6
1 Gelu xan no untinaxaa Moroaa ma gelulu ga atsuraa awawati gim ngali gim na xap lii gomsaai xan amiimiilam Moroaa sin ta xap nagim xaa waawaan.
2 Amuina Aisaia a paare,
“Sin leng ina nugu sirsiir mamainaang iaa tii longmien gim,
ma sin leng ina atotoaa xa iaa tiltsoxomi gim.”
Iaa asaaiti gim, talaawaa xan leng Moroaa ina xan sirsiir mamainaang ma talaawaa xan leng ina atotoaa xa.
Xan xaraxin mamaet Pol
3 Gelulu xap aturungi xawas lalon xadi sal no inaman ngali di na litke, ngalibi di ba xap paare tsaxa ngali nagelulu inatalil.
4 Oro, malen xan no untutule Moroaa, gelulu asen gelulu tsaa sin xadi adodo no inaman ngali di ba nan xilalaa gelulu malen gelulu axaau lalon abala inatalil, malen gelulu ta tilwatwat lalon no mat laxen mamaet, no xirabas ma sosong.
5 Di tsaapi gelulu ma di lii gelulu nan anuen lodo. Gelulu man lalon no xaraxin inesas. Nagiem tinaxaa awatwat, gelulu ga xap urange axaau ma gelulu ga adi xaraxin itol.
6 Gelulu taliil lalon namaang ta mixat, taman sinaae ta leng, taman liliis adamis ma namaang mamainaang lalon Nantanua Pat ma lalon titii so.
7 Gelulu baais taman soina totore ma lalon xan xoror Moroaa; mii no urur ina tutiik lalon lima mua ma lima xaiaar.
8 Gelulu lo taltaliil lalon abia inatalil biaa no inaman di ta manglen gelulu ma biaa di ta xap manglen gelulu, biaa no inaman di ta paare tsaxa ngali gelulu ma biaa di ta paʼii gelulu. Gelulu lo taltaliil malen no untinaxaa so, oro di lasi gelulu malen no unaababaa.
9 Di atii gelulu, oro di lasi gelulu malen di xap atii gelulu; gelulu we na se met oro gelulu tino tsaa; di tsaapi gelulu oro di xap sas amantei gelulu.
10 Gelulu suk matabirum tsaxa oro gelulu tigiri taton; gelulu no muun was oro gelulu xosaraa xuduxudu ina di, di ga tsap no untang; gelulu xap ie was oro gelulu tapkina no maarang araraa.
11 Gim no Korin, gelulu se paare alenglengi no maarang so sin gim, ma gelulu ga tsalali nagelulu no butsa laa sin gim.
12 Gelulu xap taxaariti mulangen nagelulu titii sin gim, oro gim taxaariti mulangen nagim titii sin gelulu.
13 Iaa papaare laa sin gim malen nugu no tsixi, malen gelulu ta xosaraa sin gim, gim na tsalel buxaai nagim no butsa bula sin gelulu.
Gim na xap etaxaa mii no muun taltaalnge
14 Gim nangaam etaxaa mii no muun taltaalnge. Amuina namaang tutiik ma namaang tsaxa delulu xap etuna ma xalaleng a xap etaxaa mii lodo.
15 Sen malum biaa labatina Karisito ma Saatan? Iwaa untaltaalnge asen etuna we mii xa muun taltaalnge?
16 Sen mat ukbal biaa labatina Xan Anua Moroaa ma no malagan? Amuina gita tsaa gita Xan Anua Moroaa ta tino. Malen Moroaa ta se paare,
“Iaa ba tino mii di
ma iaa ba eses labatina di,
ma iaa ba tsap xadi Moroaa,
ma di ba tsap nugu inaman.”
17 “Orong a paare, ‘Biaabi, gim na tsuul poroklii di
ma gim na xap man etudim mii di,
Gim nangaam bilten xa maarang na morokon,
ngali iaa ba suei atatoni gim.’ ”
18 “Orong iwaa Belaba a paare. ‘Iaa ba tsap nagim Mom,
ma gim ba tsap nugu no tsi ma tsaxana.’ ”