16
बोगवानान रागान वाटका
1 तेवी मी मोंदिर माय रेन एक मोठास आवाज माय ता हात हेरोगदुताह ज्यो कितेन होमल्यो: “जावु, एने बोगवानान रागान हात वाटकाह देरती पोर टाक दिवो!”
2 तेवी पेल्लो हेरोगदुत जाईन तान वाटको देरती पोर टाक दिनो। ज्यानकेरता ता माणहा पोर जा जेनवेरान साप लागाड़ील एता, एने जा तान मुरतीन पुजा केरताला, ता पोर जुलूम तेकलीत देणेवाला फुड़ा निकेल आवा।
3 जेवी दुसरो हेरोगदुत तान वाटकाह देरीया माय टाक दिनो। ते आखो पाणी मुरेल माणहान लुय ने गेत एय गीयो, एने देरीया मायवाला आखा जेनवेरे मोर गीया।
4 उंजु तिसरो हेरोगदुत तान वाटकाह नेदी एने पाणीन जिरा पोर टाक दिनो। एने ता लुय बोण गीया।
5 तेवी मी पाणीन मालीक हेरोगदुताह ज्यो कितेन होमल्यो, “एय चोखाला, जो हे, एने जो ईतो, तु न्यायी हे, एने तु ज्यो नियाव ठिख किरेल हे!
6 ता चोखाला माणहान एने जाणकारान लुय वोयाड़ेल हेते, केरीन तु न्यायी हे एने न्याह पिणेन केरता लुय आपेल हे। काहाकाय ता ज्यीस लायकीन हेते!”
7 पुशो मी वेदी माय रेन ज्यो आवाज होमल्यो, “होव, एय आखाह रेन ताकेतवाला मालीक बोगवान! तार नियाव ठिख एने खीरलो हे!”
8 ज्यान पासाण चोवथो हेरोगदुत तान वाटकाह दिह्या पोर टाक दिनो, एने ताह बिय आवी ओहली आसी केरीन हेलगाड़ देणेन आदिकार आपाय गीयो।
9 बिय आवी ओहली आसी केरीन माणहे बुंजाणे बाज गीया, एने ता बोगवानान नावान जाह ज्यी पिड़ा पोर आदिकार हे, चिहटा केऱ्या। पुण तान पापाम रेन मोन नाह फिराया, एने नाह बोगवानान बोड़ाय केऱ्या।
10 तेवी पाचवो हेरोगदुत तान वाटकाह जेनवेरान राजगादि पोर टाक दिनो। एने तान राज पोर आंदारो सावाय गीयो, एने पिड़ान वोजेसे माणहे आप आपणी जिब चावणे बाज गीया,
11 पुण पिड़ा एने फुड़ान कारेण ता माणहे हेरगान बोगवानाह हाराप आपणे बाज गीया। पुण खाराब काम केरने नाह सोड्या एने नाह बोगवानान उगे मोन फिराया।
12 तेवी साहवो हेरोगदुत मोटली फरात नेदी पोर तान वाटकाह टाक दिनो। एने ती नेदीन पाणी हुक गीयो काय दिह उगता उगे रेन आवणार राजान केरता वाट तियार एय जाय।
13 पुशो मी डेटकान गेत देखाणार तीन खाराब जीवाह एजगेरान, जेनवेरान, एने जुठा जाणकारान मुयाम रेन निकेलतालो दिख्यो।
14 ज्या चोमेत्कार केरनार सैतानान खाराब जीव हेते। जा तीन जीव आखी दुनियान राजा फाय निकलीन ज्यानकेरता जातेह, काय ताह आखाह रेन ताकेतवाला बोगवानान ता मोटला दिह्यान लेड़ायीन केरता टुलो केरी।
15 “हुमलो! चोर जिहकेरीन आवीह तिहेस केरीन मी उचकाहुच आव लागुह! बोरकेतवाला ता हेते जा वाट जोवती रेतेह, एने तान फाड़का तियार मेलतेह, ताकाय ताह उगड़ा नाय फिरी एने ताह माणहान ओंगाण लाजवाणे नाय पोड़ी!”
16 ओवतो खाराब जीव राजाह एने तान सेनाह ती जागे टुलो केऱ्या, जाह इब्रानी बाषा माय आरमागीदोन केतेह।
17 तेवी हातवो हेरोगदुत तान वाटकाह वारा पोर टाक दिनो। एने हेरगान मोंदिरा माय बोगवानान राजगादिम रेन एक जोरदार आवाज ज्यो कितेन होमलानो, “आखो काय पुरो एय गीयो!”
18 पोशो विजली चोमेकणी, आवाज, एने वादलान गाजणे, एने बिय आवी ओहली देरती फाटनी। माणहाह देरती पोर बोणनेन पेल ओली जोरे देरती केदीच नाह फाटनी!
19 तेवी मोटला हेयरान तीन बाग एय गीया। एने आखा देसान गाव खेतेम एय गीया। बोगवान मोटला बाबिलोन हेयराह डेंड आपणेन केरता ईर किऱ्यो एने बोगवान ताह तान बुड़कील रागान दारा माय बोरायेल पियालो ताह पिणेन केरता आप्यो।
20 एकेक टापु तान जागे रेन हेरकी गीया, एने बोयड़ान ते पुतो बी नाह चालनो।
21 जुगाम रेन माणहा पोर मोण मोण बोरीन गारा पोड़ना, जा चालीह किलोन एता, ज्यी पिड़ान केरता माणहे बोगवानान चिहटा केऱ्या, काहाकाय ज्यी पिड़ा वेठाय नाय ओहली एती।