तिमोतिनेनाह्कु किर्स्तुना बळयि पोलु लोहतदु पयाडा सीटि
इद सीटटुन रासवाल, किर्स्तुना बळयि पोलु आंदोग़. पोलु तिमोतिह्क इद सीटि लोहतस्के, रोम सहरता जेलतगा मतोग़. तिमोति बेसता कबुरतुन पोकुर कीयलाहि, पोलुना संगे तिरियिंदोग़. पया पोलु ओनु, इपिसुस सहरता विस्वसिरा मुडुन ताकिह कीयलाह, अद सहरते मनदलाह वेहतोग़.
पोलु इद सीटटुन बाराह्क रासतोग़ इतेके, रोम सर्करतोर तन्क हव्कलाह ऊळिह्तोर इनजोर, पोलु पुन्ज मतोग़. अदिनेनाह्क तना डोलनामुनेन, तिमोति तनगा वायेग़ इनजोर, इद सीटि रासतोग़. ओसो देवुळता सेवा बेद्रम कीसोर दायना इनजोर ओन काग़्हतलाह, ओसो इपिसुस सहरतोर विस्वसिरगा मतव, लाग्वाङ पोल्लोना लोप्पा बह कीयना इनजोर, ओन वेहतलाहि इद सीटि रासिस लोहच मतोग़.
1
मुनेटा पोल्लो
1-2 तिमोति, नना पोलुनन, नीक सीटि रासलाह आतन. मन्कलोर किर्स्तु येसुन विस्वस कीतेके, अमेसाता पिसमुळतुन दोर्किह कीस्तोर इनजोर, देवुळि मुनेन पोल्लो विळ्सता. अद पोल्लोता कबुर ओयलाहि नना पोलुनन, देवुळता विचर मतपु, किर्स्तु येसुना बळयिनन आतन, इदिन सीता कीमु. नीक नना नावा मग़ना लेह्का जीवा कीय्ह्नन. मावा देवुळबाबाल ओसो मावा येसुसामि किर्स्तु, नीकु देय्वा ईयिर, जीवा लोपिर, अह आसि निमा सुकमते पिसा.
किर्स्तुनेनाह्क लजा आयनद आयो
3 नना देवुळता मुनेह आयि, लोकुरा मुनेह आयि, अमेसा जीवाताहि कसुरलेवप मन्जि, देवुळतुन माळलाह ऊळिह्नन. मावाङ तादोर-बाबोर वने, अद्रमलेह्काने देवुळतुन माळतोर. ओसो नीक सीता कीयह्पा, देवुळतुन नना जोहर कीय्ह्नन. नग़्का पिळ्विळ पियल-पोळ्द पार्तना कीयह्पा, माग़्ङवालेवा नीक सीता कीय्ह्नन, तिमोति.
4 नना नियग्डाहि पेसतस्के, नीवा कनिरतुन सीता कीतन, नीक ऊळलाह नावा जीवा पर्ह्किह्ता. नीक ऊळतेक अचोन, नाक बेस-नेह्ना गिर्दा आस्ता.
5 नीवा विस्वस निटमता विस्वस इनजोर, नना सीता कीतन. मुने नीवा काको लोयिस, अद्रमे विस्वसता मता. पया नीवा यायालि यूनिके वने, अद्रमे विस्वसता मता. निमा वने अद्रमताय विस्वसतोनिन इनजोर, नावा बर्वस मन्ह्ता.
6 अदिनेनाह्क नना नीक इद पोल्लो वेहतह्नन. मुने नीवा पोग़ोन नना कय्क तासिस पार्तना कीतन, अस्के देवुळि नीक सेवा कीयनद बुदि ईता. अद बुदतुन काळ्ङा इनजोर, नीक सीता कीसीयलाह आतन.
7 बाराह्क इतेके, देवुळि माक रेयिस मनदनद जीवा एवो, मति माक लावता, दुस्रोरिन जीवा कीयनदु, कुदतुन आव्रे कीयनद जीवा ईता.
8 अदिनेनाह्क मावा सामिना साक्सि ईयलाह, निमा लजा आयमा. अद्रमलेह्काने ओना सेवा कीयनाह्क, नना जेलते मह्नन; इद पोल्लोतेनाह्क वने निमा लजा आयमा. मति देवुळि नीक ईतद लावते, बेसता कबुरतेनाह्क नावा संगे तिपल आम.
9 देवुळि माक पिसिह कीसि, तनाय पवित्र लोकुर आयलाह माक आचता. माट बेसताङ कबस्क कीताह्कु आयो, मति तना मुनेन विचर कीस मतद पोल्लोता इसबते, माक आचता. किर्स्तु येसुना मेटे, माक ताना दया दोर्कना इन्जि, अद सुरुमुनेताहि विचर कीस मता.
10 इंजेके माक पिसिह केवाल किर्स्तु येसु बूमतगा वास मताह्कु, देवुळि मावा पोग़ोन दया कीता इनजोर तोहचीता. किर्स्तु हामुरता लावतुन बूळे कीतोग़, ओसो बेसता कबुरतुन विस्वस केवालोर मन्कलोर, अमेसा-अमेसातुह्क देवुळता संगे पिसिह्तोर इनजोर तोहतोग़.
11 इदे बेसता कबुरतुन पोकुर कीयलाह, काग़्हतलाह इनजोर, देवुळि नाक किर्स्तुना बळयि इनजोर निल्पिह कीता.
12 अदिनेनाह्क नाकु इव तिपल्क वाताङ, वातेक तेला नना लजा आयोन. बाराह्क इतेके, नना बोन विस्वस कीतन इनजोर पुतन. (नना देवुळतुन विस्वस कीतन,) नना ताना कयदे तासिसीतद नावा जीवातुन, अदु किर्स्तु मल्स वायनद दिया एवनाह, राका कीस तास पग़यह्ता इनजोर, बेस-नेह्ना पुतन.
13 निमा नयग्डाहि केंजतव पोल्लोङे चुकवव आंदुङ. अविस्किने पोस मन. ओसो निमा किर्स्तु येसुना संगे जोळेम आताह्कु, ओन विस्वस कीसोर मन, दुस्रोरिन जीवा कीसोर मन.
14 देवुळि बेसता पोल्लोतुन नीवा कयदगा ईता. अद पोल्लोतुन बोग़े मिळ्हतनद आयो इन्जि, मयगा मनदनद देवुळता पवित्र जीवाता मेटे, तान बेस-नेह्ना राका कीस मन.
15 आसिया पटटोर वेल्लाटोर विस्वसिर नाक तोळ एवोर. अग्डोर पुगिलुस ओसो इरमुगिनेस इनवालोर वने, नाक तोळ एवोर इनजोर पुतिन.
16 उनेसिपुरुस इनवाना लोतोरा पोग़ोन, सामिना दया वायि. नना जेलते मनदनदिन ऊळिस, ओग़ लजा आयवा, नाक ऊळलाह वातोग़. ओसो वेल्लाङे मल्काङ नाक तोळ ईतोग़.
17 ओग़ इगा रोम सहरते वातस्केन, रोमवालेवा नाक पर्ह्किस दोर्किह कीतोग़.
18 तना नेयम कीयनद दियाते, सामिनाहि ओन्क दया दोर्कि. नना इपिसुस सहरते मतस्के वने, ओग़ नाक बेद-बेद सेवा कीसीतोग़, इदिन निमा बेस-नेह्ना पुतिन.