17
Iesu a ningning ngali ia tsaa
1 Mulina Iesu ta paare taman abia no maarang, a nanen xaale lapalaa balalangit ma ga ningning:
“Mom biaa leng a se xaalame, aminaalami num tsi ngali num tsi naba aminaalami iu.
2 Amuina iu tsaa iu se tali banam sin ia lapalaa papan no inaman araraa ngali naba tali tino laaliu sin abia di araraa iu tii se tali sin ia.
3 Talaawaa balawaa tino laaliu, ngali di ba atii iu, iu mu Moroaa so, ma Iesu Karisito iwaa iu tii tulen.
4 Iaa se asen num minaalam sin xolkolmoxo ina inaman sin iaa ta se araraai abia tinaxaa iu ta tali sin iaa ngali xosaraa.
5 Ma talaawaa Mom aminaalami iaa lalon no mataam taman abia minaalam tii manman sin iu setauan tsaa sin xolkolmoxo tii atiltsoli.
Iesu a ningning ngali xan no tsi asasing
6 “Iaa se asen iu sin abia di, no saa biaa iu ta tali xaalame sin iaa, xaal sin xolkolmoxo ina inaman. Biaa di num no, iu ta tali di sin iaa ma di ga long amusili num no totore.
7 Talaawaa di atii malen no maarang araraa iu ta tali sin iaa axaal susum.
8 Amuina biaa no inesaait iu tii tali susugu, Iaa tali no sin di, ma di tii ga sirawaa no. Di tii suk atii so malen iaa xaal sin iu, o di ga taltaalnge weaatalaa iu tulen iaa.
9 Iaa ningning ngali di, iaa xap ningning ngali abala xolkolmoxo oro ngali abia di, iu tii se tali sin iaa, amuina di num no tsaa.
10 Nugu no maarang araraa num no, o num no maarang araraa nugu no. Ma minaalam a xaalame sin iaa amusili abia no maarang.
11 Iaa ba xap man adis nan xolkolmoxo, Oro di manman tsaa nan xolkolmoxo ma iaa ba xaalame sangan iu. Mom Pat tilkaali di taman xoror ina iesaam–biaa iesaam iu tii tali sin iaa–amuina ngali di ba xuuk mu malen gitaa ta xuuk.
12 Biaa iaa tii manman mii di, iaa ga tilkaali di taman iesaam u tii tali sin iaa; o iaa tii ga tilaamamil sin di. A xap xa na xaapina oro iwaa xa ta xuuk mu ta xaapina iwaa Moroaa naba ta tulen laa sin tsaxa ina, ngalibi Inaatel Pat naba taxaa puaa.
13 “Iaa xaalame sangan iu talaawaa, oro iaa paare taman biaa no maarang nan xolkolmoxo, ngalibi nugu tataton naba usli lalon di.
14 Iaa se tali num totore sin di, no inaman lalon xolkolmoxo di ngutsulen di, amuina nugu no inaman di xap ina abala xolkolmoxo malen Iaa bula iaa xap ina abala xolkolmoxo.
15 Nugu ningning a xap ngali iu ba saali di lalon xolkolmoxo, oro ngali iu ba tilkaali di sin aia morokon.
16 Di xap ina abala xolkolmoxo, malen iaa bula a xap ina abala xolkolmoxo.
17 Apati di taman soina, num totore asuk so.
18 Malen iu tulen iaa xaalame lalon xolkolmoxo, o iaa tulen di laa lalon xolkolmoxo.
19 Ngali xadi axaau, iaa apati iaa tsaa, ngalibi, di bula di ba apati di taman so.
Iesu a ningning ngali no untinaalnge araraa
20 “Nugu ningning a xap ngali di mu, iaa ningning bula ngali biaa di ba ta taltaalnge sin iaa, amuina sin xadi no inesaait.
21 Ma biaa di araraa, di ba tsap xuuk mu, Mom, malen mu iu lalon iaa, ma iaa lalon iu, ngali di bula di ba manman lalon gitaa ngali xolkolmoxo di ba taltaalnge we iu tulen iaa.
22 Iaa tii se tali sin di abia minaalam biaa iu tii tali sin iaa, ngali di ba xuuk malen gitaa ta xuuk.
23 Iaa lalon di ma iu lalon iaa, ngali di ba man taman xuuk bal araraa, ngali xolkolmoxo di ba atii iu tulen iaa ma iaa se titii di malen iu tii se titii iaa.
24 “Mom, iaa saan ngali abia di iu tii tali di sin iaa, di ba manman mii iaa itaa iaa ta manman ngalibi di ba lasi nugu minaalam, biaa minaalam iu tii se tali sin iaa amuina iu titii iaa, setauan tsaa sin axoxos ina xolkolmoxo.
25 “Mom untutiik laaliu, oro xolkolmoxo a xap atii iu, iaa atii iu. Ma balawaa di ga se atii iu we, iu tulen iaa.
26 Iaa se alengi iu sin di, ma iaa ba tigiri alengi iu, ngali biaa num titii sin iaa naba manman sin di bula, ma ngali iaa tsaa iaa ba manman lalon di.”