5
लालुस मनवालोर साव्कर्कना लोप्पाडा पोल्लो
1 एय साव्कर मन्कलोरिर! मीवा पोग़ोन पका सिक्सा वायना मन्ह्ता, अदिनेनाह्क केयसोर अळ्म्ह्टु!
2 मीवा अनम कळियलाह आता, मीवाङ गेंदेनु एल्म तिनदलाह आता.
3 मीवाङ बंगर्क-वेंडिनु सिलुम पोयलाह आता. देवुळि नेयम कीयह्पा, मीवा पोग़ोन लालुसता कसुर मन्ह्ता इनजोर अद सिलुम साक्सि ईयग़ा. इद आक्रि कालमते मियेनाह्क बंगर्क-वेंडिङ जमा कीतिर, मति मीवाङ बंगर्क-वेंडिङ सिलुम पोस बूळेम आयना लेह्का देवुळि मीक देयमदीपता किसते बूळे कीयग़ा.
4 इह केंजाट! मीटु लोकुरिन पोलमतगा कोया वेहतिर, मति ओरिह्क बूति एविर. इद्रम बूत एवद पापमतुन देवुळ ऊळता. ओसो बूतिनोरा केयनद लेङ वने बेरा डीसाता सामिनगा एवता.
5 मीट इद बूमतगा सबे रीतताङ विचर्क वातप ताकतिर. मति बेद्रम नेंड नग़्का नाक अस्कनुर इनजि एर्रे पुनवा बेस मेयिह्ता, अद्रम मीट वने देवुळ माक बूळे कीयलाह आता इनजोर पुनवा गिर्दा-वेळ्काते मह्निर.
6 ओसो सेतेमतोर मन्कलोरिन कोरोटटे ओसि जोल कसुर वाटिस ओरिन हव्कनाह कीतिर, ओर मीक रोमिह केवोर वने.
दीरा पोयम्ह्टु, पार्तना कीम्ह्टु
7 अदिनेनाह्क मावोरिर, येसुसामि ओसो वने वानाह्जोम दीरा पोस केपाटु. ऊळाट बेद्रम पोलमता कबळ केवालोर पोलमते वीततद तमा पिसवग़ता अनमतुह्कु, सुरुमुनेता पेग़ ओसो मारेंगा पेग़दुन केपिह्तोर.
8 अद्रमलेह्का मीट वने आरेम आयवा दीरा पोस केपाटु, बह इतेके सामि वायनद दिया एरे एव्स मन्ह्ता.
9 ओर्विह्क-ओर्वोग़ मुयोग़ आसोर मनमाटु, अद्रम आतिर इतेके, मीवा पोग़ोन कसुर उदग़ा. ऊळाट! नेयम केवाल येसुसामि अग़दगान एवयलाह आतोग़.
10 वेल्लाय मुने देवुळता कबुरतोरु तानाङ पोल्लोङ वेहन्दुर, ओसो ओर बेद्रम तिपल्किन आपिसि आरेम आयवा दीरा पोस मंदुर, अदिन सीता कीम्ह्टु, ओसो मीट वने ओरा लेह्कान मन्ह्टु.
11 इद पोल्लो केंजाट, तिपल्कने आरेम आयवा दीरा पोस मनवालोरिन देय्वातोर इह्नल. मुनेतोग़ अयुब मुय्तोग़ बेरा तिपलते आरेम आयवा बेद्रम दीरा पोस मतोग़, ओसो आक्रिते देवुळतग्डाह ओन्क बेद्रम बर्कत दोर्कता, इदिन इतेक मीट केंजतिर ओसो पुतिर वने. इद्रमे देवुळि अमेसा जीवा लोपनदु, दया कीयनद आंदु.
12 मति मावोरिर! सबेट्क बेरा पोल्लो इद आंदु इतेके, मीट बेस्केन किरिया ओतनाय आयो. अद देवुळदीपता वने आयो, इद बूमता वने आयो, ओसो दुस्रा बेदे रीतता किरिया केमाटु. मीवा वळ्ह्कमुळि “इंगो इतेके इंगो, आयो इतेके आयो इन्ह्टु,” इद्रम कीतिर इतेके देवुळ मीवा पोग़ोन कसुर वाटो आयग़ा.
13 मियगा बोग़ाय तिपलते मतेके पार्तना कीयेग़, बोग़ाय बेस सुकमते मतेके, देवुळतुन जोहर कीसोर पाटाङ ओयेग़.
14 ओसो मीवा नडुम बोग़ाय बेमरते मनजि तेद पग़वेके, ओग़ु विस्वसिरा मुडामुक्यालोरिन केयेग़. ओर वासि, येसुसामिना पेदिरते ओन नेय ओकिस ओनेनाह्क पार्तना कीयिर.
15 ओरु विस्वसते कीतद पार्तनाते बेमरतोग़ बेस आयनोग़. सामि देवुळि ओन बेमरतग्डाहि तेहतग़ा. ओसो ओग़ पापम कीस मतेक तेला, ओना पापमतुन मापि कीयग़ा.
16 अदिनेनाह्क मीट कीतद पापमतुन ओर्विह्क-ओर्वोग़ कबुल आम्ह्टु, ओसो ओर्विनेनाह्क-ओर्वोग़ पार्तना कीम्ह्टु. अस्के मीट बेमरताहि बेस आयकिर. सेतेमतोग़ मन्कना पार्तनाते पका लाव मन्ह्ता.
17 मुनेतोग़ कबुरतोग़ एलियान सीता कीम्ह्टु! ओग़ मावा लेह्काडोग़े मन्कल मतोग़. मति इस्रयेल देसेमतगा पेग़ अरमाकि इनजोर गोंडगोंड आसि पार्तना कीतोग़. कीताह्कु मूंड वर्साङ आरुङ नेलाङ अद देसेमतगा पेग़ अरवो आसि.
18 पया ओसो वने पेग़ अरयि इनजोर पार्तना कीतोग़, अस्के पोग़ोटाहि पका पेग़ अरता ओसो बूमतग्डाहि अनम पुटटा.
19 ओसो मावोरिर! मियग्डाह बोग़ायि देवुळता सेतेम अग़दाहि लेसतेकचोन, ओन ओसो वने बोग़ाय दुस्रोग़ सेतेमता अग़दे मल्हच ततोग़ इतेके,
20 मल्हच तवाल मन्कल, लेसिस मतोग़ मन्कना वेल्लाय पापमतुन मापि कीयनाह कीसि, ओन बूळेम आयवाह पिसिह कीतोग़, इदिन पुनेग़.