18
Kadɛ lala Babilon
kiboyi
1 Ɩnɩmʋ kamaa mʋ n wu Ɩbwaarɛ kabɔɔ kʋ mɔɔ maa lɩɩ sʋsʋ ɛɛ ba. Ɔ sʋ ɔlʋn lala, nɩɩ mʋ kɩŋalagɛ kɩɩ ŋmaŋɛ kasɛ sʋ kpini.
2 Nɩɩ ɔ taa ɔbʋlɛ lala kuusi yɛ,
“Babilon kadɛ kparɛ mʋ lɩɩ tɩyɛ.
Kadɛ kparɛ mʋ ki boyi biliŋi kɩtaakpan.
Kɩ ba biliŋi nbwɩɩ libi yɛ n‐yaayu libi,
yɛ nbwiibi libi yɛ nbwiibi kisisa ɔbaalakpa.
3 Lɩɩ fɛɛ ɩsʋwʋlɛ sʋ kpini asa ba nuu
kadɛ mʋ kabʋrʋkɔɔnɛ nta bʋlʋnsa mʋ.
Nɩɩ kasɛ sʋ awura kpini bee dii bɛɛ kpɩlɩgɛ
bɛɛ waa kanyɩn yɛ kakyɩɩ biti kɩgyagaa kadɛ mʋ tɔ.
Nɩɩ kasɛ sʋ ayawʋ‐gyipu kpini
ba nyɛ afulee yɛ atɔ tii sʋ lɩɩ kadɛ mʋ ɔfʋʋtɛ
mʋ nɩɩ kɩ nyɛ fʋʋ mʋ sʋ.”
4 Nɩɩ n bɩla nu ɔbʋlɛ kʋ mɔɔ maa lɩɩ sʋsʋ tɔwɛ yɛ,
“Mɛ asa, fan lɩɩ kadɛ mʋ tɔ,
kɛ fan man nyɛ waa alibi mʋ nɩɩ kɩɩ waa mʋ,
kɛ ɩ man naa ba fɛɛ fan nyɛ mʋ kʋsʋ bɩɩtɛ mʋ tɔ ɩkʋ.
5 Lɩɩ fɛɛ mu alibi kpini ɩ kʋʋla ɩ gyaga abaa sʋ naa fʋʋ sʋsʋ,
nɩɩ Ɩbwaarɛ nyiŋi mu alibi kpini yɛ ɩmʋ kʋsʋ bɩɩtɛ sʋ.”
6 Nɩɩ Ɩbwaarɛ tɔwɛ yɛ,
“Fan waa kadɛ mʋ fɛɛ kanan mʋ nɩɩ kɩ waa fanɛ mʋ,
kɛ kɩmʋ alibi mʋ nɩɩ kɩ waa mʋ, fan ka kɩmʋ kʋkɔ ɩlɩɩ ɩnyɔ sʋ.
Nta bʋlʋnsa mʋ nɩɩ kɩ taa sa asa nɩɩ ba nuu mʋ,
fan waa ɩmʋ ɔlʋn kanɩn ɩlɩɩ ɩnyɔ sʋ sa kɩmʋ kɛ ki nuu.
7 Fan yɛgɛ ki gyii awʋrʋfɔ yɛ kanyanla,
fɛɛ kanan mʋ nɩɩ kɩ kyɩna nyɛ bʋnyaa nɩɩ ki gyii ɔkɔn,
nɩɩ kɩ kyɩna kʋsaa mʋ n‐yɩɩ tɔwɛ mʋ kɔkɔlɔ tɔ yɛ,
‘N gyɛ owura‐kyɩɩsa,
n man gyɛ okulapu‐kyɩɩ nɩɩ n mɛɛ yɛ n bɔɔta tɔ kakaakʋ.’
8 Lɩɩ kanɩn sʋ, kakɛ kʋlʋn,
gyerebi ii biti i gyii kɩmʋ,
ɩmʋ ɩ gyɛ lewu yɛ kɩbɔɔta tɔ yɛ akʋn lala.
Nɩɩ fʋlɔn ii biti ɔ dɩyɛ mʋ,
lɩɩ fɛɛ Ɔnyɩrɩpɛ Ɩbwaarɛ mʋ nɩɩ ɛɛ talɛ kɩmʋ mʋ,
ɩ gyɛ Ɔlʋnpʋ.
9 “Kasɛ sʋ awura kpini mʋ nɩɩ bee dii bɛɛ kpɩlɩgɛ, bɛɛ waa kanyɩn yɛ kakyɩɩ biti kɩmʋ tɔ, nɩɩ ba gyii ɔkɔn mʋ, ba kan wu fʋlɔn mʋ nɩɩ ɩ dɩyɛ kɩmʋ idiisii mʋ, bee biti ba su kɛ ba bɔɔta tɔ sa kɩmʋ.
10 Kɩmʋ awʋrʋfɔ mʋ ii biti i waa bamʋ kufuu, ɩmʋ sʋ bee biti ba yɩlɛ kata‐kata kɛ ba su mʋ tɔwɛ yɛ,
‘O! Kadɛ kparɛ Babilon, laakʋ.
Ɔlʋn kadɛ lala Babilon, laakʋ.
Fʋ nyɛ kʋsʋ bɩɩtɛ opula tɔ.’
11 “Kasɛ sʋ ayawʋ‐gyipu bee biti ba su kɛ ba bɔɔta tɔ lɩɩ kɩmʋ sʋ. Lɩɩ fɛɛ ɔkʋ man bɩla ɛɛ sɔɔ bamʋ atɔ fɛsa mʋ.
12 Ɔkʋ man bɩla ɛɛ sɔɔ suwa yɛ gbiti atɔ waasa yɛ ɔgyalɩn abuu ŋalɩgɛsa yɛ ɔgyalɩn agyibi yɛ akalala kparɛ yɛ agoo yɛ ataa lʋʋsa yɛ ɔgyalɩn ataa pɩpɛɛ yɛ abondiri yɛ kʋntɩ anyi atɔ yɛ ɔgyalɩn iyu salɛsa yɛ mɛɛtɔ yɛ abɩlɩtɔ yɛ afʋlɛ fufuli danbɩrasa.
13 Ɔkʋ man bɩla ɛɛ sɔɔ bamʋ atɔ gyisa liifensa yɛ nfɔ sʋswasa liifensa yɛ mɩɩrɛ liifensa yɛ atɔ bɔsa yɛ atuwasa yɛ nta yɛ olifu nfɔ yɛ nnyifo kyɩkyɛɛsa yɛ ayu yɛ ɩnaatɛ yɛ nbʋlʋpʋ yɛ ɩgbaŋɛ yɛ itoroko mʋ nɩɩ atɔbwaaya bɛɛ bɩɩtɛ yɛ anyɛ yɛ asa kayɩɩ‐wʋlɛ abaafʋn mʋ nɩɩ asa bɛɛ fɛ mʋ.
14 “Ayawʋ‐gyipu mʋ bee biti ba tɔwɛ yɛ, ‘Babilon, atɔ danbɩrasa mʋ nɩɩ fu ansi ɩ payɩ fɛɛ fii biti fʋ nyɛ mʋ, ɩ nyaa yɛgɛ fʋ. Fʋ kanyɛ yɛ fʋ kɩtɩɩ kparɛ mʋ kpini ɩ kyʋn. Nɩɩ fʋ man bɩla yɛ fʋ nyɛ ɩmʋ.’
15 Ayawʋ‐gyipu mʋ nɩɩ ba fɛ ɩnɩmʋ, nɩɩ ba nyɛ tɔnɔ lɩɩ kadɛ mʋ tɔ mʋ, lɩɩ kufuu sʋ bee biti ba yɩlɛ kata bɔɔta tɔ, kɛ ba su lɩɩ mʋ gyerebi mʋ sʋ.
16 Kɛ ba tɔwɛ yɛ,
‘O! Kadɛ kparɛ Babilon laakʋ.
Fʋ mʋ nɩɩ fʋ asa ba kyɩna bee bun atɔ danbɩrasa,
fɛɛ akalala kparɛ yɛ ɔgyalɩn ataa pɩpɛɛ yɛ agoo.
Naafɔɔ bamʋ n‐yɩɩ ɩɩ ŋalɩgɛ suwa atɔ yɛ atɔ mʋ nɩɩ ba taa ɔgyalɩn abuu waa yɛ ɔgyalɩn agyibi.
17 Amaa opula tɔ mʋ, fʋ kanɩn npatɩyɛ damantɛ maŋa kpini i muuri.’
“Ɔpʋ sʋ ɩkʋlɩ lala akɩɩsʋpʋ yɛ bamʋ nɩɩ bɛɛ kyɩna ɩkʋlɩ lala tɔ bee kpee ɩkpa, yɛ ɩmʋ apalɩpʋ yɛ bamʋ nɩɩ bɛɛ waa ɩmʋ tɔ kusun mʋ kpini, bee biti ba yɩlɛ kata‐kata.
18 Nɩɩ ba kan wu fʋlɔn mʋ nɩɩ ɩ dɩyɛ kɩmʋ idiisii mʋ, bee biti ba su kuusi yɛ, ‘Kadɛ lala kʋ daa ɔ bʋ tɔ nɩɩ ku du fɛɛ kɩnɩmʋ dubi?’
19 Bee biti ba paata bamʋ amu yɛgɛ bɛɛ bɔɔta tɔ, nɩɩ bee su bɛɛ tɔwɛ yɛ,
‘O! Kadɛ kparɛ Babilon, laakʋ.
Lɩɩ fʋ sʋ nɩɩ bamʋ nɩɩ ba sʋ ɩkʋlɩ lala
bɛɛ waa kusun ɔpʋ sʋ mʋ, ba biliŋi atɔ wuya ana.
Amaa opula tɔ mʋ,
atɔ mʋ nɩɩ fʋ sʋ mʋ kpini i muuri.
20 Nɩɩ ɔbʋlɛ kʋ tɔwɛ yɛ,
Fanɛ mʋ nɩɩ fan bʋ sʋsʋ mʋ, fan yɛgɛ fanɛ ansi i gyii!
Ɩbwaarɛ asa yɛ Krisito asunpu yɛ Ɩbwaarɛ atɔwɛpʋ,
fan yɛgɛ fanɛ ansi i gyii.
Ɩbwaarɛ bɩɩtɛ kɩmʋ kʋsʋ, lɩɩ kanan mʋ nɩɩ kɩ waa fanɛ sʋ mʋ.’ ”
21 Tʋtɔ nɩɩ Ɩbwaarɛ kabɔɔ lʋnpʋ kʋ kukuri kubuu lala kʋ fɛɛ kubuu kɔyɩsa tʋʋ waa ɔpʋ tɔ, nɩɩ ɔ tɔwɛ yɛ,
“Falɛ nɩɩ bee biti ba muuri
Babilon kadɛ lala ɔlʋn sʋ waa ɔpʋ tɔ.
Nɩɩ ba man bɩla yɛ ba wu kɩmʋ kakaakʋ.
22 Babilon kadɛ lala,
ɔkʋ man bɩla yɛ o nu adʋwʋlɛ alanpʋ
yɛ ɩlʋn bɩɩpʋ yɛ nleebi yɛ nbɩlɛ afʋlɛpʋ
kpini sʋ kakaakʋ fʋ tɔ.
Nɩɩ ɔkʋ man bɩla yɛ o wu
abaa tɔ kusun asunpu kʋ,
nɩɩ ɔkʋ man bɩla yɛ o nu
kubuu kɔyɩsa ɩlawʋ fʋ tɔ.
23 Nɩɩ ɔkʋ man bɩla yɛ o wu fɩtɩla fʋ tɔ.
Nɩɩ ɔkʋ man bɩla yɛ o nu ɔkyɩɩfɔ abɛɛ mu‐kuli ɔbʋlɛ fʋ tɔ.
Fʋ ayawʋ‐gyipu ɩ kyɩna
ba gyɛ asa kparɛ kasɛ sʋ,
nɩɩ fʋ taa Sɩtaanɛ adangana
pɩna kasɛ sʋ asa kpini.
24 Kʋtɔ mʋ sʋ nɩɩ Ɩbwaarɛ bɩɩtɛ Babilon kadɛ kʋsʋ mʋ ɩ gyɛ yɛ,
kɩmʋ tɔ nɩɩ Ɩbwaarɛ wu mʋ atɔwɛpʋ
yɛ mʋ asa yɛ bamʋ nɩɩ ba mɔɔ bamʋ
kasɛ sʋ kpini, mʋ nkalan.”