13
Worou tukoro pahandra hu pohon para kapman torou
1 Hu ndramat masih kaiki hu mbukena hu koro pahandra hu poh para kapman, paratesah, Ngindrai opu ngara kiyki pwoke nopwaran iya kili hu poh para hu koro ndrohonoku hu pe hu koro nimnim. Pe pohon para kapman mepo hutopo mahapo, ara Ngindrai iykiy.
2 Pwen yiy mepo kindrihisani pwoke nopwaran para kapman, ara ihindrisani nongan para pwahanou ta Ngindrai. Pe yiy mepo kimbusiy tehen tora, ara yihu mbukena hu andre hu kakuni kora hu.
3 Paratesah, hu poh para kapman, ara hu topo para kapanohowani hu mepo humbusi kultuw imwonen, ara pwi, hapeko yihu topo, ara iyata hu mepo hu mbusi mwomwan. Wou anamiliy para aro mwoimwoi kiya nohowai ta yiy mepo ita poho kapman, ndre pwi? Pwen wawu kambusi kultuw imwonen, pwen andre kihari ngala wawu.
4 Yiy imbusi hiyan isatam, paratesah, yiy ara ndramat para poya mbulya Ngindrai. Hapeko kapa ambusi kultuw mwomwan, ara anoh kiya aliy, paratesah, hu poh ara hu kanmbultuwe semela pahun o mwaihei pwi. Yihu ara ndramat para poya mbulya Ngindrai, mepo pwoke ita kili yiy para kiyki kora ndramat para tandroindroi.
5 Pwen tehen tora ko, hiyan para worou tukoro pahandra poh para kapman. Pe wawu mbuna kanoh kiya kora melit mwomwan, hapeko hingorowa wawu kipahasani tesah hiyan para wawu kambusiy.
6 Pe tehen tora ko, wawu ngara kayuk takis, paratesah, hu poh para kapman ara hu ndramat para poya mbulya Ngindrai mepo ngara hu kaiki hu masih kiya mbulya kapman.
7 Pe akarapaya nahanah para takis tawawu handra-handra kiya kili kapman: Kapa nahanah para takis ita kili wawu, ara wawu karapayan; pe kapa para wawu kaiki takis kiya kili kapman, ara wawu kaikiy, pe kapa para kahaiye, ara wawu kahaiye, pe kapa para karanuhuyani hu pwen wawu karanuhuyani hu.
Ndriyam kimbuluhi ndramat hamou ara imbusi nongan para pwahanou isahamanan
8 Pe nahanah tam mbuna kiho ndron kili hamou, hapeko nahanah para ndriyam kimbulihi hamou-hamou opu kiro, paratesah, yiy mepo ngara ndriyan kimbulihi yiy mepo para pakeh kili yiy, ara imbusi nongan para pwahanou isahamanan.
9 Hu nongan para pwahanou ara mepo hupa, “Mbuna apo pilah,” “Pe mbuna arut ngundru ndramat,” “Pe mbuna apahana,” ‘Pe maram mbuna kilimiriy menmena hamou,” pe sehe nongan para pwahanou hirandron, ara masih husa pahandra nongan sahin opu aro: “Ndriyam kimbulihi hamou tehe ndriyam imbuluhi wou mbukenam.”
10 Ndramat ndriyan ngara kimbulihi hamou, ara andre kinhingasi ndramat hamou para pakeh kili yiy pwi. Pwen tehen tora ko, kultuw para ndriya ndramat kimbulihi hamou, ara imbusi nongan para pwahanou isahamanan.
Lang kinsa pakeh
11 Pe wawu kambusiy toro, lohonga wawu kileu kiya lang mahapo. Lenge wawu kinsa para wawu katali matiliu pe kapoyoi, paratesah, Kristus Yesu ndramat hiyan para sopwat rou, mepo lohonga rou ipwotisingi yiy mamu, ara kinsa pakeh.
12 Ping pakeh nakihipwen, pe lang nakileu ara. Pwen pe worou ara karapiyani hu kultuw para lokuhan kaya mawen pe kasohonge rou kiya menmena pahun mepo manganan para mipwan hiyan.
13 Pe tokuyarou ara kiro mwonen o tehe hu ndramat ngara karikai lang, pe worou mbuna kambusi kultuw handra-handra pe mbuna kayin ndran tunguyan, pe kambusi kultuw para pilah mepo pwassin handra-handra, pe worou mbuna karakokowai, pe worou mbuna kamaimai.
14 Pe wawu kawiri kultuwayi Yapan Yesu Kristus, hapeko wawu mbuna kalohonganiy para koho ndruwa hu namiliwai para hu kultuw pwassin para nombuwe wawu.