19
Sʋsʋ kensi‐gyii
1 Ɩnɩmʋ kamaa mʋ, n nu ɩlawʋ lala kʋ fɛɛ sakyɔ kʋbʋ lala kʋ maa bʋ sʋsʋ nɩɩ bee kuusi yɛ,
“Haleluya! Fan yɩn Ɩbwaarɛ.
Kamɔlɩgɛ yɛ bʋnyaa yɛ ɔlʋn gyɛ anɛ Ɩbwaarɛ lɛɛ.
2 Lɩɩ fɛɛ mʋ katalɛ ɩ gyɛ kesintin nɩɩ kɩ dɛ ɔkpa.
O bun bʋrʋkɔɔnɛ‐kyɩɩ lala mʋ nɩɩ ɔ taa
mʋ kɩbʋrʋkɔɔnɛ nyita kasɛ sʋ mʋ kʋpwɛ.
Ɩbwaarɛ bɩɩtɛ mʋ kʋsʋ lɩɩ kanan mʋ nɩɩ ɔ mɔɔ mʋ ayaafɔlɛ mʋ sʋ.”
3 Nɩɩ ba bwii kuusi yɛ,
“Haleluya! Fan yɩn Ɩbwaarɛ.
Kadɛ mʋ idiisii ii kpee sʋsʋ kakpaa.”
4 Nɩɩ abɩlɩsa adʋnyɔ yɛ ana yɛ atɔ‐kɩɩsa ana mʋ ba muŋa sun Ɩbwaarɛ mʋ nɩɩ ɔ tɛ kuwura‐gya sʋ mʋ, nɩɩ ba tɔwɛ yɛ,
“Amen! Fan yɩn Ɩbwaarɛ.”
5 Nɩɩ ɔbʋlɛ kʋ lɩɩ kuwura‐gya mʋ asɛ tɔwɛ yɛ,
“Fan yɩn anɛ Ɩbwaarɛ.
Fanɛ mʋ ayaafɔlɛ kpini yɛ fanɛ mʋ nɩɩ fan sɩlɛ mʋ mʋ,
abɩlɩsa yɛ nbii kpini
Fan yɩn anɛ Ɩbwaarɛ.”
6 Nɩɩ n nu ɩlawʋ kʋ fɛɛ sakyɔ maa kuusi mʋ, yɛ nkyu damantɛ maa kyʋn mʋ ɩlawʋ, nɩɩ i du fɛɛ bʋlayɩ kɩpʋntɛ ɩlawʋ ɩɩ tɔwɛ yɛ,
“Haleluya! Fan yɩn Ɩbwaarɛ.
Anɛ‐Nyɩrɩpɛ Ɔlʋnpʋ Ɩbwaarɛ ii gyii kuwura.
7 Fan yɛgɛ ɩ waa anɛ ɔkɔn
kɛ an gyii anɛ ansi kɛ a taa bɛɛrɛɛ sa mʋ
Lɩɩ fɛɛ saŋa fʋʋ fɛɛ Kabʋlʋpʋ mʋ ɔ kpɩɩ mʋ ɔkyɩɩfɔ,
nɩɩ ɔkyɩɩfɔ mʋ kʋʋla mʋ n‐yɩɩ o gyoo.
8 Nɩɩ ba sa mʋ
kɩkyɩɩfɔ kɩtaa fufuli parɛparɛ ŋalɩgɛsa yɛ ɔ dɩla.
(Nɩɩ kɩtaa fufuli mʋ mɔɔ kɩ yɩlɛ sa Ɩbwaarɛ asa mʋ awaasa mʋ nɩɩ i kyiigi).”
9 Nɩɩ Ɩbwaarɛ kabɔɔ mʋ tɔwɛ mɛ yɛ, “Kusee ɩ gyɛ sa bamʋ nɩɩ ba tɩɩ bamʋ ba Ɩbwaarɛ kabʋlʋpʋ mʋ kɩkyɩɩfɔ tɔ agyitɔ kigyii mʋ. Nɩɩ Ɩbwaarɛ kabɔɔ mʋ bwii tɔwɛ yɛ, ‘Ɩnɩmʋ ɩ gyɛ Ɩbwaarɛ kɔnɔ tɔ asɩn kesintin.’ ”
10 Nɩɩ n muŋa mʋ ayaa tɔ kɛ n sun mʋ. Amaa nɩɩ ɔ tɔwɛ mɛ yɛ, “Man waa kanɩn! Ngbaa mɛ n gyɛ Ɩbwaarɛ osunpu nɩn fɛɛ fʋ, yɛ fʋ tɔɔmaa ana mʋ nɩɩ ba sʋ Yesu asɩn mʋ tɔ kesintin mʋ. Muŋa sun Ɩbwaarɛ! Lɩɩ fɛɛ kesintin asɩn mʋ nɩɩ Yesu lɛɛ kaapʋ mʋ, ɩmʋ ɩ gyɛ ɩmʋ nɩɩ Kayaayu yɛgɛ nɩɩ mʋ atɔwɛpʋ mʋ bɛɛ tɔwɛ.”
Gbaŋɛ fufuli mʋ odiipu
11 Nɩɩ n wu sʋsʋ maa bugi tɔ nɩɩ n wu gbaŋɛ fufuli maa yɩlɛ. Gbaŋɛ mʋ odiipu kɩtɩɩ ɩ gyɛ Kesintin gyipu yɛ Kesintin wuya. Ee gyii asɩn ɩmʋ ɔkpa sʋ, nɩɩ ɛɛ kɔ ɩkɔ ɩmʋ ɔkpa sʋ.
12 Nɩɩ mu ansi i du fɛɛ fʋlɔn anobi, nɩɩ awura‐wʋrʋ i bun i bun mu kumu sʋ. Ɔ sʋ kɩtɩɩ kʋ nɩɩ ba kyʋrɔɔ gyaga mʋ sʋ, nɩɩ ɔkʋ man nyi kɩmʋ kasɛ amɔɔ mʋ nkʋn.
13 Nɩɩ o bun balɩmaasʋ mʋ nɩɩ ba taa nyɔ nkalan tɔ, nɩɩ mʋ kɩtɩɩ ɩ gyɛ Ɩbwaarɛ asɩn.
14 Nɩɩ sʋsʋ anaakɔpʋ ba buu mʋ, yɛgɛ bee dii ɩgbaŋɛ fufuli nɩɩ ba bun akalala parɛparɛ.
15 Nɩɩ ɔ sʋ sakunde bʋyɛsa kʋ lɩɩ mʋ kɔnɔ tɔ, kɩmʋ nɩɩ ee biti ɔ taa kɔ gyii ndɛndɛmandɛ sʋ. Ee biti ɔ taa ɔlʋn fɛɛ kɩbɩlɩtɔ mʋ gyii kuwura bamʋ sʋ. Ee biti ɔ taa Ɩbwaarɛ mʋ nɩɩ ɔ gyɛ kʋtɔ kʋmaa sʋ ɔlʋnpʋ mʋ agbʋ lala mʋ taa nyan bamʋ fɛɛ kanan mʋ nɩɩ bɛɛ nyan oyu abi bɛɛ lɛɛ nkyu mʋ.
16 Nɩɩ ɔmʋ nɩɩ o dii gbaŋɛ fufuli mʋ sʋ kɩtɩɩ kʋ nɩɩ ba kyʋrɔɔ gyaga mʋ balɩmaasʋ yɛ mʋ ɔgyan sʋ yɛ,
AWURA TƆ OWURA YƐ ANYƖRƖPƐ TƆ ƆNYƖRƖPƐ.
17 Nɩɩ n wu Ɩbwaarɛ kabɔɔ kʋ maa yɩlɛ kyɔwɛ tɔ. Nɩɩ ɔ pʋntɛ kenken tɩɩ nbwiibi mʋ nɩɩ bee fugi afuu tɔ mʋ yɛ, “Fan ba! Fan ba bʋga kɛ fen gyii agyitɔ damantɛ mʋ nɩɩ Ɩbwaarɛ waa sa fanɛ mʋ.
18 Fan ba gyii awura yɛ anaakɔpʋ abɩlɩsa yɛ alʋlʋnpʋ yɛ ɩgbaŋɛ yɛ bamʋ adiipu yɛ asa kpini yɛ bamʋ nɩɩ bee gyii bamʋ abaa sʋ yɛ anyɛ yɛ asa kparɛ yɛ asansa n‐yɩɩ inun.”
19 Nɩɩ n wu kadʋnbwɛ yɛ kasɛ sʋ awura yɛ bamʋ anaakɔpʋ ba maa naa bʋga ba kɔ yɛ ɔmʋ nɩɩ ee dii gbaŋɛ fufuli mʋ maa mʋ ɔnaakɔpʋ mʋ ɩkɔ.
20 Amaa ba kɩtaa kadʋnbwɛ mʋ yɛ antɩŋɛsa ɔtɔwɛpʋ mʋ nɩɩ ɔ yɩlɛ kadʋnbwɛ ayaa tɔ waa asɩn kyinkyinsa mʋ. Mʋ asɩn kyinkyinsa maŋa nɩɩ ɔ sʋ ɛɛ pɩna, bamʋ nɩɩ ba sʋ kadʋnbwɛ mʋ kakyʋlɛ, nɩɩ ba bɩla bee sun mʋ apɔyɩtɔ ɔdakpa mʋ. Ba taa bamʋ anyɔ maŋa yɛgɛ ba kɩɩ, tʋʋ waa ferinwuta fʋlɔn mʋ nɩɩ kɩɩ yɩlɛ kɩɩ dɩyɛ mʋ tɔ.
21 Nɩɩ gbaŋɛ odiipu mʋ, taa sakunde bʋyɛsa mʋ nɩɩ kɩ lɩɩ mʋ kɔnɔ tɔ mʋ, mɔɔ bamʋ anaakɔpʋ mʋ. Nɩɩ nbwiibi mʋ kpini ba gyii bamʋ inun mʋ naa fʋʋ bamʋ ɔkaa.