18
Di tii tsiili Iesu
(Metiu 26:47-56; Mak 14:43-50; Luk 22:47-53)
1 Biaa tii se ningning araraa, Iesu ma xan no tsi asasing di tapaas ma di tii ga es xitipi maxaaba Kidron. Sin biexa papel ina uma olip biaa, ia mii xan no tsi asasing di tii laa lalon.
2 Judas, iwaa tii babel tali ia nan no liman no matenkorot, tii atik axaautsi abia xolot, amuina Iesu ma xan no tsi asasing di tigiri laa esue lalon abia uma.
3 Judas ga laa lalon abia uma, ma ga giwaa no unmakmaxil in Rom ma biaa no unxoxo ina Xan Anua Moroaa di ta manman paina lalaamua ina no unsausawit ma no Paarasi. Di adi no sul ma no mat maarang ina makmaxil.
4 Iesu atii no maarang araraa naba ta tsap sin, a es sabasuei di ma ga atsuraa di, “Gim tsalei saa?”
5 Di xisi, “Giem tsalei Iesu in Nasaret.”
Iesu ga paare, “Iaa mu atala.” (Judas, iwaa ta babel tali Iesu, atiltil mii di.)
6 Biaa Iesu ta paare we, “Iaa mu atala,” di suk suxa mula ma di tii ga xol lapula.
7 A sebula atsuraa di, “Gim tsalei saa?”
Di sebula paare, “Giem tsalei Iesu in Nasaret.”
8 Iesu a xisi, “Iaa tii se asaaiti gim, iaa mu Iesu. Nawe gim le tsalei iaa, gim na papaalii abala no taamat di na laa.”
9 Balawaa tii tsap ngali taxaa puaa abia xan totore tii asaaiti xan mom, ga we: “Iaa tii xap xosorlii xa na xuuk ina abia di, iu tii tali sin iaa.”
10 Saimon Pita adi xan tetel ma ga tal lii talinga mua ina xan untutule lalaamua ina no unsausawit. (Iesan aia untutule Malkus.)
11 Iesu asaait awatwati Pita, “Aturung mulangen num tetel. Asen parawe, iaa ba xap nun nan abia sobuk nugu Mom tii tali sin iaa?”
Di giwaa Iesu laa sangan Anas
12 No unmakmaxil mii xadi lalaamua no unxoxo ina Xan Anua Moroaa di tsiili Iesu ma di ga pitsi ia.
13 Di setauan giwaa laa sangan Anas, iaanmuna ilaa Kaiapas iwaa tii lalaamua ina no unsausawit sin abia miet. (Kaiapas a maxis sin xan tsaana Anas.)
14 Kaiapas, iwaa tii se anaai tsaa no lalaamua ina no Jiu, tii we asuk mamainaang buxa ngali xa taamat na ilua ngali no inaman se araraa.
Xan lalaamua ina ulis Pita
(Metiu 26:29-70; Mak 14:6-68; Luk 22:55-57)
15 Saimon Pita ma iexa tsi asasing delu es amusili Iesu. Amuina iwaa tsi asasing asuk tsiga amusili Iesu laa lalon xolot lokobel ina xan anua Anas amuina iwaa lalaamua ina no unsausawit tii atik axaautsi aia tsi asasing,
16 oro Pita tii ga til liliis lokobel matenmat. Iexa tsi asasing, unsausawit lapalaa ta atik axaautsi ia, a es mula xaalame matenmat, tii ga paare sin aia tsaana tii tilaamamil sin matenmat, ngali gii atsigali Pita.
17 Iwaa tsaana untutule matenmat tii ga atsuraa Pita, “Iu bula xan tsi asasing aia taamat?”
Pita tii ga xisi, “A xap, a xap iaa.”
18 No unxoxo ina Xan Anua Moroaa ma no untutule di taangi ie ma di ga til malmalil sangan, amuina xobel tii madil buxa, ma Pita bula ga laa til malmalil mii di.
Lalaamua ina no unsausawit atsuraa Iesu
(Metiu 26:59-66; Mak 14:55-64; Luk 22:66-71)
19 Sin abia xolot ina leng, lalaamua ina no unsausawit tii atsuraa Iesu ngali xan no tsi asasing ma xan no asasing.
20 Iesu tii ga xisi, “Iaa xaa paare leng sin xolkolmoxo ina inaman araraa. Iaa tii tigiri asingan no Jiu lalon anua sausawit ma lalon Xan Anua Moroaa, biaa xadi no xolot no inaman Jiu ngali tsaptsap esuei. Iaa xap paare axuina xa totore.
21 Gim atsuraa iaa ngali sa? Gim na atsuraa abia di, di ta alongen iaa, amuina di atii so semaarang iaa ta papaare taman.”
22 Biaa Iesu ta paare taman abala, iexa unxoxo ina Xan Anua Moroaa asuk tabaii ia o ga paare, “Sen mat xixiis abia laa sin lalaamua ina no unsausawit?”
23 Iesu tii ga xisi, “Nawe Iaa paare tsaxa, u na paare leng taman semaarang iaa ta paare tsaxa taman. Oro nawe iaa tii paare so, ngalisa iu ta tabaii iaa?”
24 Mulina abia, Anas a tulen Iesu laa sangan Kaiapas, iwaa lalaamua ina no unsausawit, taman no liman di ta ros atingtingi tsaa.
Nanaalua ma nanaatuul ina xan ulis Pita
(Metiu 26:71-75; Mak 14:69-72; Luk 22:58-62)
25 Saimon Pita tii til malmalil tsaa sangan ie o di sebula atsuraa, “Iu bula xan tsi asasing?”
Pita tii ga uliis, ga paare, “A xap, a xap iaa!”
26 Iexa untutule ina unsausawit lapalaa, asaaiti ia, “Iaa lasi iu mii ia nan uma.” (Iwaa untutule, xan mixap aia taamat Pita ta ritlii talingan nan uma.)
27 Pita a sebula uliis. A xap sauna mu, puraa asuk atiltsoli ngali teng.
Iesu a til laamuaan Pailat
(Metiu 27:1-2, 11-14; Mak 15:1-5; Luk 23:1-5)
28 Lawaareng bingbing tsaa no Jiu di giwaa Iesu xaal sangan Kaiapas lalon xan xariin anua Pailat, iwaa gawana in Rom. No Jiu di xap tsiga lalon xan xobel Pailat amuina sin xadi namaang, nawe di tsiga lalon xadi anua no Rom, di ba xap mixat nan no matan Moroaa ngali di ba xap pupua ngali ngani luxaal ina Esliwaa.
29 Pailat atsuul lokobel sangan no Jiu ma ga atsuraa di, “Ilawaa taamat a xosaraa atsoti semaarang o gim ga gii a xaalamengen?”
30 Di xisi, “Nawe nii xap taamat tsaxa, giem nii xap le tali pan no limaam.”
31 Pailat a paare, “Gim giwaa ma gim na ininte sin, taman nagim no lo tsaa no Jiu.”
Oro no Jiu di xisi Pailat, “Giem xap ie banam ngali sas amantei xa taamat.”
32 Balawaa atsap ngali taxaa puaa xan no totore Iesu tii papatina xan minet naba ta sen met we.
33 Biaa Pailat ta sebula tsiga mula laa lalon xariin anua, ga ilei Iesu ma tii ga atsuraa ia, “Iu xadi King no Jiu?”
34 Iesu tii ga atsura, “Balawaa atsutsura num tsaa, o di asaaiti iu mu taman iaa?”
35 Pailat a xisi, “Iu we, iaa xa Jiu? Num no inaman ma num no lalaamua ina no unsausawit tsaa di le tali iu papan no limaaga. O u xosaraa sa?”
36 Iesu a paare, “Nugu Maradaan a xap in atala lalon xolkolmoxo. Nawe in atala, nugu no untutule di nii ba sas xaali iaa ngali no Jiu di ba xap tsiili iaa. Oro nugu Maradaan ina biexa xobel xaatsap.”
37 Pailat ga paare, “Iu King, ngaa?”
Iesu a xisi, “Iou, iaa King malen iu ta se paare. Nugu nagaa tii taxaana iaa, ngali xosaraa abia tinaxaa, ma iaa tii xaalame lalon xolkolmoxo ina inaman ngali paare leng sin no inaman taman totore so. No inaman araraa di ta atii totore so, di alongen iaa.”
38 Pailat tii atsura, “Samaarang abia totore so?” A sebula tsuul laa lokobel sangan no Jiu, ga paare, “A xap xa muina ngali ilawaa taamat naba til nan ininte.
39 Sin nagim namaang ina xalkale iaa ba aleiwaai xa xaus na xuuk lalon anua lodo, laa sin gim sin leng ina Esliwaa. Gim saan ngali iaa ba aleiwaai xadi King no Jiu?”
40 Di xuup ma di ga paare, “Na xap aia! U na tali Baraabas sin giem!” Iwaa Baraabas tii unsasas.