2
खुरूसखाम पोर चीड़ेल मसीन बारा माय खुबेर
1 एय बाय बोणहा, जेवी मी बोगवानान मालमात होमलाव तीन तुमू फाय आवुह, तेवी बोल नाहते इकेल हाजाला हिऱ्यो नाह आवो।
2 काहाकाय मी ज्यो ठाण लियेल ईतो, काय तुमरे विच माय यीशु मसी मतलब खुरूसखाम पोर चेड़ायेल मसीह सोड़ीन दिहरी काल्लीस वातीह नाह जाणेत।
3 मी कोमजोर माय बिय हिऱ्यो एने जुलूम कापते कापतेन तुमरी फाय आवो;
4 मार वचन एने मार पारचार माय एकेलीन लालचावणेन वातु नाह, पुण बोगवानान जीवान ताकेतीन पुरावो ईतो।
5 ज्यानकेरता काय तुमरो बुरहो माणहान इकेल पोर नाह पुण बोगवानान ताकेती पोर टिकीन रेय।
बोगवानान इकेल
6 तीबी निट माणहाम आमु इकेल होमलावतेह पुण ज्यी दुनियान एने ज्यी दुनियान खेतेम एणेवाला आदिकारीन इकेल नाह;
7 पुण आमु बोगवानान तो लिकायेल इकेल, मालमात ने रिती पोर केतेह, जाह बोगवान केल बाणावणेन पेलुच रेन आमरी बोड़ाय ने केरता निवाड़ेल हे।
8 जाह ज्यी दुनियान आदिकारी माय रेन कुणीस नाह जाण्यो, काहाकाय केदी ता जाणता ते बोड़ाय वाला उजालान मालक्याह खुरूसखाम पोर नाय चेड़ावता।
9 पुण जीहे लिखेल हे:
“जी वातु डोला नाह देख्या एने कान नाह होमल्या,
एने जी वातु माणहान मोनाम आवी नाह,
त्यु आखो बोगवान आपणा मोंग मेलनारान केरता तियार किरेल हे।”
10 पुण बोगवान ताह आपणो जीवान द्वारे आमु पोर देखाड़ेल हे, काहाकाय जीव सोब वातु मतलब बोगवानान मिठ्यु वातु बी पारखेह।
11 माणहा माय रेन कुण काल्ली माणहान वातु जाणेह, माणहान जीव उलुस जी वातुह जाणेह जो ता माय हे, तिहेस बोगवानान वातु बी कुणीस नाह जाणेत, पुण बोगवानान जीव उलुस।
12 पुण आपु माय दुनियान जीव नाह, पुण जो जीव जुड़ेल हे तो बोगवानान उगे रेन हे, काय आपु ती वातुह जाणी जी बोगवान आपुह आपेल हे।
13 जाह आपु माणहान हिकाड़ेल एकेलीन वातु माय नाह, पुण बोगवानान जीवान हिकाड़ेल वातु जा माय बोगवानान जीव हे ताह आमु आत्मिक वातु होमलावतेह।
14 पुण जो माणुह बोगवानान जीवान वातु स्वीकार नाह किरेत, काहाकाय तान नेजरी माय फोगवाल्यु वातु हेत्यु, एने तो ताह जाण सिकेह काहाकाय तान पारेख चोखाला जीवान रिती केरीन इती रिथे।
15 जा माय बोगवानान जीव हे तो आखो काय पारेख लिथे, पुण तो सोता कुणीच पारखाय नाह जात।
16 जिहकेरीन देरेम पुस्तेक माय लिखेल हे:
“काहाकाय मालीकान मोन कुण सोमजेल हे काय ताह हिकाड़ी?”
पुण आमु माय मसीन मोन हे।