20
अंगुरान वाड़ी माय काम केरनारा मोंजऱ्यान किस्सो
1 “हेरगान राज” एगदा गेरान मालक्यान गेत हे, जो विगोस उठीन बाहेर गीयो, काय तान अंगुरान वाड़ीम मोंजर्या लागाड़ी।
2 तो मोंजऱ्याह एक दिनार दिह्या पोर ठेरावीन, ताह तान अंगुरान वाड़ी माय मुकल्यो।
3 पुशो तो नोव वासता, निकलीन, दिहरा माणहाह बाजाराम उदेड़ उबरियेल देख्यो।
4 एने ताह केयो, “तुमू बी अंगुरान वाड़ी माय जावो, एने जो काय ठिक हे तो तुमूह आपुह।”
5 तेवी ता बी गीया पोशो तो दिहरे वार बारा वासता एने तीन वाचतान आहने निकलीन तिहेच किऱ्यो।
6 एक पाच वासता तो पुशो निकलीन दिहराह उबरियेल दिख्यो, एने ताह केयो, “तुमू काहा न्या दिह बोर उदेड़ उब रेनाह?
7 ता ताह केया, ‘ज्यानकेरीन काय कुण आमुह काम पोर नाह लागाड्यो,’ तो ताह केयो, तुमू बी अंगुरान वाड़ी माय जावो।”
8 हांज पोर अंगुरान वाड़ीन मालीक तान मुकोड़ दोमाह केयो, “मोंजऱ्याह हादिन पासाणल्याह लागाड़ीन पेल्लाह वोर आखाह मोंजरी आप दे।”
9 तेवी ता मोंजर्या आवा जा पाच वासता लागेल एता, एक गेंटो वोर दिह ईतोन लागेल ताह एक दिनार जुड़नो।
10 जा पेल आयेल एता ता ज्य सोमज्या काय आमुह होवटा जुड़ती; पुण ताह बी एकुस दिनार जुड़नो।
11 जेवी ताह एक दिनार जुड़नो, ते ता मालक्या पोर कुरकुर केरीन केतेह,
12 न्या पासाणल्या एकुच गेंटो काम किरेल एता, एने तो न्याह बी आमरी बाराबोर मोंजरी आप दिनो, जा दिह बोरीन बार विशा, एने दोप वेठ्या?
13 तो ता माय रेन एकाह जापाप आप्यो, “एय दोस्ता मी तार हिऱ्यो काईच गेलेत नाह किरेत; काय तु मार हिऱ्यो, एक दिनार नाह ठेरायेल ईतो?
14 ज्यो तारो हे विसले, एने जातरे; मारी आसा ज्यी हे काय जोलोक तुवाह आपेल हे, तोलोस न्या पासाणल्याह बी आपु।
15 काय ज्य हाजो नाह सोतो काय मी मार माला हेऱ्यो जो पोटी तो केरूह? काय मी हाजो रेह केरीन तु खाराब नेजेर केरीन दिखेह?”
16 तिहेच केरीन जा पासाण हेते, ता ओंगाण एती, एने जा ओंगाण हेते, ता पासाण एती।
आपणी मोतीन बाराम यीशुन तिसरो जाणाव
(मरकुस 10:32-34; लुका 18:31-34)
17 यीशु यरूशलेम जाणे बुखेत, बारा चेलाह कुवालोच ली गीयो, एने वाटे ताह केयो,
18 “दिखो, आपु यरूशलेम जातेह, एने माणहान बिटोख मुखी चाकऱ्या, एने देरेमगुरून आथे देराय जाय, एने ता ताह मोतीन लायेक ठेरावती।
19 एने ता यीशुह बिगेर यहुदिन आथा माय होप देती काय ता तान ईजुत उड़ावती, एने चापका देती, एने खुरूसखाम पोर चेड़ावती, एने तो मोरीन पुशो तिसरे दिह जीव उठी।”
एक आईख ने विन्ती
(मरकुस 10:35-45)
20 तेवी जब्दीन सोरान आहख तीन सोरा हेऱ्यी यीशु फाय आवीन ताह नमस्कार केऱ्यी, एने ता फाय काय मांगणे बाज गियी।
21 यीशु तीह केयो, “तुवाह काय जुवे?” ती ताह केयी, “ज्य काय मारा ज्या दुय सोरा तारा राज माय एक तारे जीवड़े उगे, एने एक तारे डाखरे उगे बोही।”
22 यीशु जापाप आप्यो, “तुमू नाह जाणते काय काय मांगतेह, जो वाटको मी पिण्यो हे, काय तुमू ताह पिय सेकतेह?” ता यीशुह केया, “पिय सेकतेह।”
23 यीशु ताह केयो, “तुमू मारो वाटको ते पिहो, पुण मारी जीवड़े उगे, एने डाखरे उगे कुणीह बोहाड़नो हे ज्य मारो काम नाह सोतो, पुण जाह मारा आबाख ने उगे रेन तियार किरेल हे, ताज ने केरता हे।”
24 जेवी बाकीन दोह चेला ज्यी वात होमल्या, ते ता दुय बायाख पोर खीजवाना।
25 यीशु ताह आहने हादिन केयो, “तुमू जाणतेह, काय बिगेर यहुदिन आदिकारी ता पोर राज केरतेह; एने जा मोठा हेते, ता पोर आदिकार मेलतेह।
26 तोहलो तुमरे माय नाय एय, पुण जो कुण तुमरे माय मोठो बोणने हुदेह, तो तुमरो पावोर बोणी।
27 एने जो तुमरे माय ओंगाण मुखी बोणने हुदेह, तो तुमरो पावोर बोणी।
28 तिहेस केरीन माणहान बिटोख सेवा केरावणे नाह, पुण सेवा केरने आयेल हे, एने मोकतास ने सुटकारान केरता तान जीव आपणे आयेल हे।”
दुय आंदलान किस्सो
(मरकुस 10:46-52; लुका 18:35-43)
29 जेवी यीशु एने तान चेला यरीहो माय रेन निकेलताला, ते एक मोटली माणहान गेरदी तान पासाण चाल देनी।
30 एने दुय आंदला, जा सेड़कीन दिड़े बोह रियेल एता, ज्य होमल्या काय यीशु जाणे बाजरिनोह, आयड़ीन केणे बाज गीया, “एय मालीक, दाऊदान बेटाख आमु पोर किव केर।”
31 माणहे ताह ठावका रिवो केरीन दोपकाया, पुण ता उंजु मोठेह आयड़ीन केया, “एय मालीक, दाऊदान बेटाख आमु पोर किव केर!”
32 तेवी यीशु उबरीन ताह हाद्यो एने केयो, “तुमरी काय आसा हे काय मी तुमरी केरता केरू?”
33 ता ताह केया, “एय मालीक, ज्योस काय आमु देखणे बाज जाज्यु।”
34 तेवी यीशु किव केरीन तान डोलाह सापल्यो; एने चालोच देखाणे बाज गीयो, एने ता यीशुन पासाण चाल देना।