बेस गिर्दाते ऊळोग़. ओसो विस्वसिरिन वने, अद्रमलेह्का कीयलाहि एवोग़. अद्रम केवालोरिन विस्वसिरा मुडाहि पलते पेहचीस्तोग़.
11 नावा गोतयानिन! लाग्वा कबळ केवालोरा लेह्का आयो, मति बेसता कबळ केवालोरा लेह्का कीम. बेसता कबळ केवाल मन्कल देवुळतोग़ आंदोग़. मति लाग्वा कबळ केवाल देवुळतुन पुनोग़.
12 देमेतिरियुस इनवान सबेटोर बेसतोग़ इनजोर इन्ह्तोर. सेतेमता इसबते वने, ओग़ बेसतोग़ मन्कल आंदोग़. ओग़ बेसतोग़ इनजोर, माट वने वेहतलाह आतोम. माट वेहतनद सेतेम इनजोर, निमा इतेके पुतिने.
आक्रिता जोहर
13 नीक वेहतलाह नयगा ओसो वेल्लाङे पोल्लोङ मन्ह्ताङ, मति अव पोल्लोन इद्रम सीटटे रास वसो.
14 मति नीक बेस्के कलियकन अस्केन, माट ओर्विह्क-ओर्वोग़ मोकम मुनेह वळ्ह्ककल इन्जि, नना आसा कीयलाह आतन.
15 देवुळि नीक सुकम ईयि. इग्डोर मावोर नीक जय येसु वेहतह्तोर. मियग्डोर मावोरिन ओर्विन-ओर्विन नयेनाह जय येसु वेहा.