कुरिंथीयो पौलुस ने लिखा हुआ पहला पत्र
कुरिंथीयो पौलुस लिखेल पेल्लो पोत्रो
ओलखात
प्रेरित पौलुस ज्यी पोत्री यीशुन जेल्मान 55 साल बाद लिखेल। 1:1 पौलुस कुरिंथीयोन ज्यु दुय पोत्रु लिखेल त्युम रेन ज्यी पेल्ली पोत्री हे। पौलुसान मोरजी एती काय तो मकादुनिया जाय, एने जाणे बुखेत एने आवणे बुखेत कुरिंथीन माणहाह बेटाहु मकादुनियान जाणेन पेल तो ज्यो पोत्र लिख्यो तेवी तान रेणो इफिसुस हेयरा माय एतो। 16:5-9
पौलुसाह कुरिंथीयोन मोंडली माय ज्यु बात बातीन समस्या चालने बाजरियेल एती तान जाणकारी ताह जुड़ेल एती, ज्यान जापाप आपणेन केरता पौलुस ज्यो पोत्र लिख्यो कुरिंथीयोन हियोर खाराब एने सिनालान गेत कामे केरनेन बाराम नाव लायेल एतो, तानकेरता ज्यो स्वबाविक एतो काय ओहली समस्या मोंडली माय बी आव लागेल एती। ज्यी दुसरा कुरिंथीयोन पोत्री माय मोंगान बाराम नाव लायेल अद्याय हे तान बी समावेश हे। 13:1-13
रूपरेखा
1. पौलुस ने कुरिंथीयोह नमस्कार एने तान केरता बोगवानान दन्यवाद। 1:1-9
2. मोंडली माय फुटने बाराम होमलेल तान जापाप आपणे। 1:10–4:21
3. सिनालो एने खाराब कामान समस्यान बाराम जापाप आपणे। 5–6
4. वाराड़ान एने मुरतीन चेड़ावो, होवटालान आरादना एने जीवान दान एने पोशो जीव उठणेन बाराम। 7–15
5. वेवारीक एने व्यक्तिगत मुद्दान बाराम। 16:1-24
1
परिचय
1 पौलुसान उगे रेन जो बोगवानान मोरजी माय यीशु मसीन प्रेरित बोणनेन हादाय गीयो, एने बाहख सोस्थिनेसान उगे रेन,
2 बोगवानान ती मोंडलीन नाव जो कुरिंथीयोन गावा माय हेते, मतलब ता मसी यीशु माय एक एणेन केरीन चोखा केराय गीया, एने चोखा एणेन केरता हादाड़ेल हेते, एने तान सोबान नाव बी जा आखी जागे आमरो एने तुमरो मालीक यीशु मसीन नावा माय विन्ता केरतेह;
3 आपणा आबाख ने बोगवानान एने मालीक यीशु मसीन उगे रेन तुमूह गीण एने हुक जुड़ते रेय।
मसी यीशु पोर बुरहो केरनेन द्वारे बोरकेत
4 मी तुमरा बाराम आपणा बोगवानान उपकार जेलेमक्युस मानथु, केरीन बोगवानान जी गीण तुमू पोर मसी यीशु माय एनीह।
5 काय तुमू मसी माय एक एणेन कारेण तुमू आखी वातु माय मतलब आखो वचन एने आखी इकेल माय मालदार एय गीयाह।
6 काय आमरी खुबेर यीशु मसीन बारा माय तुमू माय मोजबुत निकेलनी।
7 ज्यानकेरीन काय काल्लास बोरकेत माय तुमूह कोमी नाय एय, जिहकेरीन तुमू आमरा मालीक यीशु मसीन आवणेन वाट जोवते रेतेह।
8 तो तुमूह मोजबुत केरीन मेली सेवली वार वोर काय तुमू आमरा मालीक यीशु मसीन पोशो आवणेन दिह निर्दोस ठेराणे जुवे।
9 बोगवान विश्वासयोग्य हे, एने तान सुरो मसी यीशुन सेंगेती माय आपुह हादेल हे।
मोंडलीन मेल मिलाप माय फुट
10 एय बाय बोणहा, मी तुमूह आपणा मालीक यीशु मसीन नावा माय विन्ता केरथु, काय तुमू सोब एकुच वात किवो एने तुमरे माय फुट नाय पोड़ने जुवे, पुण एकुच मोन एने एकुच होमच्यो केरीन मिलीन रिवो।
11 एय मार बाय बोणहा, खलोए ने गेराणान माणहे माहु तुमरा बारा माय कियेल हेते, काय तुमरे माय राड़ एणे बाजरेनीह।
12 मारो केणेन मतलब ज्यो हे काय तुमरा माय रेन काल्लोह ते आपणा आपाह “पौलुसान,” काल्लोह “अपुल्लोसान,” काल्लोह “केफान,” ते काल्लोह “मसीन,” किथे।
13 काय मसी वाटाय गीयो? काय पौलुस तुमरे केरता खुरूसखाम पोर चेड़ गीयो? काय तुमूह पौलुसान नावा पोर बपतीस्मा जुड़नो?
14 मी बोगवानान दन्यवाद केरथु काय क्रिस्पुस एने गयुसाह सोड़ीन मी तुमरा माय रेन कुणीह बी बपतीस्मा नाह दिनो।
15 तान केरता कुण नाय केय का तुमूह मार नावा माय बपतीस्मा जुड़ेल।
16 एने होव, मी स्तिफनुसान गेराणाह बी बपतीस्मा केऱ्यो, एने न्याह सोड़ीन मी नाह जाणेत काय मी उंजु कुणीन बपतीस्मा केऱ्यो।
17 काहाकाय मसी माहु बपतीस्मा केरनेन नाह, पुण हाजाली खुबेर होमलावणे मुकलेल हे, ज्यी खुबेर माणहान एकेलीन गेत होमलावणेन नाह, तान केरता काय मसीन खुरूसखाम पोर मोरनेन ताकेत फालतुक नाय खोवाय।
मसी बोगवानान इकेल एने ताकेत हे
18 काहाकाय खुरूसखाम किस्सो खेतेम एणे जाणे बाजरिनोह तान केरता फोगवाय हे, पुण आमु सुटकारो सापड़ावणारान केरता बोगवानान ताकेत हे।
19 काहाकाय देरेम पुस्तेक माय लिखेल हे,
“मी इकेल वालान इकेलाह खेतेम केरूह, एने सोमेजदारान सोमेजाह नाकार केर देह।”
20 केरीन का रेनी इकेल? का रिनो देरेमगुरू? का रिनो जी दुनियान बोलाचाल केरनार? काय बोगवान दुनियान इकेलाह फोगवाय नाह ठेरायो।
21 काहाकाय जेवी बोगवानान एकेलीन गेत दुनियान इकेल माय बोगवानाह नाह सोमज्या ते बोगवानाह ज्यो हाजो लागनो काय ज्या पारचारान “फोगवायान” द्वारे बुरहो केरनेवाला सुटकारो आपी।
22 यहुदि माणहाह ते चोमेत्कारान निसाणी जुवे, एने युनानी इकेल होदतेह।
23 पुण आमु ते ता खुरूसखाम पोर चेड़ायेल मसीन पारचार केरतेह, जो यहुदि माणहान केरता ठोकरान कारेण एने दिहरी जातीन माणहान केरता फोगवाय हे;
24 पुण जाह हादिल हे, काय यहुदि काय दिहरी जातीन माणहे, तान जागे मसी बोगवानान ताकेत एने बोगवानान इकेल हे।
25 काहाकाय बोगवानान फोगवाय माणहान इकेलाह रेन इकेल वालो हे; एने बोगवानान कोमजोरी माणहान जोराह रेन जुलूम जोरवार हेते।
26 एय बाय बोणहा, तुमूह हादाड़ेल तान ते सुचो काय नाह सेरीरान गेत जुलूम इकेल वाला, एने नाह जुलूम ताकेत, एने जुलूम मालदार नाह हेते।
27 पुण बोगवान देरतीन फोगाह निवाड़ लियेल हे, काय इकेल वालाह लाजवाड़े एने बोगवान देरतीन कोमजोराह निवाड़ लियेल हे, काय जोरवाराह लाजवाड़े,
28 एने जी वातु दुनियान नेजेर माय नेची एने जा आपणे आपाह मी कायच नाह सुतो केरीन सोमेजतेह ताह बोगवान निवाड़ लिदो, काय जी वातु एने वोस्तु दुनियान नेजरी माय मोहत्वान हेत्यु, ताह पालतुक ठेरावी।
29 बोगवान ओहलो किऱ्यो, काहाकाय काल्लो बी जेनवेर तान ओंगाण मोठवाय नाय केरी।
30 बोगवान आपु मसी यीशु माय समर्पित केरीन एक एणेन केरता हादिल हे, एने बोगवान आमरे केरता मसीह इकेल बाणायो। एने तान द्वारे नियाव केरनार, एने चोखा एने सुटकारो जुड़ेल ठेरायु।
31 काहाकाय जीहे लिखेल हे तिहेस एय, “जो मोठवाय केरी तो मालीक माय मोठवाय केरी।”