17
यीशुन वेह बोदेलने
(मरकुस 9:2-13; लुका 9:28-36)
1 सोव दिह्यान पासाण यीशु पतरस, याकुब एने तान बाहख योहानाह आरही लेन उचाला बोयड़ा पोर गीयो, एने ताहरी ताह सोड़ीन दिहरो कुणीस नाह एतो।
2 ताहरी तान सामने यीशुन वेह बोदेल गीयो, एने तान मुय दिह्यान गेत चोमेकनो एने तान फाड़का उजालान गेत दोवल्यो एय गीया।
3 तेवी मुसा एने एलिया यीशु हेऱ्या वातु केरताला ताह देखाना।
4 ज्य देखीन पतरस यीशुह केयो, “एय मालीक, आमरो न्या रेणे हाजो हे, केदी तार मोरजी एय ते मी न्या तीन तोम्बु बाणावुह, एक तार केरता, एक मुसान केरता, एने एक एलियान केरता।”
5 पतरस बोलनेस बाजरियेल ईतोन एक दोवल्यो वादलो ताह डाप लेदो, एने ता वादलाम रेन ज्यो बोल होमलानो: “ज्यो मारो मोंगाल्लो बिटोख हे, ज्या पोर मी जुलूम खुस हे: ज्यान हुमलो।”
6 चेला ज्य होमलीन जुलूम बिय गीया एने मुयान बोरहेस बुंदे जाय पोड़ना।
7 यीशु आहने आवीन ताह सापल्यो एने केयो, “उठो, बिहो मा।”
8 तेवी ता डोला उचा केरीन देख्या, एने यीशुह सोड़ीन दिहराह कुणीस नाह देख्या।
9 जेवी ता बोयड़ा पोर रेन उतरताला, तेवी यीशु ताह ज्यो उकुम आप्यो, “जाह वोर मी माणहान बिटोख मुरेल माय रेन नाय जीव उठी, ताह वोर जो काय तुमू दिखेल हेते, तो कुणीच मा किहो।”
10 ज्य होमलीन चेला यीशुह सावाल केऱ्या, “ओवता देरेमगुरू इही काहा केतेह काय एलियान पेल आवणो जोरवरी हे।”
11 यीशु जापाप आप्यो, “एलिया ते खेरीच आवी एने आखो काय तियार केरी।
12 पुण मी तुमूह खेरीच केथु काय एलिया ते आव लागेल हे, एने माणहे ताह नाह ओलख्या पुण जोहलो जुवे तोहलोस ता हेऱ्या केऱ्या। ठिक तिहेस केरीन माणहान बेटाख बी दुख देती।”
13 तेवी चेला सोमेजना काय तो आपुह योहान बपतीस्मा केरनारान बाराम कियेल हे।
खाराब जीव लागेल सोराह हुदारने
(मरकुस 9:14-29; लुका 9:37-43)
14 जेवी ता गेरदी हेऱ्या पोचना, ते एक माणुह यीशु फाय आवो एने मांड्या पोड़ीन केयो,
15 “एय मालीक, मार सोरा पोर किव केर! काहाकाय ताह फेपरो आवीह एने तो जुलूम दुख विठेह, तो केदी आक्ठा माय पोड़ जाथे, ते केदी पाण्या माय।
16 मी ताह तार चेला फाय लायेल ईतो, पुण ता ताह हुदार नाह सेक्या।”
17 यीशु जापाप आप्यो, “एय अविश्वासी एने कोपट्या माणहा! मी केदीह वोर तुमू हिऱ्यो रेह? एने केदीह वोर तुमरी वेठुह? ता सोराह न्या मार फाय लावो!”
18 तेवी यीशु बुतड़ाह दोपकाड्यो, एने तो ताम रेन निकेल गीयो, एने सोरो चालोच हुदेर गीयो।
19 जेवी यीशु एखालोच ईतो, ते चेला तान आहने आवीन फुशा, “आमु बुतड़ाह बाहेर काहा नाह काड़ सेक्या?”
20 तो ताह केयो, “तुमरा बोरहान कोमीन कारेण,” काहाकाय मी तुमूह खेरीच केथु, केदी तुमरो बुरहो राईन दाणान बाराबोर बी एय, ते ज्या बोयड़ाह केय सिकहो, “न्या रेन हेरकीन ता जातरे,” ते तो जात रेय; एने काल्लीस वात तुमरी केरता एय नाय ओहली नाय रेय।
21 पुण ज्यी जात विन्ता एने उपासान बिगेर नाह निकेलते।
आपणी मोतीन बाराम यीशुन पोशो जाणाव
(मरकुस 9:30-32; लुका 9:43-45)
22 जेवी ता गेलील हेयराम एकठास एता, ते यीशु ताह केयो, “एवी माणहान बिटोख माणहान आथाम देराय जाय,
23 एने ता ताह मार टाकती; पुण तो तीसरे दिह जीव उठी।” चेला ज्य होमलीन जुलूम नाराज एना।
बोक्तीन गेरान फालो
24 जेवी यीशु एने तान चेला कफरनहूम हेयराम आवा, तेवी मोंदिरान फालो लेणारे पतरसान आहने आवीन फुशा, “काय तुमरो गुरू मोंदिरान फालो नाह आपेत?”
25 पतरस केयो “होव आपणे” जेवी तो गेराम आवो, ते यीशु ताह फुसणेन पेल ताह केयो, “एय शमोन, तु काय किथे? देरतीन राजा कुणी फाय रेन फालो लेणे? तान सोरा फाय रेन काय पाराया माणहा फाय रेन?”
26 पतरस ताह केयो, “पाराया माणहा फाय रेन।” यीशु ताह केयो, “ते सोरा वोच गीया।
27 तीबी ज्यानकेरता काय आपु ताह ठोकरा नाय खावाड़हु, तु तेलान मीरे जाईन गेली टाक, एने जो मासो पेल निकली, ताह ली; तान मुय उगाड़ हे, ते तुवाह चांदीन एक सिक्को जुड़ी, ताह लावीन मारे एने तार वोतीन ताह आप दिज्ये।”