2
मसी आमरो मोदेक केरनार
1 एय मारा सोरा, तुमू पाप नाय केरने जुवे केरीन मी ज्यो तुमूह लेखथु; एने केदी एगदो पाप केरी, ते आबाख फाय आपणो एक मोदेक केरनार हे, मतलब सिदो यीशु मसी।
2 एने तोस आपणा पापाह माफ किरेह, एने आपणा ओलाच नाह पुण आखी दुनियान माणहान पापाह बी माफ किरेह।
3 केदी आपु तान उकुमाह मानहो, ते ज्या माय आपु जाण जाहु काय आपु बोगवानाह सोमजी गीयाह।
4 एने जो कुण ज्यो किथे, “मी ताह जाण गीयोह,” एने तान उकुमाह नाह मानेत, तो जुठो हे एने ता माय खेराय नाह सोती।
5 पुण जो कुण तान उकुमाह मानेह, ता माय खेरीच बोगवानान मोंग पुरो एनोह। ज्यासकेरीन आपु जाणतेह काय आपु बोगवानान मेल माय एक हेते;
6 जो कुण इही किथे काय मी ता माय बोणीन रेथु, ताह ज्यो जुवे काय जिहकेरीन मसी यीशु चालेल ईतो तिहेस केरीन तुमू बी चालने जुवे।
नोवालो उकुम
7 एय मोंगाल्ला बाय बोणहा, मी तुमूह काल्लो बी नोवालो उकुम नाह लेखथु, पुण तोस जुनालो उकुम जो सुरवाती माय रेन तुमूह जुड़ेल हे, ज्यो जुनालो उकुम तो वचन हे जाह तुमू होमलेल हेते।
8 तीबी मी तुमूह नोवालो उकुम लेखथु, एने जो मसी माय एने तुमरी माय खेरलो ठेराथे; काहाकाय आदारलो खेतेम ईती जाथे एने खेरायीन उजालो एवी चोमेकणे बाजरिनोह।
9 जो कुण इही किथे काय मी उजाला माय हे, एने तान बायाख हेऱ्यो दुसमोनाय किरेह, तो एवी वोर आंदारा मायच हे।
10 जो कुण तान बायाख मोंग किरेह तो उजाला माय रीथे, एने कुणीन ठोकरान कारेण नाह बोण सिकेत।
11 पुण जो कुण तान बायाख हेऱ्यो दुसमोनाय किरेह, तो एवी वोर आंदारला माय हे एने आदारो तान डोलाह आंदलो केर दियेल हे।
12 एय मारा सोरा, मी तुमूह ज्यो ज्यानकेरता लेखथु काय तान नाव केरीन तुमरा पाप माफ एनाह।
13 एय डायडाया, मी तुमूह ज्यानकेरता लेखथु काय जो सुरवाती रेन हे ताह तुमू जाणतेह। एय जुवान्या, मी तुमूह ज्यानकेरता लेखथु काय तुमू ता खाराबाह जिकेल हेते।
14 एय सोरा, मी तुमूह ज्यानकेरता लिखेल हे काय आबाख तुमू जाण गीयाह। एय डायडाया, मी तुमूह ज्यानकेरता लिखेल हे काय जो सुरवाती रेन हे ताह तुमू जाण गीयाह। एय जुवान्या, मी तुमूह ज्यानकेरता लिखेल हे काय तुमू ताकेतवाला हेते, बोगवानान वचन तुमरे माय बोणीन रीथे, एने तुमू ता खाराबाह जिक लियेल हेते।
15 तुमू दुनियाह एने दुनियान चिजीह मोंग मा किरो। केदी एगदो दुनियाह मोंग किरेह, ते ता माय आबाख ने मोंग नाह सोतो।
16 काहाकाय जो काय दुनिया माय हे, मतलब सेरीरान मोरजी एने डोलान मोरजी एने जीविकान गोमेंड, तो आबाख ने उगे रेन नाह; पुण दुनियास ने उगे रेन हे।
17 दुनिया एने तान मोरजी दुयू खेतेम एते जाथे, पुण जो बोगवानान मोरजी पोर चालेह तो जेलेम बोणीन रेय।
मसीन विरोदी
18 एय मारा सोरा, ज्यो सेवल्यो टेम हे; एने मसीन विरोद केरनार आवण्यो हे ज्यो तुमू जाण लियेल हेते तिहेस केरीन एवी बी मोकतास मसीन विरोद केरनारे बोण गीयाह; ज्या पोर रेन आपुह सोमजाह काय एवी सेवल्यो टेम हे।
19 ता आमरे माय रेन निकलेल, पुण आमरा हाती नाह एता; ता केदी आपणा रेता ते आपणी हेऱ्या रेता। ता माय रेन आपणो कुण नाय मीले ज्यो देखाड़नेन केरता निकेलना।
20 चोखाला जीवा केरीन तुमरो निवोड़ एनोह, एने एवी आखो काय तुमू जाणतेह।
21 तुमूह खेरलो मालुम नाह सोतो केरीन मी ज्यो एवी नाह लिख्यो, पुण ज्यानकेरता काय तुमू ताह जाणतेह, एने ज्यानकेरता काल्लो बी जुठ खेरलान उगे रेन नाह सोतो।
22 जुठो कुण हे? तोच जो यीशुह मसी ना सोतो केरीन नाकारेह; एने मसीन विरोद केरनार तोच हे जो आबाख एने सोराह नाकारेह।
23 जो सोराह नाकारेह ता फाय आबोख बी नाह सुतो; एने जो सोराह मान लिथे, ता माणहा फाय आबोख बी हे।
24 जो हिकवोण सुरवाती रेन तुमू होमलेल हेते, तोच तुमरी माय बोणीन रेय; जो सुरवाती रेन तुमू होमलेल हेते; केदी तो तुमरी माय बोणीन रेय ताहार तुमू बी बेटाख माय एने आबाख माय बोणीन रिहो।
25 एने जान वायदो तो आपणी हिऱ्यो किरेल हे तो जेलेमक्यी जीवाय हे।
26 मी तुमूह ता माणहान बाराम लिखेल ईतो, जा तुमूह बोटकाड़तेह।
27 पुण तुमरो तो चोखालो जीव जो तान उगे रेन ईयेल हे, तुमरे माय बोणीन रीथे; एने तुमूह कुण बी हिकाड़ी तान गिरेज नाह सोती, तान चोखालो जीव तुमूह आखान बाराम हिकाड़ेह, एने तो खेरलो हे जुठो नाह सोतो; जिहकेरीन तो तुमूह हिकाड़ेल हे तिहेस केरीन तुमरे माय बोणीन रीथे।
28 एवी एय सोरा, ता माय एक बोणीन रिवो, ज्यानकेरता काय जेवी तो आवी तेवी आपुह ईमोत रेणे जुवे, एने आपुह तान आवणेन टेम माय तान सामने लाजवाणे नाय पोड़ी।
29 तो सिदो हे ज्यो तुमू एवी जाणतेह, ते जो कुण खेरला काम किरेह, तो बोगवाना फाय रेन पायदा एनोह।