17
थिस्सलुनिक्योन गावाम पौलुस
1 ओवता पौलुस एने सिलास अम्फिपुलीस एने अपुल्लोनिया माय रेन थिस्सलुनिक्यो माय आवा, ताहरी यहुदिन एक बोक्ती केरन्यो गेर एतो।
2 पौलुस तान रितीन गेत बोक्तीन गेरा माय गीयो, एने तीन विहेवणेन दिह वोर चोखाली पुस्तेक माय रेन ता हिऱ्यो बोलचाल किरते रिनो।
3 एने ज्यी वातीन मतलब खोली खोलीन सोमजाड़तालो काय मसीह दुख वेठणेन एने मुरेल माय रेन जीव उठणे, जोरेवरी एतो। एने “ज्यो तोस यीशु हे, जान बाराम मी तुमूह पारचार केरथु, मसी हे।”
4 ता माय रेन थोड़ाक माणहे सहमत एन पौलुस एने सिलासा हेऱ्या बेचकाय गीया; बोगवानान बोक्ती केरनारे जुलूम होवटा बिगेर यहुदि बी ता माय बेचकाय गीया, न्या माय महत्वपुर्ण मुखी बायकु बी बेचकायेल एत्यु।
5 पुण यहुदि कुयराय माय बोराय गीया, एने आटा माय रेन थोड़ाक खाराब माणहाह आरही लेदा। एने गेरदी एकठी केरीन गावा माय देंगो केरने बाज गीया, एने यासोनान गेर पोर चेड़ाय केरीन कोसीत केऱ्या काय पौलुस एने सिलासाह माणहान सामने लावे।
6 पुण जेवी ताहरी ताह नाह सापोड़नो, तेवी ता यासोन एने थोड़ाक विश्वासी बायाख गावान आदिकारी फाय गीहलीन ली गीया एने आयड़ीन केणे बाज गीया, “ज्या माणहे आखी जागे तेकलीत पायदा केर दियेल हेते! एने न्या बी आव लागेल हेते,
7 एने यासोन ताह तान गेरा माय थोबाड़ेल हे। एने ता आखान आखा केसर ने उकुमान ज्यो केयीन विरोद केरतेह काय यीशु नावान काल्लो दिहरो राजा हे।”
8 ता माणहाह एने गावान आदिकारीह ज्यो होमलावीन बोड़काव देना।
9 तानकेरता ता यासोनान एने बाकी माणहाफ रेन जामीन लेएन ताह सोड़ देना।
बिरीया गावा माय पौलुस एने सिलास
10 विश्वासी बाहख चालोच रातीम रात पौलुस एने सिलासाह बिरीया माय मोकेल देना; एने ता ताहरी पोचीन यहुदिन बोक्ती केरन्या गेरा माय गीया।
11 ज्या माणहे थिस्सलुनिक्योन यहुदिह रेन मोकला मोनान एता। काहाकाय ता मोटली खुसी माय वचनाह मान लेदा, एने दाड़ीन चोखाली पुस्तेक माय द्यान देन चोकसी केरती रेना काय ज्यी वातु पौलुस कियेल हे, ती खेरी हे काय नाह।
12 ज्यान परिणाम माय रेन जुलूम जाणे; एने ता हेऱ्या जुलूम बिगेर यहुदि बायकु एने एदमी बी बुरहो केऱ्या।
13 पुण जेवी थिस्सलुनिक्योन यहुदिह मालुम एनो काय बिरीया माय बी पौलुस बोगवानान वचन केणे बाजरिनोह, तेवी ता ताहरी बी जाईन माणहाह बोड़कावणे एने देंगो केरने बाज गीया।
14 तेवी विश्वासी बाहख पौलुसाह देरीया निही जाणेन केरता चालोच मोकेल देना, पुण सिलास एने तीमुथीयुस ताहरीच रेय गीया।
15 पौलुसाह विश्वासी बाहख एथेंस वोर ली गीया; एने सिलास एने तीमुथीयुस ने केरता ता पौलुस फाय रेन ज्यो उकुम लेन वोलना काय बेरीया माय ताह जेल्दी मोकेल दिज्यो।
एथेंस गावा माय पौलुस
16 जेवी पौलुस एथेंस माय सिलास एने तीमुथीयुस ने वाट जोवणे बाजरियेल ईतो, ते एथेंस गावाह मुरती माय बोराय रेनोह देखीन नाराज एय गीयो।
17 तानकेरता पौलुस यहुदिन बोक्ती केरन्या गेरा माय यहुदि हिऱ्यो एने बिगेर यहुदि जा बोगवानान आरादना केरताला, एने आटा माय आवती जाते जा माणहे ताह मीलताला ता हिऱ्यो दाड़ीन दिह बोलचाल केऱ्या केरताला।
18 एने थोड़ाक मास्तेर्या इपीकुरी स्तोईकीन टोला माय रेन थोड़ाक पौलुसा हेऱ्या बोलचाल केरने बाज गीया, एने थोड़ाक केया, “ज्यो विणएकल्यो काय केणे हुदेह?”
पुण दिहरा केया, “ज्यो दिहरा देवान पारचार केरनार देखाह।” काहाकाय पौलुस यीशुन पोशो जीव उठणेन पारचार केरतालो।
19 तेवी ता पौलुसाह ता हेऱ्या हेयरान अरीयुपगुसान पोंचा माय ली गीया, एने फुसणे बाज गीया, “आमु जाण सेकतेह काय जो नोवालो हिकवोण तु किथे, काय हे।
20 काहाकाय आमु होमलेल नाह ओहल्यु वातु तु होमलावेह, तानकेरता आमु जाणने होदतेह काय ज्यु वातुन मतलब काय हे।”
21 (काहाकाय आखा एथेंस माय रेणारे माणहे एने ताहरी रेणारे दिहरा देसान माणहे, आखा तान नोवाल्यु नोवाल्यु वातु होमेलने एने केणे माय टेम जावाड़ताला।)
22 तेवी पौलुस हेयरान अरीयुपगुस पोंचान विची माय उबरीन केयो, “एय एथेंस माय रेणारे माणहे, मी देखणे बाजरिनोह काय तुमू आखी बातीन देरमी हेते।
23 काहाकाय जेवी मी हेयरा माय फिरते लेन तुमरे बोक्ती केरनेन जागो देखणे बाजरियेल ईतो, तेवी एक ओहली वेदी बी दिखेल, जी पोर ज्यो लिखेल एतो, ‘एंजाण्या बोगवानान केरता।’ तानकेरता जान तुमू बिगेर देखीन बोक्ती केरतेह, तास ने खुबेर मी तुमूह होमलावथु।
24 जो बोगवान देरती एने ता मायवाली आखी चिजीह बाणायो, तोस हेरोग एने देरतीन मालीक हे, एने तो आथा केरीन बाणायेल मोंदिर माय नाह रेणे।
25 एने नाह एगदी चिजीन गिरेज ने वोजेसे माणहान आथान चाकरी लिथे, काहाकाय तो खुद आखाह जीवाय एने हाह एने आखो काय आपेह।
26 काहाकाय बोगवान एकास माणहान द्वारा आखा माणहाह बाणायो एने आखी देरती पोर रेणेन केरता बाणायेल हे। एने तो पेलुस रेन माणहान टेम ठेराव दिनो एने तान जागान जा ता रेतेह तान एद्दीह बांद दियेल हे।
27 ज्यो ज्यानकेरता किऱ्यो काय माणहे बोगवानाह होदि, एय सिकेह काय ता ता फाय पोचीन सापड़ाव लेय। तीबी तो आपणे माय रेन कुणीह रेन सिटो नाह;
28 जिहकेरीन कुण ते बी कियेल हे, ‘आमु तास माय जीवताला रेतेह एने चालते फिरतेह, एने तास माय आमरो अस्तित्व हे।’ इहीचकेरीन तुमरा कोलाक कवी बी कियेल हेते, ‘आमु बी ते तास ने वोस हेते।’
29 बोगवानान वोस एन आपुह ज्यो केदीच नाय सोमेजणे जुवे काय बोगवान होनो, चांदी एने देगड़ान गेत हे, जो माणहान केला एने विचारा से बाणाय जायेल हे।
30 तानकेरता बोगवान जेवी माणहे ताह नाह जाणताला ता टेम पोर द्यान नाह दिनो, पुण एवी आखी जागेन आखा माणहाह पापा माय रेन पोसतावो केरनेन केरता उकुम आपेह।
31 काहाकाय बोगवान एक दिह ठेरायेल हे, ते दिह तो तान निवाड़ेल एक माणहान द्वारा खेराय से दुनियान नियाव केरी। एने ज्यी वातीन प्रमाण तो ता माणहाह मुरेल माय रेन जिवाड़ेन एकेकाह आप दियेल हे।”
32 मुरेलान पोशो जीवतो एणेन ज्यी वातीह होमलीन माणहे पौलुसान टिंगेल केरने बाज गीया, पुण थोड़ाक माणहे केया, “ज्यी वात आमु तुवा फाय रेन पोशा होमेलने होदतेह।”
33 उलोक एणेन बाद पौलुस तान विची माय रेन निकलीन जात रिनो।
34 पुण थोड़ाक माणहे ता हेऱ्या बेचकाय गीया, एने बुरहो केऱ्या; जा माय दियुनुसीयुस जो पोंचान सदस्य ईतो, एने दमरीस नावान एक बायकु एती, एने ता हेऱ्या उंजु बी थोड़ाक माणहे एता।