18
Babilon a se xol
1 Mil sin abala, iaa tii lasi iexa angelo ta xaal balalangit. Xan xaraxin banam ma balan pula ga mat geramis sin ta girgiring.
2 Ma taman abia xaraxin ine atol:
“A se xol! A se xol iwaa Xaraxin Babilon.
A se tsap xadi xobel no salawa tsaxa,
ma xadi xobel abia no tanua tsaxa araraa,
ma xadi xobel no mat laxen maan morokon, no inaman di ta ngutsulenlii no.
3 Amuina no inaman labalaba di se nungi
abia waain gogo ina xan no tsuliu.
No king ina balan pula di xosaraa no namaang ina xitxitip minaxis mii ia,
ma no unsusune ina xolkolmoxo di tsap no untang amuina sin xan no xaraxin sirsiir morokon ngali xakaa was xuduxudu xadi no iliil ta laa lapalaa biaa naba ta atatoni ia tsaa.”
4 Mil iaa ga alongmen biexaa ine ta xaal balalangit ta paare,
“Nugu inaman gim tsuul alen Babilon
ngalibi gim ba xap xosaraa abia no uk namaang tsaxa ta xoxosaraa,
ngali gim ba xap adi xan no xaraxin xirabas,
5 Amuina xan no namaang tsaxa asuk matul papan uk turan xaale lapalaa balalangit,
ma Moroaa a se adodomi xan no laklaxei lo.
6 Taal mulangen sin malen sawe tii tali sin gim ma biexaal.
Uul alua ngen ia ngali sawe ta se xosaraa.
A louxaa sobuk morokon ma ga tali sin biexaal
biaabi tali sin ia no sobuk ta lua ina xan louxaa tsaa.
7 Asosongi ma tali abia xaraxin matabirum
malen abia minaalam ina axoxorong biaa tii tali sin ia tsaa.
Lalon xan butsa a paraak,
‘Iaa tsotso malen kwin, iaa xap aina
nal ma iaa ba xap lolbiir.’
8 Biaabi sin xa leng, xan no xaraxin xirabas naba sol liwaa ia malen:
minet, lolbiir, ma xaraxin itol.
Ie naba axaii araraai ia,
amuina iwaa Orong Moroaa, iwaa ta ininte sin aia aina, ia Belaba.
9 “Biaa no king ina balan pula, di ta xitxitip minaxis mii aia aina ma di ga exasen abia xan axoxorong mii, di ba lasi ubaas ina aia aina ta dem, di ba teng lolbiir papan ia.
10 Di ba suk mataatinai buxaai sin naba ta sen saaen sosong we ma di ba til palaaen ia ma di ba suk lolbiir buxa ma di ba paare:
“ ‘Xaraxin xirabas! Xaraxin xirabas biaa xaraxin inaman laba,
o Babilon, inaman laba ina xoror!
Sin aua ta xuuk num ininte a se xaalame!’
11 “Ma no unsusune ina balan pula di ba teng lolbiir ngali aia aina amuina a se xap xa bula ngali uuli xadi no mat maarang.
12 Naba xap xa ngali uuli xadi no goul, silwa, no xaat tsilatsila, ma no xatuul ina xima, uga mamainaang, uga de, silal ma uga tok, no mat xoltin ie ta tso mamainaang, ma no mat maarang di ta xosaraa taman no lian elapan, ie xan iliil ta laa lapalaa ma brons, ain ma no xaat matmirmir tumtumar;
13 A xap xa na uuli xadi no sinaman ma no bunglaa, ma no xilkil ina ie ta malang, di ta axaii ma ga tso marir, waain ma olip daanwe, palawa mimi ma wit; no bulmakau ma no sipsip, no ors ma no karis, ma no inaman biaa di ta sune taman di malen no untutule.
14 “Ma di ba paare we, ‘Iwaa waawaan u ta saan ngali, a se sol loxona iu. Num no minaas araraa ma no matmirmir a se xaapina, ma xa naba xap tsal tatanginai bula.’
15 Biaa no unsusune, di ta sune taman abia no maarang, ma di ga alet buxaai no tang sin aia aina, di ba til laa palpalaa tsaa, amuina di mataatinai abia xan xaraxin sosong aia aina. Di ba teng ma lolbiir.
16 Ma di ba teng, weaatalaa;
“ ‘Xaraxin xirabas! Xaraxin xirabas, biaa xaraxin inaman laba,
di ugauga taman no uga axaau ta de ma ta tok,
ma ga tsilatsila taman goul, no xaat tsilatsila, ma no xatuul ina xima.
17 Lalon aua axuuk, biaa no xariin xuxute asuk maraamen gomsaa!’
“Biaa no unteteie ina no mono, ma no inaman araraa di ta xaa papan mono, ma no untutut, no inaman di ta taxaa lau ngali xadi no xalkale, di ba til palpalaa tsaa.
18 Biaa di ta lasi ubaas ina xan ie ta xaal sin abia xolot di ti auki, di ba xuup we, ‘A xap biexa inaman laba ti, na malen abala xaraxin inaman laba.’
19 Di ba asen xadi no lolbiir sin di ta lii pit papan no xuan di ma di ba teng lolbiir ma papaare;
“ ‘Xaraxin xirabas! Xaraxin xirabas sin xariin inaman laba,
biaa no inaman araraa di ta ie mono lau,
di se tsap no untang sin xan no tang,
Sin aua a xuuk mu, xan no tang ma no maarang ina xuxute asuk maraamen araraa.’ ”
20 Biaa ine xaal balalangit a lo papaare,
“Biaa no inaman araraa balalangit ma xan no inaman Moroaa, no aposal, no propet,
gim na taton we Moroaa a se xosor atsaxati ia.
Amuina Moroaa a se ininte sin ngali abia namaang tsaxa ta xosaraa sin gim.”
21 Mil iexa xaraxin angelo alet tsaxali iexa xaraxin xaat malen xaat ina axaxaitsaa no wit, ga lii laa lalaman ma ga paare we:
“Taman abia uk namaang tsaxa,
biaa xaraxin inaman laba Babilon
iwaa Moroaa naba lii laa lapula abia xaraxin inaman laba ma di ba xap tatanginai bula.
22 No unsarsar taman no mat laxen musik malen arp, piut, tail,
di ba xap alongen di bula lalon iu.
No untinaxaa ina biexaa mat laxen tinaxaa,
di ba xap tatanginai di bula lalon iu.
Biaa tengteng ina abia xaat ina axaxaitsaa no wit,
di ba xap alongen bula lalon iu.
23 Ma rarar ina laam
naba xap bula tsila lalon iu.
Di ba xap alongen bula inan
aia taamat minaxis ma xan tubu lalon xadelulu alaba bula.
Num no unsusune di tii tsap no xaraxin taamat ina xolkolmoxo,
Sin num no pu makmaxar tsaxa, u tii apanaai no inaman labalaba araraa.
24 Lalon xan no sal di tatanginai dalan no propet ma no inaman pat
ma ina biaa no inaman araraa, di ta sas amantei di lalon abala balan pula.”