19
Aleluiaa!
1 Mil sin abala, iaa longmien maarang ta teng malen xaraxin malep lalon balalangit di ta xuupkup;
“Aleluiaa!
Atotoaa xa ma minaalam ma xoror xan xida Moroaa.
2 Amuina aso ma ga suk tutiik xan ininte,
a se atut tali mamaet sin aia aina in nan sal
ta xosor atsoti balan pula taman xan namaang ina xitxitipi minaxis.
Moroaa a se xosor atsoti Babilon amuina a se sas amantei xan no untutule.”
3 Ma di sebula xuup:
Aleluiaa!
Biaa ubaas a laa lapalaa laaliu ma laaliu.
4 Biaa no sangaul alua ma ga laa et ina xusaak ma biaa no tanua tuo ta et, di xol lapula ma di ga langaari laa sin Moroaa, iwaa ta tsotso papan abia muina xalkale. Ma di ga paare;
“Aso Aleluiaa!”
5 Mil ine ta xaal lalon abia muina xalkale, ga paare,
“Paʼii xida Moroaa,
gim araraa xan no untutule,
no saa gim, gim ta mataatinai ia,
biaa di ta lot ma biaa di ta dokdok.”
6 Mil iaa ga alongen maarang ta teng malen xaraxin malep, ga teng malen tinate ina daansel ta sol, ga malen parpararek ta teng lot ga xuup papaare we:
“Aleluiaa!
Amuina xida Orong Moroaa iwaa Belaba a laamuangen no maarang araraa.
7 Gita na paalam ma taton,
ma gita na aminaalami Moroaa!
Amuina xan alaba aia Sipsip Dokdok a se xaalame
ma xan tubu a se saage liliis.
8 Moroaa ga augaugai ia taman
no uga ta matmirmir ta tsilatsila ma ga iaas.”
Amuina uga ta matmirmir a til axilangi xadi no namaang tutiik no inaman pat.
9 Mil iexa angelo ga paare sin iaa; “Atalaa abala, ‘Atubudaani abia di, Moroaa ta ningi di ngali laa sin xan luxaal ina xan alaba iwaa Sipsip Dokdok.’ ” Ma ga paare bula, “Balawaa xan no totore so Moroaa.”
10 Biaa iaa ta alongmen abala, iaa suk sage putput sangan no xaden ngali langaari laa sin. Oro ga paare sin iaa weaatalaa, “Nangaam xosaraa abia, iaa bula iaa untutule mii iu ma mii nagim no taamat biaa di ta taxaariti abia papaare leng ina Iesu. U na langaari laa sin Moroaa! Amuina biaa xan papaare leng Iesu biaa inesaait so ta xaal sin Moroaa.”
Unsosolen os iaas
11 Iaa ga lasi balalangit ta tsalel ma talaa laamuaan iaa os iaas, iwaa unsosolen os iesan Tinaalnge ma Soina. Taman namaang tutiik a ininte ma ga xosaraa no maxil.
12 No matan a malen ie ta rarar, ma papan xuan, no daan bungwal. Papan no isuaan, Moroaa atalaa biexa ies, ma ia mu ta xuuk atii abala ies.
13 Atamtuel nan uga disdis ta madaak taman dal ma iesan Xan Totore Moroaa.
14 No unmakmaxil ina balalangit di amusili ia, di solen no os iaas ma di ga tamtuel lalon no uga iaas axaau ta xap pun.
15 Tsuul xaal lalon ngutsina, bainat ta irom ngali sas lii no inaman labalaba. “Naba laamuangen di taman abia xudak ain ta til axilangi xan banam.” Naba axaxaitsaa abia parpar ina waain taman xan xaraxin minagaa Moroaa iwaa Belaba.
16 Papan xan uga disdis ma papan xan xabaas, balawaa ies,
King ina no king
Ma Orong ina no orong.
17 Ma iaa ga lasi iexa angelo ta tiltil nan pal, iwaa ta xuup lot sin no maan di ta lolo lapalaa nan wang, “Gim xaalame, gim le exumule araraa ngali abala xan xariin luxaal Moroaa,
18 ngalibi gim ba ngani xadi no pakpak no king, ma no lalaamua ma no unmakmaxil ma no os ma no unsosolen os, ma xadi no pakpak no inaman araraa, inaman leiwaa ma no untutule ma biaa di ta lot ma di ta dokdok bula.”
19 Mil iaa tii ga lasi iwaa matauteng ta malen Lungangaa ma no king ina balan pula mii xadi no unmakmaxil di exumule ngali xosaraa maxil ngali epuske mii iwaa unsosolen os mii xan no unmakmaxil.
20 Oro iwaa unsosolen os ga tsiili aia matauteng ma iwaa propet ta xoxosaraa no axixila xoror ababaa ngali ia. Taman abala no axixila xoror, tii apanaai abia di, di tii se adi xan barbar iwaa matauteng ma di ga langaari sin xan patpatsen. Ga lii delulu arie, delu ta tino tsaa, lalon abia ie ulis ta las taman salpa.
21 Iwaa unsosolen os a sas amantei biexaal ina di araraa, taman abia bainat ta tsuul xaal nan ngutsina ma no maan araraa di ga suk balpak taman xadi no pakpak.