कुरिंथीयो पौलुस ने लिखा हुआ दुसरा पत्र
कुरिंथीयो पौलुस लिखेल दुसरो पोत्रो
ओलखात
दुसरो कुरिंथीयोन ज्यी पोत्री प्रेरित पौलुस यीशु मसीन जेल्मान 55-56 सालान पासाण लिखेल। 1:1 पौलुसान ज्यु दुय पोत्री माय रेन ज्यी दुसरी पोत्री हे। मोकतास पंडित इहकेरीन केतेह काय ज्यी पोत्रीन पेल कुरिंथीयोह एक मोटली कठोर पोत्री लिखेल ईतो। ज्यान बारा माय 2:3-4 ज्यी पोत्रीन बाराम किथे, पुण ज्यी पोत्री आमरे फाय रेन नाह। ज्यी दुसरी कुरिंथीयोन पोत्री ज्यो आंदाज हे काय ज्यो पोत्र मकादुनिया रेन लिख्यो एय। 2:13
ज्यी पोत्रीन विशेष ज्यी बावनात्मक वातु एने माणहान वातीन चेरचा केराय जायेल हे, ज्यी पोत्री माय पौलुस खुसी माणावेह काय पौलुस जो हाजाली चेतावणी पौलुस तीतुस फाय रेन सापड़ायेल हे तान बाराम पौलुस खुसी माणावेह, ज्यी पोत्री आपणेन बारामाय जुलूम हिक आपेह ज्यी नोवाला नेमान गेत आपेल हे, इही देखाह ज्यी हिक ता बाराम हे काय पोयशा आपणेन बाराम लिखेल हे, जा पोयशा यरूशलेम वाला विश्वासीन मोदेक केरनेन केरता लेखाय जायेल एतो, 8–9 जा मोंडली माय थोड़ाक माणहे पौलुसान विरोद केरताला, एने थोड़ाक बाहेर रेन आयेल एता ता जुठा प्रेरित ता विरोदान फायदो विसीन पौलुसाह दाबीन सोतान नाव कामावताला, एने पौलुसान आदिकारा पोर सावाल केऱ्या तान केरता ज्यी पोत्रीन सेवल्या ईसा माय यीशु मसीन प्रेरितान नाता माय जोर दिथे।
रूपरेखा
1. पौलुसान मोंडलीह नमस्कार। 1:1-7
2. पौलुस तान यात्राम बोदलाव केरने एने कुरिंथीयोन बाराम खुबेर जुड़ेल तान बारान एने तान पेल्ली पोत्रीन बाराम केणे। 1:8–7:16
3. यरूशलेम माय रेणारा विश्वासीन केरता दान टुलो केरनेन बाराम पौलुसान सुचना। 8:1–9:15
4. आखरी माय पौलुस तान प्रेरितान वोचाव किरेह, एने तान आवणारी बेटीन बाराम इसारो किरेह। 10:1–13:10
1
परिचय
1 पौलुसान उगे रेन जो बोगवानान मोरजी से मसी यीशुन प्रेरित हे, एने बाहख तीमुथीयुस ने उगे रेन बोगवानान ती मोंडली जी कुरिंथीयो माय हे, एने आखा बोगवानान माणहान नावे जा आखाया माय हेते:
2 बोगवान आपणो आबोख एने मालीक यीशु मसीन उगे रेन तुमूह गीण एने सान्ती जुड़ती रेय।
पौलुस बोगवानाह दन्यवाद केरने
3 आपणो मालीक यीशु मसीन आबाख ने जो बोगवान हे, तान दन्यवाद एय, जो गीण ने आबोख एने आखी बातीन सान्तीन बोगवान हे!
4 तो आमरे आखा संकटाम आमुह दिलासो आपेह, एने आमु ता दिलासान कारेण जो बोगवान आमुह आपेह, ता माणहाह बी दिलासो आप सेकी जा काल्ली बी बातीन संकटाम एती।
5 जिहकेरीन मसीन दुखाम आमु होवटाह बाग लेतेह, तिहेस केरीन आमु दिलासा माय बी यीशुन द्वारे होवटाह बाग लेतेह।
6 केदी संकट आमु पोर आवीह, ते ज्य तुमरे दिलासान एने सुटकारान केरता हे; एने केदी आमुह दिलासो जुड़ेह, ते ज्य तुमूह दिलासो जुड़ी तान केरता हे, ज्य केरने से तुमू दिर देरीन ता संकटाह वेठ लेतेह, जाह आमु वेठतेह।
7 आमरी आसा तुमरे बाराम मोजबुत हे; काहाकाय आमु जाणतेह काय तुमू जिहकेरीन आमरा दुखाम बाग लेतेह, तिहेस केरीन दिलासान बी बागीदार हेते।
8 एय बाय बोणहा, आसीया गावा माय आमु पोर आयेल संकटान बाराम तुमू एंजाणल्या रिहो ओहली आमरी मोरजी नाह सोती। आमु ओहला बारला वोजाम दाबाय जायेल एता, जो आमरी ताकेतीह रेन बाहेर एतो, ओहलो ईयेल एतो काय आमु एवी मोरीस जाहु।
9 एने आमु मोरीस गीयाह ओहलो आमरो मोन आमुह केतालो। ते ज्य तानकेरता एनो काय आमु खुद फिसलो नाह केऱ्या, पुण बोगवाना पोर बुरहो केरी जो मुरेलाह जीवाड़ ने।
10 तोच आमुह मोतीन मोटला संकटाम रेन वोचाड़ेल, एने वोचाड़ी बी; एने ता पोर आमरी ज्यी आसा हे। एने तो आमुह ओंगाण बी खेतेरनाक संकटाम रेन वोचाड़ते रेय,
11 तुमू बी आखा मिलीन विन्तान द्वारे आमरी मोदेक किरो, काय जो मोटलो वरदान मोकतास ने द्वारे आमुह जुड़ेल हे, तान कारेण मोकतास माणहे आमरी उगे रेन दन्यवाद केर सेकी।
सेवा माय जाणेन केरता पौलुसान बोदलाव
12 काहाकाय आमु आमरा मोनान ज्यी गोवाय पोर मोठाय केरतेह, काय दुनिया माय एने खास केरीन तुमरी विचीम; आमरो सोबाव बोगवानाह पोटी ओहलो चोखालो एने खेरायी माय एतो, जो सेरीरान इकेल केरीन नाह पुण बोगवानान गीणी हेऱ्यो एतो।
13 आमरी पोत्री माय ओहलो कायच नाह सोतो, जो तुमू वाच एने सोमेज नाह सेकतेह, एने मारी आसा ज्यी हे काय तुमू सेवली बुखेत आखो काय सोमेज लिहो।
14 एने एवी तुमू थोड़ोक आमुह सोमेजतेह पुण जेदिह मालीक यीशु आवी ते दिह मोठाय किरहो जिहकेरीन आमु तुमरी पोर केरतेह।
15 ज्यास बोरहा हिऱ्यो मी पेल आवणे होदतालो काय तुमू फाय आवो, काय तुमूह एक वार उंजु होवटीह गीण जुड़ी।
16 एने तुमरी हिऱ्यो रेन मकादुनिया माय जाह, एने पुशो मकादुनियाम रेन तुमू फाय आवो, एने तुमू माहु यहुदिया उगे आदेक वोर पोचाड़ दिज्यो।
17 जेवी मी ओहलो विचार किरेल तेवी काय मी संका माय ईतो। एने काय मी ज्यो ठेराव केरथु तो मी सेरीरान गेत केरथु; काय मी वातुम “होव, होव” केरू एने “नाह, नाह” बी केरू?
18 बोगवान आमरो खीरलो गोवा हे; काय ज्यी खुबेर आमु तुमूह कियेल ती होव एने “नाह” दुयू नाह जुड़ते।
19 काहाकाय बोगवानान सोरो यीशु मसी जान आमरे द्वारे मतलब मार एने सिलवानुस ने एने तीमुथीयुस ने द्वारे तुमरी विचीम पारचार एनो, ता माय होव एने नाह दुयू नाह एता, पुण बोगवानान उगे रेन होवुज एती।
20 काहाकाय बोगवानान जोला बी वायदा हेते, ता आखा ता माय “होव” हेऱ्या खेरीच हेते। तानकेरता तान द्वारे “आमेन” बी एनो काय आमरे द्वारे बोगवानान बोड़ाय एय।
21 एने आमुह निवाड़ेन तुमरी हिऱ्यो नाता माय मसीम मोजबुत किरेल हे, तोच बोगवान हे।
22 एने तो आमु पोर साप लागाड़ील हे काय आमु तान हेते, एने चोखालो जीव बी बियानान रूप माय मोनाम आपेल हे, जो आवणारा कालाम जुड़ी।
23 मी बोगवानाह पुरावो मेलीन केथु काय मी कुरिंथीयो माय ज्यानकेरता नाह आवो काय मी तुमूह दोपकाड़ ने नाह होद्थु।
24 ज्यी वात नाह सोती काय आमु बोरहा माय तुमू पोर दाबाव टाकणे होद्तेह, पुण आमु तुमरी खुसीन केरता तुमू हेऱ्या हाती हेते, काहाकाय तुमू बुरहो केरीन मोजबुत रेतेह।