1 Biaabi nugu no taamat, iaa ningi awatwati gim, sin xan biirbirum Moroaa, ngali tali nagim no pakpak malen xa tsutsungit ta tino ma pat ta atatoni Moroaa biaa sal so ina langlangaari sin ia lalon nagim no butsa. 2 Gim nangaam amusili no namaang ina abala xolkolmoxo, oro gim na poroklii Moroaa na xosor auuli nagim no adodo ngali naba tsap xaatsap, ngalibi gim ba taton ngali asasing sin xan sirsiir Moroaa, sin no maarang ta axaau ma ga atatoni ia, ma ga xap xawas na tsaxa.

3 Sin xan amiimiilam ta tali sin iaa, iaa ba paare sin gim xuxuuk, gim nangaam alet laangen no iesan gim laa lapalaa ta xap xa muina, oro gim na adodo axaau, ngali gim tsaa, gim na amusili biaa xolot ina tinaalnge Moroaa ta tali sin gim. 4 Amuina gita xuxuuk gita ie pakpak ta xuuk, ma ga ie no xolot xuduxudu, ma biaa no xolot di xap xosaraa no uk maarang araraa. 5 Xuduxudu ina gita no untaltaalnge gita uk pakpak lalon Karisito, ma gita xuxuuk, gita ina gita tsaa. 6 Gita xuxuuk gita ie no mat laxen tinabel, amusili biaa amiimiilam Moroaa tii tali sin gita. Nawe num tinabel ngali baais taman xan inesaait Moroaa malen xa propet, u na taxaa amusili num tinaalnge. 7 O nawe num tinabel ngali tiltsomi biexaal, u na tiltsomi di ma nawe num tinabel ngali asasing, u na asasing. 8 O nawe ina taal inanaa, u na taal inanaa, o nawe ngali exasen num no maarang mii biexaal, u na taal buxaai xaa maarang sin di, o nawe ngali tsap lalaamua, u na laamuangen axaautsi no inaman, o nawe ngali tali biirbirum sin biexaal, u na taton ngali tali biirbirum sin di.

9 Nagim no titii na so sin biexaa inaman. Gim na taaltalu sin no namaang morokon ma gim na taxaariiti no namaang axaau. 10 Gim na etitii engen gim malen nagim no taamat so. Gim na taton ngali manglen gim xuxuuk. 11 Gim nangaam pelmet oro gim na taxaa watwat laa sin Orong taman tataton; gim na xosaraa tinaxaa, Orong tii asaaiti gim taman. 12 Gim na taton sin nagim liliis taman tinaalnge. Gim na xale adamis lalon no mamaet. Gim na tigiri sawit sin Moroaa. 13 Gim na exasen nagim no maarang mii xan no inaman pat Moroaa, biaa di ta muun. Gim na suei atatoni no xibong biaa di ta xaalame tatan gim. 14 Gim na atubudaani abia di, di ta taal sosong sin gim, gim na atubudaani di ma gim nangaam xororaa di. 15 Gim na papaalam mii abia di, di ta papaalam; gim na teng mii abia di, di ta tengteng. 16 Gim na ukbal mii gim xuxuuk. Gim nangaam paraak oro gim na turangen no muunwas. Gim nangaam adodo we, gim atii no maarang araraa. 17 Gim nangaam xiis mulangenai namaang morokon, taman namaang morokon. Oro gim na adodo axaau sin sawe ngali xosaraa biaa naba ta tutiik lalon no matan no inaman araraa. 18 Nawe a pupua ngali gim ba xosaraa xawas ngali, gim na tino lalon malina mii no inaman araraa. 19 No turaaga, gim nangaam xisi xa ta tsaapi gim, oro papaalii abia laa sin xan minagaa tutiik Moroaa. Amuina inaatel a paare,