2
विस्वसिरा मुडगा अलग-अलग मन्कलोरिन काग़्हतनद पोल्लो
1 मति निमा मात्रम अद्रम मनमा. निमा देवुळताङ सेतेम पोल्लोना इसबते विस्वसिरिन वेहा.
2 ओसो मुय्तोरिन इद्रम काग़्हा: बेस बुदते मनिर, दुस्रोरिह्क ओप्पनाह ताकिर, कुदतुन आव्रे कीयिर, विस्वसते मेग़्किस मनिर, दुस्रोरिन बेस जीवा कीयिर, तिपलते आरेम आयवा निच मनिर.
3 अद्रमे सेळो आस्किन वने इद्रम काग़्हा: अमेसा देवुळतुन रेयसोर ताकिङ, बोनाङे कूदिङ अनमाकिङ, कल लोटि आयमाकिङ, बेसताङ पोल्लोङ काग़्हतनव आयिङ.
4 अस्के अवु लेया आस्किन इद्रम काग़्हता पग़यह्ताङ: “नीवा मुजोन, नीवाङ पिलाङ-पेकोरिन जीवा कीम;
5 कुदतुन आव्रे कीम, दुस्रोन कवमा, लोता कबळते लंडा आयमा, गूनमते ताका, नीवा मुजोना पोल्लोते वरेम आस मन,” इनजोर लेया आस्किन काग़्हता पग़यह्ताङ. आंचाळ इद्रम मतेक-अचोन, दुस्रोर देवुळता पोल्लोतुन पास्कोर.
6 अद्रमे लेयोर मन्कलोरिन वने, “कुदतुन आव्रे कीम्ह्टु” इनजोर काग़्हा.
7-8 सबे पोल्लोने मन्कलोर नीक ऊळिस कग़यना लेह्का निमाये बेसताङ कबस्क कीस तोहा. मावा लोप्पा बेदे लाग्वा पोल्लो वळ्ह्क पग़वाह, नीक विरुद केवालोर मन्कलोरिह्क लजा वायना लेह्का, जोल इनजोर वेहता पग़वपे, निमा सेतेमते काग़्हा. मन्कलोर नीवा पोल्लोतुन केंजना लेह्का बेस काग़्हा.
9 ओर्युलतोरिन इद्रम काग़्हा: ओर तमा माल्कालोरा पोल्लोते वरेम आस मनिर, ओरिह्क गिर्दा वायना लेह्का कबळ कीयिर, ओरिन पोल्लो मल्हमाकिर.
10 कले कबळ केमाकिर, मति माल्काल ओरगा बर्वस कीतपलेह्का नाळेह केवालेवा कबळ कीयिर. इद्रम सबे पोल्लोने माक पिसिह कीयनद देवुळि काग़्हतद पोल्लोतुन मन्कलोर मान ईयना लेह्का कबळ कीयिर.
देवुळि मयेनाह्क बाताल कीस्ता?
11 सबेटोर मन्कलोरिन पापमताहि पिसिह कीयलाहि देवुळि तना दयातुन पुन्पिह कीयलाह आता.
12 ओसो देवुळता दया माक इद्रम बुदि काग़्हतलाह आता इतेके: माट देवुळतुन सीता केवा मनदनद आयो, इद दुनियाताङ विचर्कनगा सीता वाटनद आयो. मति कुदतुन आव्रे कीसि, देवुळतुह्क विचर वानाह मनदना, अमेसा कर्तुळते इद बूमतगा पिसना इनजोर काग़्हतलाह आता.
13 माट इद्रम पिससोर पका बेसता पोल्लोतुन आसा कीयलाह आतल इतेके: माक पिसिह केवाल बेरोग़ येसु किर्स्तु देवुळि डीसाते बूमतगा वायनोग़ इनजोर आसा कीयलाह आतल.
14 मुने माट देवुळता अडोतुन पास्कनव कबस्क कीसोर मतल, मति अव कबस्कनाहि किर्स्तु माक विळ्सिह कीतोग़. अह कीसि माक तना मन्कलोर कीयलाह एडिह कीतोग़. कीसि माक बेसताङ कबस्कने गिर्दा आयवालोर कीयलाहि, किर्स्तु मावासाटि तनाय विचरते तना जीवा ईतोग़.
15 अदिनेनाह्क तीतुस नना वेहतह्नन, इव सबे पोल्लोन विस्वसिरिन वेहचि, ओरिह्क दीरा ईम. पूरा अदिकरते कळक पोल्लोते वेहचोर मन. नीक बोने पास्कलाह एमा.