18
हेरगान राज माय मोटलो कुण?
(मरकुस 9:33-37; लुका 9:46-48)
1 तुलबूखे चेला यीशु फाय आवीन फुसणे बाज गीया, “हेरगान राज माय आखाम रेन मोठो कुण हे?”
2 ज्य होमलीन यीशु एक आतल्या सोराह हादिन तान विचीम उबो किऱ्यो,
3 एने केयो, “मी तुमूह खेरीच केथु काय, जाह वोर तुमू नाय बुदेलहो एने सोरान गेत नाय बुणहो, तुमू हेरगान राज माय जाय नाय सिकहो।
4 जो कुण आपणे आपाह ज्या सोरान गेत आत्यो केरी, तो हेरगान राज माय मोठो रेय।
5 एने जो कुण मार नाव से एक ओहला सोराह आहने किरेह, तो माहु आहने किरेह।”
पाप केरनेन पारेख
(मरकुस 9:42-48; लुका 17:1-2)
6 पुण जो कुण न्या आत्याम रेन जा मार पोर बुरहो केरतेह, एकाह ठुकोर खावाड़ी, तान केरता हाजो रेतो, काय मोटली गेरटीन पुड़ तान गेला माय टागीन, ताह उंडाला देरीया माय टाकाय जातो।
7 ठोकरान केरता दुनिया पोर हाय ठोकेर लागण्यास हेते; पुण हाय ता माणहा पोरजान उगे रेन ठोकेर लागेह।
8 केदी तार आथ निहे ते पाय तुवाह ठुकोर खावड़ावी, ताहार ताह काटीन जुगार दे; लुलो एने लेंगड़ो एन जीवाय माय रिगणे तार केरता ज्याह रेन हाजो हे! काय दुय आथ नाहते दुय पाय लेन नेरगान आक्ठा माय टाकाय जाही।
9 एने केदी तार डोलान उगे रेन तुवाह ठुकोर लागी, ते ताह काड़ीन जुगार दे, तार केरता ज्योस हाजो हे, काय तु एकुस डुलो लेन जेलेमक्यो जीवाय माय रिगी काय दुय डोला लेन नेरगान आक्ठा माय टाकाय जाही।
टाकायेल मेंड्रान किस्सो
(लुका 15:3-7)
10 दिखो, तुमू न्या आत्याम रेन कुणीह बी नेचा मा सुमजो। काहाकाय मी तुमूह केथु, काय हेरगा माय तान हेरोगदुत मार हेरगावाला आबाख ने मुय कायेम देखतेह।
11 काहाकाय माणहान बिटोख टाकायेल ताह वोचाड़ने आयेल हे।
12 तुमू काय सोमेजतेह? केदी एगदा माणहा फाय एक होव मेंड्रा रेय, एने ता माय रेन एक टाकाय जाय, ते ता नोवह्यान नोव मेंड्राह सोड़ीन पुशो बोयड़ा माय जाईन ता टाकायेल मेंड्राह होदणे जाय काय नाय जाय?
13 एने जेवी ताह सापड़ी जाथे, ते मी तुमूह खेरीच केथु काय तो ता नोवह्यान नोव मेंड्रान केरता जा टाकायेल नाह एता उलो खुस नाय एय, जुलोक काय ज्या मेंड्रान केरता केरी।
14 तिहेस केरीन तुमरा आबाख ने जो हेरगा माय हे ज्यी आसा नाह सोती, काय न्या आत्या माय रेन एक बी खेतेम एय।
बाहख एने बोणीख ने पाप
15 यीशु केयो, “केदी तार बाहख विरोद माय गुनो केरी, ते तु ता फाय जा एने एखालाम ता हिऱ्यो वातु केरीन सोमजाड़ दे। केदी तारी वात मान लेय, ते तु ताह वोचाड़ लिहे।
16 एने केदी तो नाय होमली ते एक दुय जाणाह तार हिऱ्यो लिजा काय आखी वातुन दुय नाहते तीन माणहान पुरावान द्वारे ठेराय जाय।”
17 केदी तो तान वातु बी नाय मानी ते मोंडलीह कि, एने केदी तो मोंडलीम बी नाय मानी ते, ताह तु पापी एने फालो लेणे वालान गेत सोमेज।
पारवांगी आपणु नाह आपणु
18 मी तुमूह खेरीच केथु, “जो बी तुमू देरती पोर बांदहो तो हेरगा माय बी बांदाय जाय, एने जो बी तुमू देरती पोर उगाड़हो तो हेरगाम बी उगड़ी।
19 उंजु मी तुमूह खेरीच केथु, ‘तुमरे माय रेन दुय माणहे देरती पोर एगदी वातुन केरता एक मोन केरीन मारा हेरगावाला आबाख फाय रेन मांगहो, तिहेस तो तुमूह आप देय।
20 काहाकाय जा बी दुय नाहते तीन माणहे मार नाव लेन टुलो एती, ता मी तान विची माय मी रेथु।’ ”
माफ नाह केरनार पावरान किस्सो
21 तेवी पतरस यीशुन आहने आवीन केयो, “एय मालीक, मार बाहख मार विरोद माय गुनो केरी ते, ताह मी कोलाक वारीन माफ केरू, काय हात वार वोर?”
22 यीशु ताह केयो, “मी तुवाह इही नाह केत काय हात वार वोर, पुण हात वारान सेत्तेर वार वोर।”
23 ताच माय हेरगान राज ता राजान गेत हे, जो एक दिह तान पावरान लेखो लेणे हुद्यो।
24 जेवी ईसाब लेणे बाज गीयो ते एक जाण तान ओंगाण लावाय गीयो, तो दोह एजार तोड़ान केरजो लियेल ईतो।
25 जुलबुखे केरजो सुटणेन केरता ता फाय काय नाह एतो, तान मालीक केयो, “ज्याह एने ज्यान बायकु सोराह, एने जो काय बी ज्या फाय हे तो आखो वेच दिवो, एने तो केरजो सुटाड़ाय जाय।”
26 तेवी तो पावोर तान पाया पोड़ीन केयो, “एय मालीक, दिर खा माहु थोड़ाक दिह उंजु आप, मी किहीक बी केरीन तारो आखो केरजो सुट देह।
27 तेवी ता पावरान मालीक ता पोर किव केरीन ताह सोड़ दिनो, एने तान आखो केरजो माफ केर दिनो।”
28 पुण जेवी तो पावोर बाहेर आवो। ते तान हाती एक पावरा माय रेन एक ताह मिलानो, तो तान एक होव दिनार केरजो लियेल ईतो, तेवी तो ताह देरीन गिलो दाबीन केयो, “जो काय सुट सिकेह तो सुट दे।
29 तेवी तान हाती पावोर तान पाया पोड़ीन केयो, ‘थोड़ाक दिह दिर खा मी तारो आखो केरजो सुट देह!’
30 पुण तान वात तो नाह होमल्यो एने जाहु वोर केरजो नाह बुरेत ताह वोर जेलीम कोंड दिनो।
31 तेवी हाती पावोर ज्य देखीन जुलूम दुखी एना, एने जाईन मालक्याह आखी वात केय देना।
32 तेवी तान मालीक ता पावराह हादिन केयो, ‘एय खाराब पावोर, तु माहु फाय विन्ता किरेल एने मी तारो आखो केरजो माफ केर दियेल,
33 ता माय जिहकेरीन मी तार पोर किव किरेल तिहेस केरीन काय तुवाह बी तार हातीन पावराह बी माफ केरनु एतो।’
34 एने तान मालीक जुलूम रागाईन ताह डेंड आपणारान आथाम होप दिनो, एने जाह वोर केरजो बोर नाह देत ताह वोर तान आथाम रेय।”
35 “इहीचकेरीन तुमरे माय रेन एगदो तान बायाख पुरो मोन से माफ नाय केरी, ते मारो आबोख बी जो हेरगाम हे तुमरा पाप माफ नाय केरी।”