2
Atewaai gita ngali lolong axaau
1 Biaabi gita na suk long tsiili axaautsi senaara gita tii se alongmen, ngalibi gita ba xap es poroklii abia inesaait.
2 Amuina gita atii we biaa inesaait no angelo di ta paare leng taman aso. Gita atii bula we, no saa di ta xap long amusili no totore, di tii adi abia sosong ina.
3 Biaabi nawe gita sol loxona abia xaraxin atotoaa, gita ba xap pupua ngali xuxii sin abia sosong. Orong tii setauan paatina sin di taman abia inesaait mamainaang, ma di tii lolong xaal sin ia, ma di tii paare leng taman abala inesaait we, a suk so.
4 Moroaa bula a paare leng taman no axixila ma no xaraxin nanen ma no axixila xoror ma sin xan no tinabel Nantanua Pat, a exasen atutiki no amusili xan sirsiir.
Iesu a tsap taamat toto
5 Moroaa tii xap axilangi no angelo ngali laamuangen axaautsi abala xolkolmoxo ina inaman ngen talaa mil, biaa di tii papaare taman.
6 Oro Inaatel Pat tii papaare leng taman,
“Semaarang aila taamat, biaa iu ta suk adodo buxa ngali ia,
O iwaa taamat toto, iu ta tilaamamil buxa sin?
7 U xosaraa ia ngali na man paina no angelo;
U ga atsoben ia taman minaalam ma mangmangle,
8 Ma ga aturungi no maarang araraa paina no xaden.”
Biaa Moroaa ta aturungi no maarang araraa paina ia, a xap poroklii xawas lokobel sin xan banam. Talaawaa tsaa gita xap mager lasi we no maarang araraa a manman paina xan banam.
9 Oro gita lasi Iesu, iwaa tii manman dokdok paina no angelo, talaawaa Moroaa atsoben ia taman minaalam ma mangmangle amuina ngali biaa sosong ina minet. Amuina sin xan amiimiilam Moroaa tii ga pupua ngali xon saaen minet ngali no inaman araraa.
10 Asuk tutiik ngali Moroaa ta axosngi no maarang araraa ma di ga manman ngali xan resres. Moroaa tii laamuangen no tsi ma no tsaxana ngali exasen xan xaraxin mangmangle, amuina ga suk tutiik we, Moroaa atsapngen abia sosong ma minet biaa Iesu ta tsigaii ngali taxaaturung ngali atoaa di.
11 Amiuna Iesu ta apati di ma biaa Mom ta apati di xadi uk Mom mu, Moroaa. Ngali abala muina Iesu ga xap mangiel ngali putsangi di xan no taamat.
12 Ma ga paare sin Mom,
“Iaa ba baais sin nugu no taamat taman iesaam;
Labatina xan matenaanua Moroaa, iaa ba arouki num no paipaʼii.”
13 Iesu a paare bula,
“Iaa tino amuina iaa ta aturungi nugu tinaalnge sin Moroaa.”
Ma a sebula paare,
“Iaa tala mii no tsi iwaa Moroaa tii se tali di sin iaa.”
14 Amuina balawaa xan no tsi Moroaa di tii se tsap taamat toto, Iesu bula a se tsap taamat toto malen di, amuina sin xan minet, naba pupua ngali sas amantei iwaa xa ta taxaana abia xoror ina minet, iwaa Saatan,
15 ma ngali aleiwaai abia di, di ta manman malen no untutule, amuina di mataatinai minet.
16 Amuina a suk leng weaatala, Iesu tii xap xaalame ngali tiltsoxomi no angelo, oro ngali tiltsoxomi xan no iaaiaa Abaram.
17 Biaabi Iesu na suk tsap malen xan no taamat sin no mat sal; ngalibi naba tsap xa untitii ma xa unsausawit lapalaa, gita ta taalnge sin, sin xan tinaxaa Moroaa, ngali xosaraa xa tsutsungit ngali saali xadi no namaang tsaxa no inaman.
18 Amuina ia tsaa tii saaen abia sosong lalon xonkonon, ga pupua ngali tiltsoxomi abia di lalon xonkonon.