3
बोगवानान सोरा
1 दिखो, आबोख आपुह कोहलोक मोंग किऱ्यो काय आपु बोगवानान सोरा केवाती; एने आपु हेते बी। तान केरता दुनियान माणहे आपुह नाह जाणते, ता ताह बी नाह जाणते।
2 एय मोंगाल्ला बाय बोणहा, एवी आपु बोगवानान सोरा हेते, एने ओंगाण आपु काय बोणहु ज्यो उंजु मालुम नाह पोड़नो! पुण ज्यो मालुम हे काय जेवी तो आवी, तेवी आपु तान गेत एहु; काहाकाय जोहलो तो हे तोहलोस आपुह देखाय।
3 एने जो कुण ज्यी आसा मिलेह, तो सोताह तीह केरीन चोखो किरेह जिहकेरीन यीशु चोखालो हे।
4 जो कुण पाप किरेह, तो बोगवानान नेमान विरोद किरेह; एने पाप ते नेमान विरोदी हे।
5 एवी तुमू ज्यो जाणतेह काय तो ज्यानकेरता आवो काय पापाह उखलीन ली जाय; एने ता माय कायच बी पाप नाह सोतो।
6 जो कुण मसी माय एक एन रीथे तो पाप नाह किरेत; पुण जो कुण पाप किरेह तो ताह दिखेल नाह सोतो एने नाह जाणेत।
7 एय मारा सोरा, कुणीन बी वातु माय फासाहो मा। जा माणहे खेरायीपोणान काम केरतेह ताच माणहे तान गेत सिदा हेते।
8 जा माणहे पाप केरतेह ता सैतानान उगे रेन हेते, काहाकाय सैतान सुरवाती रेन पाप केरती आयेल हे। एने सैतानान कामाह खेतेम केरनेन केरता बोगवानान बिटोख आयेल।
9 जा माणहे बोगवाना फाय रेन पायदा ईयेल हेते ता पाप नाह केर सेकते; काहाकाय तान सोबाव ता माणहा माय बोणीन रीथे, एने ता माणहे पाप केरीच नाह सेकते काहाकाय ता बोगवाना फाय रेन पायदा ईयेल हेते।
10 ज्या पोर रेन बोगवानान सोरा एने सैतानान सोरा जाणाय जातेह; जा माणहे खेरायीपोणान काम नाह केरते ता बोगवाना फाय रेन नाह सोता, एने नाह ता जा सोतान बायाख मोंग नाह केरती।
एका दिहराह मोंग किरो
11 काहाकाय जी खुबेर तुमू सुरवाती माय रेन होमलेल हेते: ती ज्यीच काय एका दिहराह मोंग किरो।
12 एने केनान गेत मा बुणो जो ता बुतड़ाम रेन ईतो, एने सोतान बायाख मार दियेल ईतो। एने ताह काहा मारील काय? तान कामे खाराब एता, एने तान बाहख हाबीलान कामे हाजा एता।
13 एय बाय बोणहा, केदी ज्यी दुनियान माणहे तुमू हेऱ्या दुसमोनाय मेलतेती ताहार बोंगलाहो मा।
14 आमु बायाख मोंग केरतेह ज्या पोर रेन आमुह एवी सोमजेह काय आमु मुरेल माय रेन जीवणाम आयेल हेते, जा माणहे मोंग नाह केरती ता मुरेलान गेत हेते।
15 जो कुण सोतान बायाख हेऱ्यो दुसमोनाय मिलेह, तो खुनी हे; एने एवी तुमू जाणतेह काय काल्ला बी खुनी माय जेलेमक्यी जीवाय नाह रेत।
16 आपु मोंग ज्याकेरीन जाणेल काय मसी आपणे केरता सोतान जीव आप दियेल; एने आपुह बी बायाख ने केरता जीव आपणे जुवे।
17 पुण जा फाय बी ज्यी दुनियान मालदेन एय एने सोतान बायाख ने गिरेज देखीन ता पोर किव केरने नाय होदि, ते ता माय बोगवानान मोंग किहीक बोणीन रेय सिकेह।
18 एय मारा सोरा, आपु बोल एने जिबी केरीन ओलोस नाह, पुण काम एने खेरायीन द्वारे बी मोंग किरो।
बोगवानान सामने ईमोत
19 ज्याकेरीन आपु जाणहु काय आपु खेरायीन हेते; तान बाराम आपु तान सामने आप आपणा मोनाह ईमोत आप सेकहु;
20 जेवी केदी आमरो मोन आमु पोर दोस लागाड़ती रिथे, काहाकाय बोगवान आपणा मोनाह रेन मुठो हे, एने आखो काय जाणेह।
21 एय मोंगाल्ला, केदी आपणो मोन आपुह दोस नाह देतो, ते आपुह बोगवानान ओंगाण ईमोत ईथे।
22 एने जो काय आपु मांगतेह, तो आपुह ता फाय रेन जुड़ेह, काहाकाय आपु तान उकुमाह मानतेह एने जो काय तान नेजरी माय हाजो हे तोच केरतेह।
23 तान उकुम ज्योच हे काय आपु तान सोरा यीशु मसीन नावा पोर बुरहो केरी, एने जिहकेरीन यीशु आपुह उकुम आपेल हे तिहेच केरीन एका दिहरा हेऱ्या मोंग किरो।
24 जा माणहे बोगवानान उकुमाह मानतेह, ता ता माय एने तो ता माय बोणीन रिथे; एने तो जो जीव आपुह आपेल हे, ता पोर रेन आपुह मालुम पुड़ीह काय तो आपु माय बोणीन रिथे।