26
1 Ngʼolu obuŋololohi butabaŋo mu hiseera hyʼomumwi
nʼefula ngʼolu etasaana hutonya mu hiseera hyʼegesa
nʼomuutu omuŋubeebe sasaanira eŋono.
2 Hyʼenyuni egululuha ni eŋuma ŋa hwebanda
ehiŋwabo sihisobola huhuŋamba onaba nʼoŋumaho musango.
3 Hutambisa esimbo hu mbalaasi
hwatambisa oluhoba hu nasugirya ohuhola ehi hwenda
nʼomuŋubeebe yeesi gendamo ehibbooko.
4 Sogobolanga mu hibuuso hyʼomuŋubeebe,
onamugobolamo, weesi oliba muŋubeebe hya niye.
5 Omuŋubeebe omugobolangamo mu ngeri eyʼehiŋubeebe
ko gafaania ati ehibuuso hihye hibaaye hyabuŋubeebe.
Ni hitali cehyo, aja huŋeega ati mugesi.
6 Ohutuma omuŋubeebe ohuŋira obuhwenda
hiri hyʼohwetemaho ohugulu wamwene
oba ohunywa obutwa.
7 Engero eyiri omuŋubeebe jiŋuma mahulu,
hyʼohugulu ohuleme eyiri omwenehwo ni hulereeja hulereeja.
8 Hiŋuma mahulu ohuŋa omuŋubeebe eŋono
hifaana hyʼomuutu aboŋa ebaale mu panda ko gahubba.
9 Omuŋubeebe ohutambisa engero
hiri hyʼomumeesi agesyaho ohweyiŋa oluŋwa.
10 Ohuŋa omuŋubeebe omulimo,
hiri hyʼomuutu agoba galasa hulasa obusaale hifaabi.
11 Omuŋubeebe agobolamo ohuhola ehiitu cʼehyene,
ali hyʼembwa egaluhira ebirusi byayo.
12 Omuutu ahirira erala ohuba omuŋubeebe
asinga oyo oweranga ohuba omugesi.
13 Omuutu omudoto aloma ati,
“Epologoma yiri mu luguudo,
epologoma egendera mu nabiŋwera.”
14 Ngʼolu olwigi lucuuhira hu pata,
omudoto yeesi atyo po gecuuhisa hu buliri wuwe.
15 Omudoto aŋira engalo mu bbakuli ohubugula emere
aye yimudembya ohuyita mu hanwa.
16 Omuutu omudoto aŋeega ati mugesi
ohuhira abaatu abangi abaloma nʼamagesi.
17 Omuutu oweyingisa mu buduhani obutamuŋambaho,
ali hyʼomuutu aŋamba hu matwi gʼembwa eyi atamanyire eyi eŋwera.
18 Omulalu agudusa ehisoosa ehyʼobulabe,
19 ali hyʼomuutu adulinga muliranwawe
ngʼahena amuloma ati, “Mbaaye saaga husaaga.”
20 Ŋanaŋumaŋo asendamo ekwi, omuliro gusima
era aŋaŋuma lugambo siŋaba buduhani.
21 Ngʼolu kwi jihuuma omuliro ni gwaduha,
mu ngeri njʼenyene nʼomuutu aleeta obuyoga agima obuduhani weyongera.
22 Owʼolugambo ebi aloma biŋomerera,
era biri hyʼemere eyi olya yeehala mu hida.
23 Omuutu oweŋoomya mu ndoma
aye mugati mula nʼali nʼomwoyo omubi,
ali hyʼetamu eyi baŋahaho erangi
yaboneha bulaŋi ate nga ko panaŋo.
24 Omunafuusi ahweha obucaayi wuwe
era geŋomya mu malomere
aye mu mwoyo gugwe ni gejuuye budulingi wereere,
25 wayire geŋomya mu malomere
aye sofugiiriranga ebi aloma,
olwohuba omwoyo gugwe gwijuuye bibi byereere.
26 Asobola ohuwiiha hu bucaayi wuwe
aye obubi wuwe buja hweta ŋalafu mu lwijuuye.
27 Singa oyaba eroŋo, oja huligwamo wamwene
era oyo aŋiringisya ebaale,
lirimugaluhira lyamuhenaŋo omwene.
28 Omuutu adulinga abahye aba saabenda
era obudulingi buleeta ohusihiiriha.