13
Manglen no unbanam
1 Gim no inaman araraa gim na man paina xan banam gawaman. Amuina no banam araraa a xaal sin Moroaa, ma biaa di, di ta adi abia no xalkale ina banam, Moroaa axosngi di atia.
2 Biaabi saa ia ta palolii abia banam, a palolii senaara Moroaa ta se xosaraa ma naba ininte sin di.
3 Amuina no lalaamua di amataatinai no inaman biaa di ta xosaraa namaang tsaxa, a xap ngali abia no inaman di ta xosaraa namaang axaau. Gim saan ngali man lalon abia tino ta xap xa minataa ina banam? Oro gim na xosaraa sawe ta tutiik, ngali di ba manglen gim,
4 amuina di xan no untutule Moroaa ngali nagim axaau. Oro nawe gim xosaraa namaang tsaxa, gim na mataa amuina di ie xoror ngali tali sosong sin gim. Di xan no untutule Moroaa, biaa ta tulen di ngali abala tinaxaa ngali tali sosong sin abia di, di ta xosaraa namaang tsaxa.
5 Biaabi, gim araraa gim na manman paina di, a xap ngali pep alen mu sosong, oro amuina gim atii bula we, biaa maarang a tutiik ngali gim na xosaraa.
6 Amuina sin abala, gim ga uuli taakis bula. Sinsa, biaa no unbanam, di xan no untutule Moroaa, di tigiri taxaa sin abia inatalil sin no leng araraa.
7 Gim na uuli nagim no xiba sin abia di, gim ta ie xiba sin di: Gim na uuli nagim no taakis ma no iliil ina gawaman laa sin abia di, di alalet xuxute ma gim na manglen di, di ta ie banam.
Gim na etitii engen gim
8 Nangaam ie xiba sin xa oro gim na xosaraa abala, gim na etitii engen gim. Nawe gim titii nagim no inaman atataen gim, gim ba xosor puaa xan lo Moroaa.
9 Amuina biaa lo a paare we, “Gim nangaam matul mii taamat o aina ta xap num tubu o num maxis. Gim nangaam sas amantei xaal. Gim nangaam pulapula. Gim nangaam mataxaaxaa.” Ma balawaa lo ta xuuk, a ngaati di araraa, “Gim na titii nagim no inaman atataaen gim malen gim ta etitii engen gim tsaa.”
10 Biaa titii a xap ngali xosor atsaxati xa xaatsap; biaabi biaa titii asuk xosor puaa abia xan lo Moroaa.
Gim na tino lalon sal ta tutiik
11 Gim na xosaraa abala no maarang. Amuina gim atii no sen mat laxen leng abala, gita ta tino lalon. Biaa leng a se tsap ngali gim ba pade sin urarange. Amuina talaawaa atotoaa a se xaalame atat buxa sin gita, malen biaa gita tii setauan taltaalnge.
12 Bing a se laa ngali xap: o leng naba se tsap. Biaabi gita na saali abia no tinaxaa ina lodo ma gita na tamtuel lalon abia bakbaxil ina laleng.
13 Gita na tino tutiik malen no inaman, di ta eses lalon laleng. Gita na xap nun daan watwat sin no luxaal ma gita na xap nun tangtangabaa ma gita na xap matul mii xa ta xap num tubu o maxis ma gita na xap xosaraa xawas taman engangaae ma bal tsaxa.
14 Oro gita na tamtuel lalon xan no namaang axaau, Orong Iesu Karisito ma gita na tilbanti adodo taman no sasaae morokon ina pakpak.