4
जग्ळम्क-बोबाङ बेग्डाह पुटिह्ताङ?
1 मीवा नडुम जग्ळम्क-बोबाङ बेग्डाह पुटिह्ताङ? मीवाङ लालुस्क मीवा जीवातुन आव्रे कीयलाह ऊळिह्ताङ, अग्डाहे कोनि इव सबे जग्ळम्क पुटिह्ताङ.
2 मीटु बेव गावले इनजोर विचर कीय्ह्निर अव मीक दोर्कोङ. अदिनेनाह्क मीट दुस्रोरिन हव्किह्निर. दुस्रोरा मादगा कोंडा वाटिह्निर, मति मीक अव दोर्कोङ. अदिह्क जग्ळम्क-बोबाङ कीय्ह्निर, अद्रम कीसाय मति मीक अव दोर्कोङ. बह इतेके मीट देवुळतुन ताल्ह्कविर.
3 ओसो मीट ताल्ह्कलाह ताल्ह्किह्निर मति बेसतल बुदते ताल्ह्कविर अदिनेनाह्क मीक दोर्कोङ, बह इतेके मीट ताल्ह्कतस्के दोर्कनविन मीवाय गिर्दातुह्क पोहतलाह ताल्ह्किह्निर.
4 एय देवुळतुन जीवा केवोरिर, दुनियातुन जीवा कीयना इतेके देवुळता संगे विरुद आयना लेह्का आस्ता. बोग़ मन्कल दुनियातुन जीवा कीयलाह ऊळिह्तोग़, ओग़ मन्कल देवुळता विरुदतोग़ आस्तोग़, मीक इद पोल्लो एर्का इलेया?
5 देवुळता सास्त्रमतुन बेस सीता कीम्ह्टु. मावा लोप्पा तना तासतद जीवाता संगे देवुळि जोळेम आयलाह ऊळिह्ता.
6 बोग़ाय देवुळता विरुदतोग़ आतेक तेला देवुळ ओना पोग़ोन एक्वा दया तोहतह्ता. अदिनेनाह्क ताना सास्त्रमतगा इद्रम रासतद मन्ह्ता:
“नना बेरोनन!” इनवानु देवुळि अडम मन्ह्ता,
मति “नना उड्लोनन! इनवानु देवुळि दया कीस्ता.”
7 मीट देवुळता पोल्लोते वग़्ङिस मन्ह्टु. देयह्कना मुक्यानाङ केंजमाटु. अस्के अद मियग्डाहि वितग़ा.
8 देवुळता एरे मीट वातेके, देवुळ वने मीवा एरे वायग़ा. एय पाप्यह्लोरिर! करब आतव कय्किन नोग़तप लेह्का, लाग्वाङ कबस्क केवा, मीवा ताकमुळतुन बेस कीम्ह्टु. मीट रेंड विचर्क केवा, मीवा पूरा जीवा देवुळतगान मनि.
9 माट पापि मन्कलोरोम इनजि दुकम आस अळ्म्ह्टु, केयाटु. मीट कवयनदिन विळ्सिसि दुकम आम्ह्टु ओसो गिर्दा आयना विळ्सिसि मेसेह्ने आम्ह्टु.
10 सामिना मुनेह मीट उड्ला बुदतोरिर आम्ह्टु. अह आतिर इतेके मीकु तना मुनेह बेरा कीयग़ा.
कसुर वाटनद अदिकर मीक इले
11 मावोरिर! ओर्विह्क-ओर्विना विरुद वळ्ह्कमाटु. बोग़ु तना ऐंगेटोग़ विस्वसिना विरुद वळ्ह्किह्तोग़, इलवेके ओनगा कसुर वाटिह्तोग़, ओग़ देवुळताङ अडोना विरुद वळ्ह्किह्तोग़. ओसो देवुळताङ अडोन चुकताङ इन्ह्तोग़. अद्रम बार मीट देवुळताङ अडोङ चुकताङ इतिर इतेके, अडोङ वेहतप ताकवालोरिर आयविर, मति मीटे नेयम केवालोरा लेह्का मनजि तपिह्निर.
12 अडोङ ईयनदु, ओसो नेयम कीयनदु, सिरप देवुळिये आंदु. तान्के पिसिह कीयनद ओसो बूळे कीयनद अदिकर मन्ह्ता. मति मीकु मीवा ऐंगेटोना पोग़ोन कसुर वाटनद अदिकर बोग़ ईतोग़?
मावा पिसमुळ देवुळता कयदे मन्ह्ता
13 इद उंद पोल्लो केंजाटु, मियग्डाह उच्वुर इद्रम इह्निर: “नेंड इलवेके नाळि इग्डाह पलाना सहरते दाकल. अगा वर्सामेंड मनजि दंदा कीकल, कीसि वेल्लाङ कोताङ कमय कीकल” इह्निर.
14 मति नाळता दियाते मीक बह आयग़ा, इदिन वने मीट पुनविर! मीवा पिसमुळ इतेके गळ्के दिसिसि पया मायनद मूळमलेह्काडा आंदु.
15 अदिनेनाह्क मीट अमेसा इद्रम इनदना गावले, “देवुळता विचर मतेके माट जीवात मनदकोम, ओसो इद आयवेक अद कबळ कीकोम,” इनदना.
16 मति मीट इतेके पका पोमाडेङ कीसोर बोळ्सिह्निर, इद्रमता पोमाडेङ कीयनद लागो.
17 अदिनेनाह्क बोग़ बेसता कबळ कीयलाह पुन्ह्तोग़, मति अदिन केवोग़, इतेके ओग़ पापम कीस्तोग़.