24
पौलुसान विरोद माय आरोप लागाड़नो
1 पाच दिह्यान पासाण हनन्या मुखी चाकर्यो थोड़ाक डायडायाह एने तीरतुल्लुस नावान वोकीलाह आरही लेन केसरीया माय आवा। एने ता फेलीक्स ने सामने पौलुस पोर आरोप लागाड्या।
2 जेवी पौलुसाह हादाड्या, तेवी तीरतुल्लुस पौलुसा पोर गुनो लागाड़ीन केयो,
“एय महामहिम फेलीक्स! तार आगवाय माय आमु जुलूम टेम रेन मोटली सान्ती हेऱ्या रेणे बाजरेनाह, एने तार वोजेसे देसा माय जुलूम हाजो हुदारना ईयेल हे।
3 ज्यीह आमु एकेक जागे एने एकेक बातीन ज्यान स्वागत केरतेह, एने आमु तार जुलूम उपकार मानतेह।
4 मी नाह होदित काय तारो जास्ती टेम लेव, पुण मी तुवाह विन्ता केरथु काय तु थोड़ाक माय आमरी होमली लेय।
5 काहाकाय आमु ज्या माणहाह पिड़ा आपणार एने केलीन आखा यहुदि माणहाम दिंग्गो केरावणार; एने नासरत टोलान पुडारी हे।
6 ज्यो मोंदिराह एठो केरने होदतालो, पुण आमु ज्याह देर लियेल।
7 पुण आदिकारी लुसीयास आवीन ताह जोबेर जोस्ती आमरा आथाम रेन सांडाड़ लिदो।
8 ज्यी आखी वातीन जीन बाराम आमु ज्या पोर गुनो लागाड़तेह, तु खुद ताह चोकसी केरीन जाण लिहे।”
9 यहुदि माणहे बी तान साथ देन मोजबुत केया काय ज्यु वातु खेरीच हेत्यु।
फेलीक्सान सामने पौलुसान वोचणो
10 जेवी आदिकारी पौलुसाह बोलनेन ईसारो किऱ्यो तेवी पौलुस जापाप आप्यो, “मी ज्यो जाणथु काय तु जुलूम वोरह्या रेन ज्या देसान नियाव किरेह, केरीन मी खुसी माय मार बोचावने केरता थोड्युक वातु मी तार सामने मेलने होदथु।
11 तु खुद पुतो लागाड़ सिकेह काय मी यरूशलेम माय बोक्ती केरनेन केरता आवोह, एने माहु बारा दिह्यान उपेर नाह एना।
12 यहुदि माहु नाह कुणी हेऱ्यो बोलचाल किरते मोंदिर माय देख्या, एने नाह यहुदि बोक्तीन गेरा माय एने नाह हेयरा माय माणहाह टुलो केरीन दिंग्गो केरतालो देख्या।
13 एने नाह त्यु वातुह जान बाराम ता एवी मार पोर गुनो लागाड़तेह, तारे सामने ताह खेराय प्रमाणीत केर सेकतेह।
14 पुण मी ज्यो तार सामने मान लेथु: एने जी वाटीह ता जुठो केतेह, तास ने रिती पोर मी आपणा बाप दादान बोगवानान बोक्ती केरथु। पुण मी ज्यो बी बुरहो केरथु, ज्यु वातु मुसान नेम माय एने जाणाव केरनारान पुस्तेक माय लिखेल हे।
15 एने मी बोगवाना पोर तिहेस केरीन बुरहो मेलथु जिहकेरीन ज्या मेलतेह, देरमी एने एदेरमी पोशो जीव उठती तीच आसा मी बोगवाना पोर केरथु।
16 ता माय मी सोता कोसीत केरथु काय बोगवानान एने माणहा माय मारो मोन चोखो रेय।”
17 जुलूम वोरह्यान पासाण मी यरूशलेम माय गेरीब माणहाह दान आपणे, एने बोली चेड़ावणे आयेल हे।
18 एने जेवी मी मोंदिर माय चोखो एणेन रिती पुरी केरने बाजरियेल ईतो, तेवी नाह मार वोजेसे माणहान गेरदी टुलो एनी। एने नाह असान्ती पोसरायेल एती, तेवी माहु ज्या दिरेल।
19 पुण ता आसीया ईलाकान थोड़ाक यहुदि एता; केदी मार विरोद माय ता फाय काह वात एती ते न्या तार सामने आवीन मार पोर गुनो लागाड़ता।
20 एने न्या खुद केय काय जेवी मी मोटला पोंचान सामने उबरियेल ईतो, ते ता मार पोर काल्लो गुनो देखल्या?
21 जेवी मी तान विची माय उबरीन आयड़ीन कियेल ईतो, “मुरेलान पोशो जीव उठणेन बारा माय मार बोरहान कारेण आज तुमरे सामने नियाव एणे बाजरेनीह।”
22 फेलीक्साह ज्यी रितीन बाराम हास केरीन मालुम एतो, ताह इहकेरीन केयीन टाल दिनो, “जेवी पलटनान आदिकारी लुसीयास आवी, तेवी ज्यी वातीन बाराम फेसलो केरूह।”
23 एने आदिकारी उकुम आप्यो काय पौलुसाह थोड़ोक सुट आपीन तान राखवाली किरज्यो, एने तान हाती माय रेन कुणीह बी तान चाकरी केरनेन मा रोकहो।
फेलीक्स एने दुरसीलान ओंगाण पौलुस
24 ओवतो थोड़ाक दिह्यान बाद फेलीक्स तान यहुदि बायकु दुरसीलाह आरही लेन आवो, एने पौलुसाह हादाड़ीन ता बोरहान बाराम जो यीशु मसी पोर हे, ता फाय रेन होमल्यो।
25 जेवी पौलुस हाजाल्यु वातु एने दिर, एने आवणार नियाव ने दिह्यान वातु केरतालो, तेवी फेलीक्स बिन जापाप आप्यो, “एवी तु जा; टेम जुड़ी ते मी पुशो तुवाह हादुह।”
26 ताह पौलुसा पोर आसा एती काय पोयशा जुड़ती; तानकेरता पौलुसाह जाहार ताहार हादिन ताह हिऱ्यो वातु केऱ्या केरतालो।
27 दुय वोरह्यान बाद फेलीक्सान जागा पोर पोर्कियास फेस्तुस नोवालो आदिकारी आवो, एने फेलीक्स यहुदि माणहाह खुस केरनेन केरता पौलुसाह जेली माय मेलीन गीयो।