☰ तीतुस 3
3
विस्वसिर बह मनदना
1 विस्वसि मन्कलोरु, मुक्यालोरिन ओसो अदिकरते मनवालोरिन सीता कीसि, ओरा पोल्‍लो केंजिसि मनिर.✡ सबे बेसताङ कबस्क कीयलाहि तयर मनिर.✡ 2 बोनाङे कूदिङ अनमाकिर, जग्ळम केमाकिर, ओङ आयमाकिर, सबेटोरा संगे गूनमते मनिर इनजोर, ओरिह्‌क सीता कीसीम.✡ 3 मुने माट वने बुद तेळियवोरल मतल. पोल्‍लोङ केंजवोरल मतल. माट नाळेम आस मतल. दुस्राङ-दुस्राङ लाग्वाङ लालुस्कना कय इळ्न मन्जि, विचर वातप कींदल.✡ लाग्वाङ कींदल, कुळ्सा अंदल. दुस्रोरिह्‌क एग़्ङ वावालोरल मंदल, ओसो माट वने ओर्विह्‌क-ओर्वोग़ कोटुल कींदल.✡
4-5 मति देवुळि तना मग़िन लोहचि, मन्कन बेचोन जीवा कीस्ता इन्जि, तना गूनम तोहचीता.✡ ओसो माक पिसिह कीता.✡ माट बेसताङ कबस्क कीतल इनजोर, माक पिसिह केवो;✡ मति माक ऊळिस, तनाय दयाते पिसिह कीता.✡ पापम एडनाह मावा जीवातुन नोग़ता,✡ ओसो तना पवित्र जीवाते मावा जीवातुन पूना कीसि, माक पूना पुटमुळ ईता.✡ 6 माक पिसिह केवाल येसु किर्स्तुना मेटे, मावा जीवातगा निंदिस बल्क अरनाह, देवुळि तना जीवातुन वळता.✡ 7 इद्रमलेह्‌का देवुळि माक दया कीसि सेतेमतोर कीता, कीताह्‌कु माट इंजेके तानग्डाहि अमेसाता पिसमुळता तूस दोर्किह कीकल इनजोर, आसा कीयलाह आतल.✡ 8 इंजेके नना रासतन अव पोल्‍लोङ जोलताङ आयोङ. नना नीक वेहतह्‌नन, इव मोदुल पोल्‍लोङ इन्जि, इविस्किन तेळियिह कीसोर मन. अस्के देवुळतुन विस्वस कीतोरु, बेसताङ कबस्क कीयना सीतातेन मनदनुर.✡ नना वेहतव पोल्‍लोङ सबेट्काय बेसताङ, ओसो मन्कलोरिह्‌क पाय्दाताङ पोल्‍लोङ आंदुङ.
पोलु तीतुसिन बुदि काग़्हतह्‌तोग़
9 मति उगसताङ पोल्‍लोने गिटोगटो आयनगा, जोला-जमाताङ लेकाङ-जोकाङ कीयनगा, यहुदिराङ अडोना लोप्पा जग्ळा-बोबा कीयनगा अनमा.✡ अव पोल्‍लोङ उगसताङ, पाय्दालेवाङ आंदुङ.✡ 10 विस्वसिरा संगे गिटोगटो आसि, कोंटेङ पुटिह केवाल मन्कन, उंद-रेंड मल्काङ अद्रम केमा इनजोर, वेहच ऊळा. ओग़ केंजवेके, ओन जेक तासा.✡ 11 इद्रमतोग़ बेसता अग़दाहि लेसतोग़, ओग़ कुदि कसुर आतोग़ इनजोर, ओनाय पापम तोहता,✡ इदिन निमा पुतिन.
आक्रिताङ पोल्‍लोङ
12 नना नीवा बद्लाते, ओर्विन कबळ कीयलाहि लोहतकन: अरतिमास* इनवान, इलवेके आसिया पटटोग़ तुकिकुसिन✡. ओरग्डाह बोग़ाय अके वातेके, निमा नयगा नीकुपुलिस† सहरते वायलाह तयर आयकिन. नना इर्ङमतस्के नीकुपुलिस सहरते मनदलाह, विचर कीतन. 13 जेनास‡ इनवाल वकिल ओसो अपुलोस§, वेर इर्वुर मियेके वासि रोमनुर. वेरा पय्नमते वेरिह्‌क बेस-नेह्‌ना सार-बार कीस लोहा. वेरिह्‌क बातालताये कमि आयमाकि.✡ 14 इद्रमलेह्‌का मावोर विस्वसिर बाताले कबळतुह्‌क अरवा मनदनद आयो. पका गर्ज मता मन्कलोरा गर्जतुन निहतलाह, बेसताङ कबस्क कीयलाह कग़यसोर मनिर.✡
15 इगा नयगा मनवालोर सबेटोर नीक जय येसु वेहतलाह आतोर. ओसो माक जीवा केवालोर, (मावा तोळतोर विस्वसिरिन,) पोलु जय येसु वेहतोग़ इनजोर वेहा. मीट सबेटोरिह्‌क देवुळि देय्वा ईयि.✡
✡ 3:1 रोम सहरतोर 13:1 ✡ 3:1 2 तिमोति 2:21 ✡ 3:2 1 तिमोति 3:3; याकुब 3:17 ✡ 3:3 रोम सहरतोर 11:30; कुलुसितोर 3:7; 2 तिमोति 3:6,; तीतुस 1:16; 2:12 ✡ 3:3 रोम सहरतोर 1:29-30; 1 कुरिंततोर 6:11; 2 तिमोति 3:13 ✡ 3:4-5 रोम सहरतोर 2:4; तीतुस 2:11; 1 पत्रु 2:1-3 ✡ 3:4-5 1:1-4; 2:10 ✡ 3:4-5 इपिसुसतोर 2:9 ✡ 3:4-5 इपिसुसतोर 2:4; 1 पत्रु 1:3 ✡ 3:4-5 योहन 3:5; इपिसुसतोर 5:26 ✡ 3:4-5 योहन 3:3,7; 1 पत्रु 3:21 ✡ 3:6 रोम सहरतोर 5:5 ✡ 3:7 मत्याल 25:34; मार्कल 10:17; रोम सहरतोर 8:17,24; तीतुस 1:1-4 ✡ 3:8 1 तिमोति 5:10; तीतुस 2:7-8,14 ✡ 3:9 1 तिमोति 1:3-4; 2 तिमोति 2:14 ✡ 3:9 2 तिमोति 2:16,23 ✡ 3:10 मत्याल 18:15-16; रोम सहरतोर 16:17; 2 योहन 10 ✡ 3:11 1:13-14 * 3:12 अरतिमास, वेना लोप्पा पूना सास्त्रमते बाताले एक्‍वा वेहतद इले. ✡ 3:12 बळयिर 20:4; इपिसुसतोर 6:21-22; कुलुसितोर 4:7-8; 2 तिमोति 4:12 † 3:12 नीकुपुलिस, इदु एपिरुस इनदनद पटटा उंद सहर आंदु. तान दोहवाल रोम राजेमता ओगुस्तुस कय्सर राजाल आंदोग़, ओग़े येसु पुटटस्के सिरगंचि कीयलाह वेहच मतोग़ (लूकाल 2:1). ‡ 3:13 जेनास, वेना लोप्पा पूना सास्त्रमते बाताले एक्‍वा वेहतद इले. § 3:13 अपुलोस, वेना लोप्पा बळयिर 18:24 वचनते ऊळाट, वेग़ पोलुना बेस तोळतोग़ मतोग़. ✡ 3:13 3 योहन 6 ✡ 3:14 इपिसुसतोर 4:28 ✡ 3:15 कुलुसितोर 4:18
☰