19
तालाक ने बाराम यीशुन हिक
(मरकुस 10:1-12)
1 जेवी यीशु ज्यु वातु केय दिनो, एने गेलील माय रेन जात रिनो; एने यरदन नेदीन ती मीरे यहुदियान देसाम आवो।
2 तेवी होवटाली गेरदी तान पासाण चाल पोड़नी, एने तो ताह हुदाऱ्यो।
3 तेवी थोड़ाक फरिसी यीशुह पारेखणेन केरता, ता फाय आवीन केया, “काय काल्ला कारणान केरता आपणी लाडीह सोड़नेन हाजो हे?”
4 यीशु ताह केयो, “तुमू चोखाली पुस्तेक माय नाह वाच्या काय जो ताह बाणायेल, तो पेलुस रेन एदमी एने बायकु बाणायेल हे,
5 एने बोगवान कियेल, ‘केरीन माणुह तान आईख आबाख रेन आंगे एन, तान लाडी हिऱ्यो रेय, एने ता दुयू एक सेरीर रेती?’
6 ता एवी दुय नाह, पुण एक सेरीर हेते, तानकेरता जाह बोगवान जुड़ेल हे, ताह माणहे आंगे नाय केरी।”
7 ता यीशुह केया, “उवतो मुसा ज्य काहा ठेरायेल, काय लेख्यो आपीन तिह सोड़ देय?”
8 तो ताह केयो, “मुसा तुमरा मोनान वातड़ाय ने केरता तुमूह तुमरी लाडीह सोड़ देणेन उकुम आपेल हे, पुण पेल ओहलो नाह एतो।”
9 एने मी तुमूह केथु, “जो कुण बी सिनालाह सोड़ीन, दिहरी वातीन केरता तान लाडीह सोड़ीन दिहरी हिऱ्यो, वाराड़ किरेह, एने जो सोड़ेल ती हिऱ्यो वाराड़ किरेह तो बी सिनालो किरेह।”
10 चेला ताह केया, “केदी एदम्याह बायकु हेऱ्यो ओहलो नातो हे, ते हाजो ज्यो हे वाराड़ नाय केरी।”
11 तो ताह केयो, “आखा वाराड़ केऱ्या बिगेर नाह रेय सेकते, निस्ता ता ओलास जाह ज्यो वरदान जुड़ेल हे।
12 काहाकाय थोड़ाक नपुंसक ओहला हेते, जा आईख ने पेटा माय रेन ओहलाच पायदा ईयेल हेते; एने थोड़ाक नपुंसक ओहला हेते; जाह माणहे बाणायेल; एने थोड़ाक नपुंसक ओहला हेते; जा हेरगान राज ने केरता सोताह नपुंसक बाणायेल हेते, जो ज्याह लेय सिकेह, तो लेय लेय।”
यीशु सोराह बोरकेत आपणे
(मरकुस 10:13-16; लुका 18:15-17)
13 तेवी माणहे सोराह यीशुन आहने लावा काय तो ता पोर आथ मेली, एने विन्ता केरी, पुण चेला ताह दोपकाड्या।
14 यीशु केयो, “सोराह मार फाय आवणे दिवो, ताह मा रूकहो, काहाकाय हेरगान राज ओहलाच ने हे।”
15 तेवी यीशु ता पोर आथ मेलीन बोरकेत आप्यो एने तारेन जात रिनो।
मालदार जुवान एने जेलेमक्यो जीवाय
(मरकुस 10:17-31; लुका 18:18-30)
16 एने एक माणुह यीशु फाय आवीन केयो, “एय मालीक, मी काल्लो हाजो काम केरू काय जेलेमक्यो जीवाय सापड़ावु?”
17 तो ताह केयो, “तु माहु हाजा कामान बाराम काहा फुसेह? हाजो ते एकुच हे, पुण केदी तु जीवाय माय रिगणे हुदेह, ते उकुम मान्या केर।”
18 तो ताह केयो, “काल्लो उकुम मानु?” यीशु केयो, “ज्यो काय खुन मा किरहे, सिनालो मा किरहे, चोरी मा किरहे, जुठो पुरावो मा दिहे,
19 आपणा आबाख एने आपणी आईख ने मान मिलज्यो, एने आपणा आहेंल्या हेऱ्या आपणे बाराबोर मोंग किरज्यो।”
20 तो जुवान ताह केयो, “ज्य आखो, ते मी मानील हे, एवी मार माय काल्ली वातीन कोमी हे?”
21 यीशु ताह केयो, “केदी तु खिरो बोणने हुदेह ते जा, तारो मालदेन वेचीन गेरब्याह आपदी, एने तुवाह हेरगाम मालदेन जुड़ी; एने आवीन मार पासाण चाल पोड़।”
22 पुण तो जुवान ज्यी वात होमलीन नाराज एन जात रिनो, काहाकाय तो जुलूम मालदार एतो।
23 तेवी यीशु तान चेलाह केयो, “मी तुमूह खेरीच केथु, काय मालदाराह हेरगान राज माय जाणेन जुलूम केठीण हे।
24 तुमूह पुशो केथु काय बोगवानान राज माय मालदाराह जाणे रेन उटड़ाह हुईन डोसा माय रेन सेरकी जाणे होपो हे।”
25 ज्य होमलीन चेला जुलूम बोंगलायीन केया, “ओवतो कुणीन सुटकारो एय सिकेह?”
26 यीशु तान उगे देखीन केयो, “ज्यो माणहान केरता केठीण हे, पुण बोगवानान केरता कायच केठीण नाह सोतो।”
27 पतरस ताह केयो, “देख आमु, ते आखो काय सोड़ीन तार पासाण आव लागेल हेते, ते आमुह काय जुड़ी?”
28 यीशु ताह केयो, “मी तुमूह खेरीच केथु काय नोवाली केली माय जेवी माणहान बिटोख, तान बोड़ाय ने राजगादि पोर बोही, ते तुमू बी जा मार पासाण आयेल हेते, बारा राजगादि पोर बोहीन इस्राएल ने बारा गेराणान नियाव किरहो।
29 एने जो कुण गेराह, बायाख, बोणह्युह, आबाख, आईख, सोरा पोऱ्या, नाहते खेताह मार नावान केरता सोड़ दियेल हे ताह एक होव माप जुड़ी, एने तो जेलेमक्या जीवाय ने आदिकारी रेय।
30 पुण जुलूम जाणे जा ओंगाण हेते, पासाण रेती, एने जा पासाण हेते, ओंगाण एती।