6
ओर्युलतोर विस्वसिर बह मनदना
1 विस्वस केवोर माल्कालोरा कय इळ्न मनवालोर ओर्युलतोर विस्वसिर, तमा माल्कालोरिह्क मान ईसि अमेसा ओरा पोल्लोते वरेम आस मनदना. अह मतेके मन्कलोर ओरा बेसता कबळतुन ऊळिह्तोर, अस्के देवुळता पेदिरतुन, ताना पोल्लोतुन बोग़े पास्कोग़.
2 विस्वसि ओर्युलतोना माल्काल वने विस्वसि मतेक अचोन, “नावा माल्काल नावा ऐंगेटोग़ विस्वसि आंदोग़, ओना पोल्लो केंजवेक बाताले आयो” इनजोर विचर कीयनद आयो. ओर्युलतोग़ बेस-नेह्ना कबळ कीतेक अचोन माल्काह्क पाय्दा दोर्किह्ता. ओग़ वने विस्वसि, देवुळि ओन जीवा कीता, अदिनेनाह्क ओन्क इंका एक्वा सेवा कीसीयना.
निमा इव पोल्लोन काग़्हचि ओर्युलतोरिन इद्रम ताकलाह वेहा.
कोतान जीवा केवालोर लेसिह्तोर
3 इंजेके बोग़ाय माट काग़्हतव पोल्लोन विळ्सिसि, दुस्राङ पोल्लोङ काग़्हतह्तोग़, मावा येसुसामि किर्स्तुनाङ सेतेम पोल्लोन केंजोग़ आस्तोग़, अमेसा देवुळतुह्क विचर वानाह पिसिह कीयनव सेतेम पोल्लोन वने केंजोग़ आस्तोग़;
4 अद्रमतोग़ पकाय पोमाडेङ आतोग़, मुर्तिय बातय पुनोग़, ओना बुदि करब आताह्कु पोल्लोने गिटोगटो आस्तोग़. ओसो उड्लाङ-उड्लाङ पोल्लोन बेराङ कीसि जग्ळम पुटिह कीयलाह आस्तोग़. अदिनेनाह्क ओनग्डाह कुळ्सा पुटिह्ता, ओंङ पुटिह्ता, उस्कना-पास्कना पुटिह्ता, लाग्वा विचर कीयनद पुटिह्ता.
5 इद्रमतोर लाग्वा बुदतोर आंदुर ओसो सेतेम पोल्लोताहि जेक आतोर, रोमवालेवा जग्ळम आसोर मन्ह्तोर. इद्रमतोर देवुळतुन माळिसि, पका कोताङ कमय कीसि माक पाय्दा आस्ता इनजोर विचर कीस्तोर.
6 मति मतेकाय, लेवेकाय, सुकमते मनदना बेसु. अह मनजि देवुळतुह्क विचर वानाह ताकतेकेने बेरा पाय्दा दोर्किह्ता.
7 बह इतेके, माट बूमतगा पुटटस्के बाताल पोस वावल, अद्रमे हातस्के बाताल पोस दाया पग़वल.
8 अदिनेनाह्क मयगा तिनदलाह तिंडि ओसो केग़यलाह गेंदेङ मतेक अचोन, इवटेन गिर्दा आस मनदना.
9-10 कोतान जीवा कीयनाह्के सबे रीतिनाङ लाग्वाङ कबस्क पुटिह्ताङ. उच्वुर कोतानगा जीवा वाटटाह्के, विस्वसताहि लेसतोर. ओसो वेल्लाय दुकमतुन तमा जीवातगा ततोर. अदिह्क मता मन्कलोर आयलाह विचर केवालोरगा पापमते अर्हतनद दोका पुटिह्ता. मोलुल वदतगा एग़्कना लेह्कान, इद्रमता मनमुळ पापमता वदतके ओसीस्ता. ओरा जीवातगा बुदलेवव, दोकाताङ विचर्क पुटिह्ताङ, अव ओरिन पूरा बूळेम आयनके ओसीस्ताङ.
तिमोति बेद्रम मनदना इनजोर पोलु वेहतह्तोग़
11 मति तिमोति! निमा वेर मन्कलोरा लेह्का आयविन, निमा देवुळता मन्कनिन, अदिनेनाह्क इव लाग्वाङ पोल्लोनाहि अबर विता. अविस्कनग्डाह जेक मनजि इद्रमलेह्का मनदलाह पर्ह्का: सेतेमते पिसना, देवुळतुह्क विचर वानाह पिसना, विस्वसते ताकना, जीवा कीयना, तिपलते विस्वस विळ्सवा मनदना, कुलुल बुदते मनदना.
12 विस्वसतेनाह्क बेचोन तिपल वातेक तेला, अदिना संगे आरेम आयवा लळेम आम. अमेसाता पिसमुळतुन पका पोय्म, इदे पिसमुळतुह्क देवुळि नीक केयता. इद पिसमुळ दोर्किह कीतन इनजोर निमा वेल्लाटोर मन्कलोरा मुनेह साक्सि वेहतिन वने.
13 सबेटविस्किह्क जीवा ईयनद देवुळता मुनेह, ओसो पुन्तियु पिलाति गुमसिह्क सेतेम पोल्लोता साक्सि ईतोग़ किर्स्तु येसुना मुनेह, इंजेके नना नीक उंद उकुम ईयलाह आतन.
14 इतेके, नना नीक वेहतव पोल्लोन तपवालेवा, नियगा कसुर दिसवपु केंजिस ताका. मावा येसुसामि किर्स्तु ओसो वानाह्जोम केंजसोर मन.
15 ओग़ वायनद कगोते देवुळि ओन दिसिह कीयग़ा. डीसाता देवुळि पूरा दुनियातुन ताकिह कीयनद अदे, राजालोरा राजाल अदे, सामिरा सामि अदे आंदु.
16 बेस्केन डोलवदु अदे, अद बोग़े एवया पग़वद वेह्चतगा मन्ह्ता, तान बोग़े मन्कल ऊळोग़, ओसो बेस्केन ऊळ वने पग़वोग़, ताने सबेटोर मान ईयिर. राजेम कीयनद लाव अमेसा-अमेसातुह्क तानाय मनि. अहे आयि.
17 इद दुनियातोर मता मन्कलोरिन इद्रम उकुम ईम: ओर पोंगसोर तिरियमाकिर. कोताङ नेंड मन्ह्ताङ, नाळि मनोङ. अदिनेनाह्क कोताना पोग़ोन आसा तासमाकिर, मति देवुळता पोग़ोन आसा तासिर. माट सुकमते मनदलाहि अदे माक सबे मादुन आलिस पिसनाह ईस्ता.
18 मता मन्कलोर बेसताङ कबस्क कीसोर मनिर. कोताने मता मन्कल आयनालेह्का, बेसताङ कबस्कने मता मन्कलोर आयिर, चिव्टम आयमाकिर. बेदाय मादुन दुस्रोरिह्क तूसिसीयिर. तिमोति! इद्रम मनदलाहि ओरिन उकुम ईम.
19 ओर इद्रम मतेक अचोन, पोग़ोन देवुळता जागातगा, पका बर्कत जमा कीतप आस्ता. लोता जोता दोहतना लेह्कान, अगा मनदलाह जोता दोहतप लेह्कान आस्ता. अस्के बह पिसना इनजि देवुळता विचर मन्ह्ता, अद्रमे ओर पिसनुर.
20 मन्कलोर देवुळतुन सीता केवा लाग्वाङ-लाग्वाङ वेहतह्तोर, माट काग़्हतद पोल्लोतुन विळ्सिस एत्लम पोल्लो काग़्हतह्तोर ओसो अदिन निटम बुदता पोल्लो इन्ह्तोर. तिमोति, निमा ओरगा अनमा, मति देवुळि नीवा कयदे ईतद कबळतुन बेस-नेह्ना तासा.
21 उच्वुर अद बुदता पोल्लो दोर्किह कीतोम इनजोर इतोर, मति सेतेम पोल्लोताहि लेसतोर, ओरगा निमा अनमा. देवुळि मीक देय्वा ईयि.