युहन्ना ने लिखा हुआ पहला पत्र
योहान लिखेल पेल्लो पोत्रो
ओलखात
पेल्लो योहान ने पोत्र प्रेरित योहान द्वारे मसीन जेल्मान 50-100 वोरह्यान विचीम लेखाय जायेल ईतो। योहान सोताह लेखणारान रूप माय नाह केत, पुण पेल्लो बाग देखाड़ेह काय तो यीशुन जीवणो एने जीव उठणेन केरता एक गोवा हे। 1:1-3 पेल्लो योहान ने लेखणेन तरीको योहानान हाजाली खोबरीम लिखेल हे तोहलोस ज्यी पोत्री माय लेखणेन तरीको हे। ओहलो केवाह काय योहान योहानान गेत जो हाजाली खुबेर लिखेल ईतो एने इफिसुस माय रेतेन तीन पोत्रु 1 योहान, 2 योहान, 3 योहान हेते।
योहान ज्या पोत्राह आखा बुरहो केरनार बाय बोणहान केरता लिखेल ईतो जेवी मोंडलीह “एकलीवाला” नावान माणहान समुह फाय रेन तेकलीत एणे बाजरियेल एती। न्या माणहान मान्नु एतो काय यीशु पुरी रिती से बोगवान ईतो पुण हासलीन माह एने लुयान सेरीरा हिऱ्यो माणुह नाह ईतो देरती पोर। ज्यास कारेण से योहान यीशुन जीवणान होस आमने-सामने एणेन बाराम लिखेल एने कियेल काय तान आथा केरीन यीशुह सापलेल। 1:1-3 ज्या पोत्राह लेखणेन योहान केणो तान खुसी पुरी केरने एतो। 1:4 बुरहो केरनारा माणहान पाप केरने रोकणेन केरता, 2:1 जुठी हिकवोणाह रेन बुरहो केरनारा माणहाह होमालनेन केरता, 2:26 एने आसवासन आपणे काय बुरहो केरनारे वोच जायेल हेते। 5:13
रूपरेखा
1. योहान ओलखात केरने तान पोत्री एने लेखणेन कारेण केणे। 1:1-4
2. ओवतो तो किथे काय बोगवान उजालो हे एने आपुह तास रूप माय जीवणे जुवे। 1:5–3:10
3. तान पासाण तो आपुह एका दिहराह मोंग केरनेन उकुम एर केरावेह। 3:11–5:12
4. योहान तान पोत्री निवराव्यो। 5:13-21
1
जीवणान वचन
1 ता जीवणान वचनान बाराम जो केलीन सुरवातीम रेन एतो। जाह आमु होमल्या, एने आमु ताह आमरा डोला केरीन देख्या; एने आथा केरीन सापलेल।
2 तो जीवाय आमुह देखानो, एने ताह आमु देख्या, एने तान गोवाय देतेह; एने ता जेलेमक्या जीवणान खुबेर तुमूह आपतेह तो आबाख हेऱ्यो एतो एने एवी आमरी विचीम आवो।
3 एने जो काय आमु देख्या एने होमलेल हेते, तान पुकार पाड़तेह काय तुमू बी आमरा हाती बोणी, एने आपणी मेल ते आबाख हेऱ्यी एने तान बेटाख यीशु मसी हेऱ्यो हे।
4 तुमरी एने आमरी खुसी पुरी एय केरीन आमु ज्यो लेखतेह।
उजाला माय चालनु
5 ज्यी खुबेर आमु तान बेटाख फाय रेन होमलेल हेते, एने तोस तुमूह होमलावतेह, तो ज्योस काय बोगवान उजालो हे, एने ता माय कायच बी आदारो नाह सोतो।
6 केदी ता हेऱ्यी आपणी मेल हे ओहलो आपु केतेह, एने आंदारा माय चालतेह, ते आपु जुठ बोलतेह एने खेरायी पोर नाह चालते।
7 पुण तो जिहकेरीन उजाला माय हे, केदी आपु बी तिहेस केरीन उजाला माय चालहु, ते आपणी एका दिहरा हेऱ्यी मेल एय जाथे, एने तान बिटोख जो यीशु हे तान लुय आपणा आखा पापा माय रेन चोखो किरेह।
8 केदी आपु केहु माहु माय कायच बी पाप नाह सोतो, ते सोताह दुको देतेह, एने आपु माय खेराय नाह सोती।
9 केदी आपु आपणा पापाह मान लेय, ताहार बोगवान आपणा पापाह माफ केरने एने आपुह आखा पापाम रेन चोखो केरने माय बोरहावालो एने खीरलो हे।
10 एने केदी आपु केहु आमु पाप नाह केऱ्या, ते आपु बोगवानाह जुठो ठेरावतेह, एने तान वचन आपु माय नाह सोतो।