16
बोरहावाला माणहान केरता फालो
1 एवी ता फालान बारामाय जा बोगवानान माणहे यरूशलेम माय हेते तान केरता टुलो केरने जुवे, जोहलो उकुम मी गलातीयान गावाम वाली मोंडल्यीह आपेल तिहेस तुमू बी किरो।
2 एप्तान पेल्ले दिह तुमरा माय रेन एकेक जाण तुमरी मोंजरीन गेत थोड़ोक तुमूस फाय मेल्या किरो काय माहु आवणे बुखेत फालो नाय केरने पोड़ी।
3 एने जुलबुखे मी आवुह, तुलबूखे जाह तुमू होदतेह ताह मी चिट्ठी आपीन मोकली देह काय तुमरो दान यरूशलेम पोचाड़ देय।
4 केदी मारो बी जाणो हाजो एनो ताहार ता मार हेऱ्या जाती।
पौलुसान यात्रान कार्यक्रम
5 मी मकादुनियाम रेन तुमू फाय आवुह, काहाकाय माहु मकादुनियाम रेन जाणुस हे।
6 पुण एय सिकेह काय तुमरे न्यास थोब जाव, एने हियालो तुमरे न्यास काडु तेवी जी उगे मारो जाणो एय तीस उगे तुमू माहु वाटी लागाड़ दिज्यो।
7 काहाकाय मी एवी थोड़ीक वार ने केरता तुमूह मीलाणे नाह होद्थु, पुण माहो आसा हे, काय केदी मालीकान मोरजी एय ते थोड़ीक वार वोर तुमू हिऱ्यो रेह।
8 पुण मी पिन्तेकुस्त वोर इफिसुस माय रेह,
9 मार केरता ता एक मोटलो एने कामान बायणो उगेड़ रेनोह, एने विरोदी जुलूम हेते।
10 केदी तीमुथीयुस आव जाय, ताहार दिखज्यो काय तो तुमरी न्या मान सम्मान माय रेय; काहाकाय तो मार गेत मालीकान काम केरने।
11 तानकेरता कुण बी ताह बाक्तु मा सुमेजहो, पुण ताह हुकेह जी उगे पोचाड़ दिज्यो, काय तो माह फाय आव जाय; काहाकाय मी तान वाट जोवणे बाजरिनोह, काय तो बाय बोणहा हिऱ्यो आवी।
12 बायाख अपुल्लोसाह मी जुलूम विन्ता किरेल हे, काय तुमू फाय बोणहा हिऱ्यो जाय, पुण तो उलबुखे जाणेन काईच आसा नाह किऱ्यो, पुण जुलबुखे टेम जुड़ी तुलबूखे आव जाय।
सिवल्यो उकुम एने नमस्कार
13 जाकता रिवो, बोरहा माय टिकीन रिवो, बाहदुर बुणो, एने ताकेतवाला ईवो।
14 जो काय केरतेह मोंग माय किरो।
15 एय बाय बोणहा, तुमू स्तिफनुसान गेराणाह जाणतेह काय ता आखायान पेल्ला विश्वासी हेते, एने बोगवानान माणहान सेवा केरनेन केरता तियार रेतेह।
16 केरीन मी तुमूह विन्ता केरथु, काय ओहलान ताबा माय रिवो, जा एकेकान ज्या कामा माय मेहनेत एने मोदेक केरनारे हेते।
17 स्तिफनुस, फुरतूनातुस एने अखइकुस न्या आवाह केरीन मी खुस हे, काहाकाय ता तुमरी कोमीह पुरी किरेल हेते।
18 ता माहु एने तुमूह हुक आपेल हेते, केरीन ओहलाह मानु।
19 आसीयान मोंडलीन उगे रेन तुमूह नमस्कार; अक्विला एने प्रिस्का एने तान गेरान मोंडली बी तुमूह मालीक माय जुलूम जुलूम नमस्कार।
20 आखा बोगवानान बाय बोणहा तुमूह नमस्कार। मसीन मोंग माय गीले मिलीन एका दिहराह नमस्कार किरो।
21 मी पौलुस मार आथा केरीन चिट्ठी लिखेल नमस्कार केरथु।
22 केदी एगदो मालीकाह मोंग निहे केरतेय, ते ता पोर हाय, एय आमरा मालीक आव।
23 मालीक यीशुन गीण तुमू पोर एती रेय।
24 मारो मोंग मसी यीशु माय तुमू सोबा हिऱ्यो रेय। आमेन।