25
Engero ejindi eja Sulemaani
1 Jino njʼengero ja Sulemaani ejindi eji batangirisi ba Hezekiya habaha wa Buyudaaya bahopolola.
2 Huŋa Hatonda eŋono olwʼebiitu ebi agisa
era huŋa abahabaha eŋono olwʼebyo ebi banyonyola abaatu.
3 Ngʼolu egulu liri ŋaleeŋi nʼebiri ŋaasi mu nyanja
mu ngeri njʼenyene sosobola humanya ebi bahabaha baŋeega mu myoyo.
4 Singa batusa obucaafu mu feeza
esigalaŋo omuŋeesi asobola ohusunamo ehiitu ehyʼomuŋendo.
5 Mu ngeri njʼenyene habaha nʼaba wʼohuŋuga nʼatehubbira,
abahosi bʼebibi bali nʼohubatusa mu moni jije.
6 Nʼobanga mu moni ja habaha
solaganga ngʼolu oli womunina
era siwiihalanga mu baatu ebegingihiriri.
7 Hiraŋi omwene gahuloma ati,
“Nja ŋamugulu eno,”
ohuhira ohuhuswasa mu moni jʼabahombe babe.
8 Siwanguŋirisanga huŋira musango mu mbuga
olwohuba basobola ohuhuswahisayo!
9 Nʼobanga nʼesonga hu muliranwawo,
mwihalenga ŋalala mwatabagana
era sotusanga byama ebiŋamba hu wahyo.
10 Abaatu ni bali manya baati sohuuma byama
hija huhuleetera ohuswala mu moni jaawe.
11 Hiraŋi ohuloma ehiitu mu hiseera hyahyo ehituufu
ehyo hiba hyʼezaabbu eyi bataaye hu suniya eyi babbota mu feeza.
12 Oyo aŋuliirisa omuutu namulaabbira
ali hyʼehihomo ehyʼezaabbu enyene nʼenyene.
13 Omuhwenda omwesigwa ali hyʼamaaji agʼohunywa
agagwisa enduŋo mu hiseera hyʼendobooli
eyiri oyo aba nʼamutumire.
14 Omuutu asuubisa ehiitu ndigoherese,
ali hyʼebireri ebidumbadumbana aye ndibitonyese efula.
15 Ohuloma neŋooyo ko nʼobugumiikiriza
hiŋosaŋosa omuŋugi
era hireetera ohutusaŋo ebigosi.
16 Singa osuna omudugere,
onywanga sobitirisa
olwohuba ohanda wasesema.
17 Otasiibanga ewa muliranwawo
olwohuba aja huhwesinya ngʼahucaawa.
18 Omuutu aŋaayirisa owahye
ali hyʼepiima oba hyʼahasaale
oba hyamuhubbire ehinabbiro.
19 Ohwesiga omuutu atali mwesigwa mu biseera ebigosi,
hiri hyʼohuliisa eriino erihuumulya
oba ohugendesa ohugulu ohuleme.
20 Ohwembera omuutu ali nʼenaku hu mwoyo,
hiri hyʼohwambula omuutu ekooti mu hiseera ehyʼembeŋo
oba hyʼajuhire cumbi mu hibbwa.
21 Enjala yinaba ni yiruma omulabe wuwo,
omuŋanga emere galya
era enduŋo yinaba nʼemuluma
omuŋanga amaaji ganywa.
22 Onahola otyo onahabe oŋeesa amanda agaduha omuliro hu mutwe gugwe
era Musengwa alihuŋa omuhemba.
23 Ngʼolu mbeŋo epololohi yireeta efula
nʼolugambo lwosi luleetera abaatu ohuluŋa.
24 Omala gebanda ŋamugulu hu hasolya hʼenyumba ohutabaaye
mu nju ndala nʼomuhasi aduhanirisa.
25 Amaŋuliro amalaŋi ohuŋwa aŋale
gali hyʼamaaji amaŋololohi agagwisa enduŋo.
26 Omugwalaafu afugiirira omuhosi wʼebibi ohumubuzabuza
ali hyʼesobere yʼamaaji agadumbuhire.
27 Sihiraŋi ohunywa omudugere wabitiirisa
oba ohwenda abaatu bahuŋe eŋono.
28 Omuutu atasobola hweŋuga
ali hyʼehibuga ehiŋumaho lukomera.