Inaatel laa sin no
Ibru
1
Moroaa a papaare taman xan tsi
1 Ti laamua Moroaa tii tigiri papaare sin xida no iaaiaa sin no propet lalon no mat laxen sal.
2 Oro talaawaa sin no xapkap ina leng, tii se paare sin gita sin xan tsi, iwaa tii axilangi ngali momtsaxali no mat maarang, ma sin ia tii axosngi bula xolkolmoxo ina inaman.
3 Ia tsilatsila ina xan minaalam Moroaa ma ia patpatsen so ma no matan so Moroaa, ma ga xosaraa no maarang araraa ngali taxaa sin xoror ina xan totore. Tii amixati no namaang tsaxa, mil ga tsotso sin xan lima mua Moroaa ta minaalam lapalaa balalangit.
4 Ma sin abala sal ga tsap lot buxa sin no angelo, malen tsaa abia ies ta momtsaxali asuk mamainaang buxa ngen xadi no.
5 Amuina Moroaa tii xap paare tsaa ngali xaa angelo malen ta paare sin xan tsi. A paare taman abala sin ia,
“Iu nugu tsi;
ma talaawaa iaa se tsap, num Mom.”
Ma lalon biexa inaatel, Moroaa a paare
“Iaa ba tsap xan Mom,
ma ia naba tsap nugu tsi.”
6 Ma sebula biaa tii tali xan tuaa ina tsi xaalame lalon xolkolmoxo ina inaman, ma tii ga paare,
“Xan no angelo araraa Moroaa di na langaari laa sin ia.”
7 Sin no angelo a paare we,
“A xosaraa no angelo ngali tsap no maal
ma xan no untutule, no ie rarar.”
8 Oro laa sin xan tsi a paare we,
“Moroaa, num muina xalkale naba man laaliu
ma num banam naba tali ininte tutiik.
9 Iu se titii abia inatutiik ma iu ga palolii namaang morokon;
biaabi Moroaa, num Moroaa, iu ta manglen a se apati iu taman abia daanwe ina pinaalam,
ngalibi iu ba lapalaa buxa ngen no turaam.”
10 Moroaa a paare bula,
“Sin atiltsoli, Orong, iu tii axosngi balan pula,
ma no balalangit biaa no tinaxaa ina no limaam.
11 Di ba xap araraa, oro iu ba manman
di ba rumi malen uga xabaar.
12 Malen pu uga disdis iu ba putaxi no,
ma malen no pu uga, di ba soxisi no.
Oro iu ba man weaatia
ma num no miet naba xap kap.”
13 Oro Moroaa tii suk xap mager paare sin xaa angelo;
“Tsotso sin nugu lima mua,
pupua iaa ba ta xosaraa num no matenkorot num niaan xutxutsiil.”
14 Moroaa tii tulen xan no angelo ngali di ba tiltsomi biaa no inaman, di ba ta tapkina abia atotoaa.