5
Xida xalkale balalangit
1 Talaawaa gita atii biaa xida pakpak a malen anuasel gita ta manman lalon balan pula. Nawe di tsaalen xida anuasel, gita ie biexa anua biaa ta xaal sin Moroaa naba man laaliu balalangit, biaa no inaman di ta xap xosaraa taman no liman di.
2 Talaawaa tsaa xida no butsa di teng lolbiir amuina gita saan buxa ngali ugauga taman abia pakpak uul in balalangit.
3 Amuina biaa gita ta ugauga taman abia no pakpak in balalangit, di ba xap tatanginai we, gita belbel.
4 Sinsa biaa gita ta manman tsaa nan abia pakpak, gita teng ma lolbiir ma gita ie mamaet, amuina gita palo ngali met ma gita nii xap ie pakpak, oro Moroaa naba tali sin gita no pakpak uul in balalangit, ngalibi xida no pakpak biaa ta se laa ngali met naba putsi ma naba tino.
5 Talaawaa, Moroaa tsaa aia ta xosaraa gita ma xida no pakpak ngali tino uul, ma tii ga se tali nantanua sin gita malen xan xuxubu ngen mil ngali semaarang naba ta xaalame.
6 Biaabi gita tii ga tigiri atii so we, biaa gita ta tino tsaa lalon pakpak malen xida anua, gita man palaaen tsaa Orong.
7 Gita eses taman tinaalnge ma a xap sin nanen ina namaang ina balan pula.
8 Gita suk atii so, ma iaa sebula paare, gita saan ngali tsuul alen abala pakpak ma gita na man mii Orong.
9 Biaabi gita na atsapngen xida sasaae watwat ngali atatoni Orong nawe xida tino lalon pakpak o lalon tino in balalangit.
10 Amuina gita araraa, gita ba asemat laamuaan xan xalkale ina ininte Karisito, ngalibi gita xuxuuk gita ba tsiili sen iliil ngali senaara gita ta xosaraa ta axaau o ta tsaxa.
Inatalil ina malum
11 Biaabi, amuina gita atii ngali mataatinai Orong, gita ga xonon ngali asaait awatwati no inaman ngali taltaalnge sin Iesu. Moroaa asuk atik axaautsi gita no sen mat laxen inaman ma iaa taalnge we, aleng bula sin nagim no adodo lalon nagim no butsa.
12 Gelulu xap saan ngali pinis atilngi gelulu tsaa sebula laa sin gim, oro gelulu tali abia xolot ngali gim na paraak taman gelulu ngali gim ba pupua ngali xisi abia di, di ta paraak taman maarang di tii lasi ma a xap no maarang lalon xadi no butsa.
13 Nawe no inaman di adodo we gelulu ngong sin nagelulu no adodo, balawaa ngali xan tinaxaa Moroaa; o nawe nagelulu adodo a tutiik, biaa ngali nagim axaau.
14 Sinsa xan titii Karisito a atuaai gelulu ngali taxaa ngali ia, amuina gelulu suk atik axaautsi weaatalaa, taamat axuuk a met ngali inaman araraa, biaabi gelulu se met bula mii ia.
15 Ma ga met ngali gita araraa, ngalibi biaa di ta tino di ba xap tino ngali di tsaa, oro di na tino ngali iwaa ta met ngali di ma ga tapaas mula.
16 Ti laamua gelulu tii lasi inaman malen no inaman ina xolkolmoxo di ta lasi di. Oro xaal atalaa ma laa gelulu ba xap xilalaa xa taamat taman namaang ina abala balan pula. Sinsa gelulu tii nen wenangen Karisito sin abala sal, oro gelulu ba xap xosaraa bula abia.
17 Biaabi nawe saa ia ta man nan Karisito, a se tsap axoxos uul, biaa tino xabaar tii se xap ma biaa axoxos uul a se tsap.
18 Balawaa no araraa axaal sin Moroaa, iwaa tii tali ukbal sin gita ma ia tsaa lalon Karisito, ma tii ga tali abia inatalil ina malum sin gelulu.
19 Sinsa Moroaa a se ukbal sin abala xolkolmoxo mii ia tsaa lalon Karisito, ma tii ga xap iesei xadi no namaang tsaxa no inaman tii epuske mii di. Ma tii ga se tali sin gelulu inesaait ina malum sin no inaman.
20 Moroaa tii tulen gelulu ngali baais ngali Karisito, malen gelulu xan no ngutsu, biaabi tii ga ningi awatwati no inaman ngali tsiili abia xan inesaait, tii ga tulen gelulu ngali baais taman ia. Gelulu ningi awatwati gim sin iesan Karisito ngali gim ba ukbal mii Moroaa.
21 Karisito tii xap xosaraa xaa namaang tsaxa, oro Moroaa aturungi xida no namaang tsaxa papan ia, ngalibi lalon ia mu gita ba tsap no untutiik mii Moroaa.