12
Tukaiki tou masih tehe yukyuk para katimwiy kiya kili Ngindrai
1 Tehen tora ko, wawu nali pe pisu, urakamam isa kili wawu nondriya koisirai ta Ngindrai, para akaiki wawu tehe yukyuk sih mepo mwalen, pe tehe yukyuk haiyan para mwan andre kitimwiy pe andre kiyki pwesai kiya kili Ngindrai—aro ara kultuw ndrokonan tawawu para totohun iya kili Ngindrai.
2 Pe wawu mbuna akatokuyani kultuw ta hu ndramat para kol pwan aro, hapeko wawu kapa hiyan kiya kili Ngindrai para kirapaiwani lohonga wawu kirayah howen. Pwen andre wawu kapahasani namiliwa Ngindrai ara tesah—namiliwan mepo hiyan, namiliwan pwokeyan mepo mwayih, pe andre kiyki pwesai kiya kili yiy.
Kaiki rou kaya pwan kiya mbuliya Kristus
3 Paratesah, iyau pahas ta Ngindrai opu mepo kiniykiy pwen kinsa kili yo, yo upwai isa kili wawu masih: Wawu mbuna kasap ngala wawu mbukenan kiya hin, hapeko akanim mwaniyani lohonga wawu mbukenan, kiro ndruwa ndrohonga lohongai ndrisiyon tawawu mepo Ngindrai kinhang wawu.
4 Pwen tehe nombuwe rou hakai-hakai iripo nombuwe rou hamou opu, pe hu nombuwe rou hakai-hakai aro, ara mbulya hu handra ko pwi,
5 pwen pe tehen tora ko, worou soyon, hapeko nondriya Kristus, ara nombuwe worou ara hamou o. Pe worou hamou-hamou, ara para sura hu masih hayah i.
6 Pe Ngindrai iyki hu yukyuk handra-handra iyau pahas tan isa kiltou. Pe kapa ndramat hamou yukyuk tan para kiwong nongna poropet, ara kiwong kiho ndruwa lohongai ndrisiyon tan ara.
7 Pe kapa hamou para kisopwat poho mbulen, pwen kimbulyaniy, pe kapa hamou mbulyan para kihinuwani hu ndramat, pwen kihinuwani hu.
8 Kapa hamou atan para kipwokeyani lohonga hu ndramat, pwen kipwokeyani lohonga hu ndramat. Pe hamou atan para pomene hu ndramat, ara kipomene hu kiya ndriyan masih; pe kapa hamou atan mbulyan ara poh, pwen kimbusiy kiyapolo ndriyan, pe kapa hamou atan para kipwaingani koisirai, pwen kipwainganiy kiyapolo pwesai.
Kultuw para namiliwai ara kambulyaniy
9 Ndriya wawu kimbulihi hu ndramat ndrokonan. Pe wawu kamwisnani kultuw pwassin, pe kapwahatini kultuw hiyan.
10 Pe wawu kaiki ndriya wawu masih kiya kiyata hamou-hamou kiyapolo kultuw para namiliwai. Pe wawu kahaiyani hu hayah kihohin kiya ata wawu mbukenan.
11 Pe wawu mbuna kakose kiya mbulya wawu, hapeko wawu kaiki wawu masih kiya mbulya Yapan, pe karo pwokeyani mwoiwa wawu.
12 Pe wawu kapwes kiya melit itapo isa, pe wawu kawayis nondriya hu nopwaran, pe wawu katohun lang masih.
13 Pe wawu kataingani hu menmena wawu kiyapolo hu ndramira Yapan mepo hu ndroisiy, pe wawu korombusi kultuw para pwokere hu ndramat.
14 Pe wawu katoholi hu mepo huhingasi wawu; wawu katoholi hu pe mbuna katen anna hu.
15 Pe wawu kapwes kiyasura hu mepo hu pwes, pe karang maliwawu kiyapolo yihu mepo hurang malihu.
16 Akapo hiyan kihisoule ko kiya kili hamou-hamou, pe mbuna kasikiye wawu, hapeko wawu kasusuye kiyapolo hu ndramat mepo ngala hu pwi. Pe mbuna wawu kapa ndre wawu pahasani melit masih.
17 Pe wawu mbuna kapo soiwi kultuw mwomwan ta ndramat imbusi kultuw mwomwan isa kili wawu. Pe wawu kanohonou para kambusi kultuw imwonen kiro mbulmara hu ndramat masih.
18 Kapa ara waison pe hiyan isa kili wawu, pwen ara ita kili wawu ko, wawu koro polo ndriya wayis kiya kili hu ndramat masih.
19 Pwen wawu kowase mepo nere imwonen, wawu mbuna kapo soiwi mwomwan tahu ndramat, hapeko wawu katali kiya kili Ngindrai para ndrinan kilokuh kiyata hu, paratesah, pwayan kinpwai pwen toro: Yapan ipa, “Kultuw para kapo soiwi mwomwan, ara to, yo ko andre kupo soiwi mwomwan kimui.”
20 Hapeko tehe nongan haiyan kinpwai:
“Kapa ndramat imwisnani wou ara kimundrui, ara ahang yiy anandrinai;
pe kapa koyun kisapak, ara ahang yiy hapesah para kiyin.
Kapa ambusiy toro, andre aiki masirai kimui kiya kili yiy.”
21 Pe kultuw pwassin mbuna kiramwaitini wawu, hapeko kultuw hiyan tawawu ara kiramwaitini kultuw pwassin.