18
कुरिंथीयो माय पौलुस
1 तान पासाण पौलुस एथेंस सोड़ीन कुरिंथीयो माय आवो।
2 एने ताहरी पौलुसाह अक्विला नावान एक यहुदि मिलनो तान जेल्मो पुन्तुस माय ईयेल एतो, तो तान बायकु प्रिस्का हेऱ्या इटली रेन एवी एवीच आयेल ईतो, काहाकाय आखा यहुदिह रोम हियोर सोड़ीन जावो इहकेरीन क्लोदियास उकुम आपेल ईतो केरीन तो ता जायेल ईतो।
3 ता एकठास रेताला तान काम एकुच एतो ता तान कामाईन केरता तोम्बु बाणावणेन काम केरताला।
4 पौलुस देर विहेवणेन दिह बोक्ती केरन्या गेरा माय बोलचाल केरीन यहुदिह, एने बिगेर यहुदि माणहाह सोमजाड़नेन कोसीत केरतालो।
5 जेवी सिलास एने तीमुथीयुस मकादुनिया रेन आवा, ते पौलुस वचन होमलावणेन दुंद माय यहुदिह गोवाय देणे बाज गीयो काय यीशुस मसी हे।
6 पुण जेवी यहुदि माणहे विरोद एने चिहटा केरने बाज गीया, ते पौलुस खुद ने फाड़का जेटकीन ताह केयो, “तुमरा मोतीन कारेण तुमू खुद हेते! मी ज्या माय निर्दोस हे। एवी रेन मी बिगेर यहुदि फाय जाह।”
7 ओवतो ता रेन निकलीन पौलुस तीतुस यूसतुस नावान बिगेर यहुदि बोगवानान बोक्ती केरन्या गेरा माय गीयो; जान गेर बोक्ती केरन्या गेरा हेऱ्यो टेकीन एतो।
8 तेवी बोक्ती केरन्या गेरान आदिकारी क्रिस्पुस तान आखो गेराणो मिलीन मालीक पोर बुरहो केऱ्या; एने जुलूम होवटा कुरिंथीयो माय रेणारे जेवी ज्यो होमल्या, ते बुरहो केऱ्या, एने बपतीस्मा लेदा।
9 एने मालीक एक राती देरसेनान द्वारा पौलुसाह केयो, “मा बिय, पारचार किरते जा एने ठावको मा रेय,
10 काहाकाय मी तार हिऱ्यो हे, एने कुण बी तुवा पोर चेड़ाय केरीन तारो दुको नाय केरी। काहाकाय ज्या गावा माय मारा जुलूम होवटा माणहे हेते।”
11 तानकेरता पौलुस तान विची माय बोगवानान वचन हिकाड़ते लेन डेड़ वोरीह वोर रिनो।
12 जेवी गल्लीयो आखाया देसान आदिकारी बोणनो, तेवी यहुदि माणहे एकी केरीन पौलुसान विरोद उबरी गीया, एने ताह कोरटान सामने लावा।
13 एने ज्यो केणे बाज गीया, “ज्यो माणुह आपणा नेमान विरोद बोगवानान उपासना केरनेन केरता माणहाह हिकाड़ेह!”
14 जेवी पौलुस बोलनेस केरतालो, तेवी गल्लीयो यहुदिह केयो, “एय यहुदि, केदी ज्यो काह अन्याय एने गुनान वात रेती, ते हाजो एतो काय मी तुमरी होमेलतो।
15 पुण केदी ज्यो बोलचाल सोबदा, एने नावान एने तुमरेस नेमान बाराम हे, ते तुमूच मीटाड़ो; काहाकाय मी ज्यी वातीन नियाव केरनार नाह बोणने होदित!”
16 एने आदिकारी पौलुसाह कोरटान सामने रेन निकालाव दिनो।
17 पुण आखा माणहे बोक्तीन गेरान आदिकारी सोस्थिनेसाह देरीन कोरटान सामने देना। पुण गल्लीयो ज्यी वातीन उगे कायच द्यान नाह दिनो।
पौलुसान अन्ताकिया आवणो
18 पौलुस जुलूम दिह वोर कुरिंथीयो माय रिनो ओवतो विश्वासी बायाख ने खुबेर लेन डोंडह्या माय बोहीन सीरीया देसाम गीयो एने ता हेऱ्या प्रिस्का एने अक्विला ज्या गीया। तान बाद्या एती, केरीन तो किंख्रिया माय तान मुंडान टाली केरायो।
19 ओवता इफिसुस माय आवा ते पौलुस प्रिस्का एने अक्विला ताहरी उताऱ्यो, एने खुद बोक्ती केरन्या गेरा माय जाईन यहुदि हिऱ्यो बोलचाल केरने बाज गीयो।
20 जेवी तावाला माणहे पौलुसाह थोड़ाक दिह उंजु रेणेन केरता केया, पुण पौलुस नाह मान्यो।
21 पुण ज्यो केयीन, “केदी बोगवानान मोरजी एय ते तुमरी फाय मी पोशो आवुह।” इहकेरीन केयीन पौलुस डोंडह्या माय बोहीन इफिसुस माय रेन निकेलनो;
22 जेवी पौलुस केसरीया माय पोचनो, तेवी उपेर चेड़ीन यरूशलेमान मोंडलीह मिलानो, एने ओवतो नेचो उतरीन अन्ताकिया माय जात रिनो।
23 ओवतो अन्ताकिया माय थोड़ाक दिह रेन पौलुस गलातीया एने फ्रुगीया ईलाका माय लागतो निकेलनो, एने आखा चेलाह विश्वास माय मोजबुत केरती फिरनो।
इफिसुस गाव माय अपुल्लोस
24 अपुल्लोस नावान एक यहुदि, जान जेल्मो आलेकजांडरीया माय ईयेल एतो, जो मोटलो वोक्ता ईतो। एने चोखाली पुस्तेकीह हास केरीन जाणतालो, इफिसुस माय आवो।
25 ताह मालीकान वाटीन हिकवोण जुड़ेल एती, एने मोन लागाड़ीन उत्साह से यीशुन बाराम वात हुतरो केयीन हिकाड़तालो, पुण तो फोक्तो योहान बपतीस्मान बाराम जाणतालो।
26 पौलुस बोक्ती केरन्या गेरा माय ईमोत केरीन केणे बाज गीयो, पुण जेवी प्रिस्का एने अक्विला तान वातु होमल्या ते ताह आपणी हेऱ्या ली गीया, एने बोगवानान वाटीन बाराम उंजु बी हास केरीन सोमजाड्यो।
27 जेवी अपुल्लोस ती पार आखाया जाणेन ठेरायो, तेवी इफिसुस ने विश्वासी बाहख तान ईमोत वोड़ाया, एने आखायान विश्वासी ज्यो लेख्यो काय ता ताह हास केरीन मीले; एने तो ताहरी पोचीन जा बोगवानान गीणान द्वारे विश्वास किरेल एता, ता माणहान तो जुलूम मोदेक किऱ्यो।
28 काहाकाय यीशुस मसी हे, इहकेरीन चोखाली पुस्तेक पोर रेन देखाड़ीन अपुल्लोस जुलूम जोरदार से यहुदिह आखान सामने बोलती बोंद केरती रिनो।